دمياطى يا أصحابى
لا بكل ولا بمل
وإن يوم تزيد الشمس
بحفر شجر بيضل
واعمل خشبها بيوت
يحمينى من أمشير
وأقول بعلو الصوت
دمياط صباحك فل
الأرو ده لعبتى
بيلين فى إيدى عجين
والموغنا دى صاحبتى
عشرة بقالها سنين
والموسكى ويا الزان
شبابيك بيوت وبيبان
لو كانوا يتكلموا
يقولوا إننا جدعان
حفار فى إيدى المدقة
والدفرة والأزميل
ورد الجناين بدقة
تلاقيه فى خشبنا أصيل
والزهرة والمروحة
والغصن والريشة
والعدة متمطوحة
تجريحة تخويشة
لوحة ومتنفذة
بإيدين صنايعى جميل
نعمة ومن ربنا
يورثها جيل ورا جيل
دمايطة ياخلق هو
ولا يعرفوا طبعنا
اللى يقولوا بخيل
دمايطة ولا عندنا
عاطل ولا صايع
الكل واقف هنا
فى ورشة ومصانع
وأسطوات بشوات
فى الخرط والحلايات
وارثينها من جيل فات
لجيل بعدهم طالع
يا حاضن القطنة ف إيديك
وراشش الخشب ألوان
متالك دوكو جوز تركى
يا لازق الدهب فنان
مدهباتى واستورجي
مساء الخير على عيونكم
معلم أسطى دمياطى
يا أهلى حبايبى وأخواتى
تحياتى
وسلام على إيد بتتكفى
بتتقن شغلها بضمير
بستر وصحة تتدفي
وتتمنى لغيرها الخير
سلام يابلدى يادمياط
يا أهل بلدى ألف سلام
معلم أويمجى خراط
حزانا ووشهم بسام
ومساء الفل يامدينه
يابحر ونيل بيتقابلوا
يا خير وبيرسى ع المينا
وموج بيزق موج قبله
يا أحلى بسيمه ومشبك
وتورته وقرصه من خالد
يافنجان قهوه متحبك
شربته عند بن زايد
لبن و فطيرة من العلمين
وأكله نيفا من صافو
طبق فول من صلاح الدين
وطورشى بكل أصنافه
تعيشى بكل خيراتك
ومرحب باللى جاى أهلا
ف قومى وبلى شرباتك
دا زوارك عزاز جدا
حبيبتى يا بلدى يا دمياط
تنامى وتصبحى على خير
واشوفك كل يوم فى نشاط
ومغسوله ب مطر أمشير
تم أضافة تعليقك سوف يظهر بعد المراجعة