رفعت الفنانة غادة عبد الرازق شعار "الاعتذار من شيم الكبار" وخرجت ببث مباشر جديد لها عبر حسابها الرسمى بموقع الصور الشهير "انستجرام"، واعتذرت فيه عن الفيديو المتداول لها منذ أيام على السوشيال ميديا، وطلبت من الجمهور مسامحتها.
وقالت عبد الرازق فى البداية "مش هقول إنها أزمة ، هو امتحان من ربنا، أنا طالعة للناس النهاردة أقولهم ، إن أنا غلطت فعلاً وأنا آسفة جدا، آسفة لجمهورى وآسفة للناس وآسفة لبلدى وآسفة لفنى، وحياه أولادى إنى عمرى فى حياتى ما قصدت إنى أقلل من نفسى أو أعمل حاجة غلط ، أنا مكنتش سكرانة انا ست بتعالج بقالى حوالى 22 سنة، باخد أدوية".
وأضافت عبد الرازق "أنا بقالى 26 سنة بحترم نفسى واسمى وبلدى وكل حاجة حواليا، عمرى فى حياتى ما غلطت، وأنا مش ملاك، انا يومها غلطت فى إن أنا كنت طول اليوم تعبانه وطول اليوم من الساعة الواحدة ظهراً فى الجزيرة ورجعت أخذت الأدوية بتاعتى النفسية ومعروف إنها بتعمل حالة هذيان شوية".
وتابعت " وأنا أقسم بالله مشوفتش من الكومنتات إن فى جزء منى بان، وأكيد مش قاصدة وانتو متأكدين، وكل دا أنا بعمله علشان روتانا بنتى، وعلشان أحفادى، وعلشان جمهورى ، وعلشان اول مرة احس إن بعد 26 سنة انا قد اية بتحارب وفى ناس مش بتحبنى ، وفى ناس متسنيالى الغلط، وبقولهم أذيتونى وكتر الف خيركم وحسبى الله ونعم الوكيل وكل واحد عنده اهل و اولاد".
وأستكملت " انا بقول لجمهورى انا بحبكم وبقالى 26 سنة بحفر فى الصخر وضاعت منى حياتى كلها، وفكرت كتير اطلع اللايف دا ولا مطلعوش، بس أنا صريحة طول عمرى، ناس كتير قالتلى قولى يا غادة إنه متفبرك، أنا مش عارف اقول مش مصدقة الكذبة مش قادرة أصدق الكذبة، أنا بجد مش بشوف الكومنتات من قريب، والى بعتولى وقالولى ان فى جزء باين منى انا مكنتش شايفاهم لانى مبشوفش من قريب ، على قد ما كنت بحبكم قوي على قد ما مكنتش متخيلة إن الضربة هتيجي جامدة اوى كدا".
وتابعت غادة " ودى الرحلة الوحيدة الى مرضيتش اتصور بمايوه وكنت واخدة قرار مظهرش كدا تانى، ومعرفش اية الى حصل فيها، والفانز ساعتها كلمونى وقالولى اطلعى لايف، وانا زى الهبلة طلعت لايف، انا بس طيبة ودا غلط اوى فى الزمن دا انى ابقى طيبة".
واستطردت "دخلت السرير والدواء النفسى اشتغل معايا الدواء النفسي بيدروخ وينيم، وبكلم الفانز بتاعى ومخدتش بالى ونمت وصحيت على فضيحة فى العالم كله، تفتكروا إن أنا كنت مستنيه أعمل دا بعد 26 سنة عشره ، وبعد كل النجاح دا مستنيه اعمل دا".
واختتمت كلامها "اقسم بالله أنا ما عارفه أقول إيه ، أنا بس هقول كلمة واحدة أنا طول عمرى ست محترمة وهفضل محترمة ، علشان الجمهور اللى أنا بحبه، وعلشان بنتى روتانا وعلشان أحفادى، وعلشان أنا ست بمثل بلدى اللى هى أهم بلد فى العالم، غصب عن عين اى حد فى الدنيا، انا اسفة وواعدكم انها مش هتتكرر منى تانى على اى صعيد فى الاحوال ، وآنا اسفة ويارب تقبلوا اعتذارى".
وعلى نفس السياق تفاعل عدد كبير جدا من جمهور الفنانة معها فى التعليقات لمؤازرتها والوقوف بجانبها ، وتم تدشين هاشتاج على تويتر لرفع روحها المعنوية والإشادة باعتذارها القوى.
غادة عبد الرازق من البث الجديد
جانب من اللايف
