بالفيديو.. بتربى كلب.. "جلهوم" هيجاوبك على كل الأسئلة اللى أنت عايزها

إزاى تتجنب هجوم كلب شرس أو كلب بلدى؟

قال محمد جلهوم، خبير تربية الكلاب، إن الكلاب الموجودة فى الشارع تختلف تمامًا عن الكلاب المدربة أو الشخصية، فالكلاب البلدى غير مدربة على العض وإذا عض شخص يحدث له جرحا خفيفا والكلب يتصرع .

وأوضح "الخبير"، أنه إذا تعرض أحد الأشخاص لهجوم من كلب بالشارع فعليه ألا يجرى أو يصاب بالخوف، ولا ينظر فى عين الكلب مباشرة، وبالتالى سيتراجع الكلب تمامًا عن مهاجمة الشخص.

واستطرد "جلهوم"، ولكن الكلاب الشخصية التى يمتلكها الأفراد فهى كلاب مدربة، فإذا أخذت الأمر بالهجوم فلا أحد قادر على إيقافها وتمحو القواعد التى نتخذها مع كلاب الشوارع، ولكن الكلاب المدربة تتوقف فقط عن الهجوم فى حالة أمرها صاحبها بالتوقف .

وعن تربية الكلاب البلدى، أوضح "جلهوم"، أن الناس تعرف عن تربيته بسبب شكله، فالكلاب الخارجية شكلها جميل "الله جميل يحب الجمال"، ولكن الكلب البلدى شكله مش حلو زى باقى الكلاب، ولكن لو تم تربيته بيكون أقوى من الكلاب اللى بره.

إزاى تأكل وتطعم كلبك؟

قال محمد جلهوم، خبير تربية الكلاب، "الاهتمام بتربية الكلب يأتى فى المقام الأول بأكله فأفضل أنواع الأكل والتى يوجد بها الفيتامينات والبروتينات التى يحتاجها الكلب هو النوع دراى، وده عبارة عن أكل مجفف مفيد لعظم الكلب وشعره وفيه كل العناصر الغذائية.

واستكمل "جلهوم"، "أما بالنسبة للأكل الفريش فراخ مثلاً أو ما يسمى البروتين.. الأكل الفريش كويس لو أديته للكلب بس يكون نيئ مش مسلوق أو مستوى.. والصرع ملهوش علاقة بأكل اللحم النيئ ده ملوش علاقة بده.. لأن الكلب بياخد حقنة للتطعيمات ضد الصرع وهو صغير عشان فى شائعات بتقول أن لو الكلب كل لحم نيئ بيتصرع وديه تخاريف".

واستطرد، "الكلب بيكون ليه كورس تطعيمات مع الدكتور البيطرى اللى بتابع معاه.. على حسب الدكتور فى كورس جدول للتطعيمات ثمانى وخماسى وثنائى وأول تطعيم بياخد الكلب لما بيتم 45 يوم".

وأوضح، الخبير: "الكلب بيمر بمرحلة اسمها قلش يعنى أنه بيغير شعره كله بالكامل.. والكلاب اللى بتيجى من بره مصر بتيجى شعرها كبير جدًا نظرًا لانخفاض درجات الحرارة هناك.. ولكن عندما يأتى إلى مصر شعره بينزل النص أو أكتر".

إزاى تربى كلب؟

قال محمد جلهوم، الخبير فى تربية الكلاب، " إن تربية الكلاب ليست بالأمر السهل فقبل أن تستنهض وتفكر فى شرائه لابد وأن توفر له المكان المناسب لذلك.. بعدها تجيب الكلب وتعتنى بيه طبيًا من خلال التطعيمات، فالاعتناء بالكلب يأتى فى المرتبة الأولى بإطعامه بالأكل الجيد".

واستكمل "جلهوم"، "لازم الكلب يتمشى كل يوم وتحدد له وقت رفاهية.. مينفعش يتربى فى مكان ضيق لأن الكلاب بتتعب نفسيًا وبتتأثر بده،ممكن الكلب مياكلش ولا يشرب بسبب أنه تعبان نفسيًا، ومن أعراض كمان تعبه نفسيًا ممكن يظهر زعله تلاقيه مبيلعبش، والسبب أنه عايز يخرج ويتفسح".

وأوضح "الخبير"، "الكلب بيفهم صاحبه كويس جدًا من خلال كلامه وعنيه، ولازم نعامله على أنه واحد من البيت وبيعرف إيه الصح والغلط من كلامك.. الكلب وفى جدًا لصاحبه حتى لو مش كلب شرس، فممكن جدًا الكلب يتحول لشرس فى حالة هجوم أحد على صاحبه.. ولو الكلب شرس ميقدرش حد يقرب من صاحبه نهائى لأنها بتكون مغامرة غير محمودة العواقب.. لأن الكلب لما يكون شرس ومدرب بيكون خطر".

اعرف إزاى تشترى كلب من غير ما يضحك عليك

قال محمد جلهوم، خبير تربية الكلاب، "فى ناس كتير أوى بتتعرض للنصب لما تيجى تشترى كلب، عشان كده لازم تشترى الكلب من حد أنت واثق فيه جدًا أو من مزرعة كلاب".

وأوضح "جلهوم"، "الكلب فيه منه إنتاج، أول ما ينتج الجرو بتاعه بيكون معاه شهادة نسب مين أبوه ومين أمه وبيتسجل فى مصر هنا وبيكون معاه باسبور كمان عشان كده أنت لازم تسأل أى حد أنت بتشترى منه على الأسئلة ديه".

واستكمل "الخبير"، "لازم تشوف شهادة النسب وتشوف الأب والأم اللى جابوا الجرو.. ممكن تروح تشترى من واحد جرو تلاقيه لما يكبر شوية كلب تانى خالص، لأن الكلاب كلها وهى صغيرة شكل واحد".