كشفت مصادر مقربة من الفنان محمد فؤاد، عن أن "فؤش" استقر على 20 ديسمبر المقبل موعدا لطرح أحدث ألبوماته "سلام" وذلك تزامنا مع عيد ميلاده، بعد عدة تأجيلات ليعود فؤاد بعد غياب 8 سنوات عن سوق الكاسيت.
ويتضمن ألبوم فؤاد أغنيتين بعنوان "خلينا أخوات وعيبى" نفصح عن كلماتهما فى السطور التالية...
خلينا أخوات
أحكيلك عنها أقولك إيه غير إنها هى.. اللى أنا حبيتها وحبها سر وعايش فيا
مكانتش بتحكى ومطمنة فى الكون غير ليا
كانت تحكيلى على حب جديد بسهولة كدة عادى.. وأبقى هموت هتجنن منها وأعمل فيها هادى
بتعذب من يوم ماعرفتها وده حالى يوماتى
عايش أيامى كأنى وحيد وبجد عانيت.. والناس بتلومنى العمر بيجرى وليه خبيت
طول عمرى بخاف من اليوم ده يجى وأبعد وأنساه
جربت أنساها بغيرها وأقول كان ماضى وفات.. توحشنى أروح أتمنى أشوفها لو فى سكات
أرجع وأصارح نفسى وأقولى "خلينا أخوات"
أحكيلك عنها أقولها إيه غير إنها عمرى.. عمرى اللى أنا عشته وبحلم بيه ومغلوب على أمرى
أيام بليالى مشفتش نوم ولا جه يوم زارنى
أصعب إحساس لما بكون ناوى خلاص هصارحها.. أرجع فى كلامى وأقول لو قلت أكيد هخسرها
ما هو لو بان حاجة فى عنيها كان قلبى أكيد فسرها
عايش أيامى كأنى وحيد وبجد عانيت.. والناس بتلومنى العمر بيجرى وليه خبيت
طول عمرى بخاف من اليوم ده يجى وأبعد وأنساه
جربت أنساها بغيرها وأقول كان ماضى وفات.. توحشنى أروح أتمنى أشوفها لو فى سكات
أرجع وأصارح نفسى وأقولى "خلينا أخوات"
عيبى
عيبى إنى.. إنى جوة عيونى شيلتك.. كنت دايما أعلى قيمتك
مقبلتش أجى على كرامتك وأحترمتك
كنتى كل ما تحبطينى بتلاقينى لسة باقى
لسة ليكى فى قلبى مطرح لسة طيب من غبائى
بس علمتينى حاجة بعد ما كسرنى التعب
إن مش كل اللى يلمع قصاد عيونا يكون دهب
وغلطتى.. كنت لازم أعيش معاكى بألف وش وألف لون
كنت لازم أوصلك فى الحيرة لحدود الجنون
كنتى كل ما تحبطينى بتلاقينى لسة باقى
لسة ليكى فى قلبى مطرح لسة طيب من غبائى
بس علمتينى حاجة بعد ما كسرنى التعب
إن مش كل اللى يلمع قصاد عيونا يكون دهب
وأنا بنسحب.. مش هقولك أنتى عندى من اللحظة دى بقيتى فين
الحكاية أنا قولتهالك فى البداية فى كلمتين
عيبى إنى.. إنى جوة عيونى شيلتك.. كنت دايما أعلى قيمتك
مقبلتش أجى على كرامتك وأحترمتك
يذكر أنه منذ إعلان فؤاد عودته بألبوم جديد، بإصداره برومو لأغنية "سلام" بدأت مواقع وقنوات على اليوتيوب فى تسريب أغنيات ضمها فؤاد لألبومه الجديد، وبدأت التسريبات بنشر "سيبملات" من أغانى الألبوم، بالإضافة إلى تسريب أغنيات كاملة من ضمنها " سلام، فى حضنك، وسوء تقدير"، ضمن 12 أغنية يستعد فؤاد لطرحها.
من ناحية أخرى، يعود الفنان محمد فؤاد للسينما بعد غياب 13 عاما منذ تقديمه فيلم "غاوى حب" مع الفنانة حلا شيحة قبل اعتزالها والفنان رامز جلال، وذلك من خلال فيلم يتناول قصة شاب مصرى يتزوج من أجنبية تقرر العودة إلى بلادها، ويصبح مصير أولاده معلقا، ولم يحدد "فؤش" الاسم النهائى للعمل حتى الآن.
