السيسى يحذر من "الانتحار القومى" ويؤكد: التحرك غير المدروس يفتح باب الجحيم.. الرئيس للمشاركين فى جلسة "ما بعد الحروب والنزاعات": الحفاظ على الدول حق من حقوق الإنسان.. "ومين يدفع 300مليار دولار عشان تعمر سوريا"

جدد الرئيس عبدالفتاح السيسي،  تحذيراته  من "الإنتحار القومى"، وقال أمام جلسة "ما بعد الحروب والنزاعات .. آليات بناء المجتمعات والدول "  ضمن منتدى شباب العالم : إن  "التحرك  غير المدروس مش هاقول أبدا انه مؤامرة، فى تغيير واقعنا من خلال هذا التحرك، واحنا بنعمل التحرك بنفتح أبواب الجحيم على بلادنا، لأننا كنا بلد من البلاد المرشحة إنها تبقى كده "

وأضاف   السيسي : "كنت بقول من سنتين تلاته خلوا بالكم من الانتحار القومى، وأنا بقول الكلام ده فيه شباب من اوروبا يمكن ما يكونش عندهم التصور ده زى المنطقة العربية والافريقية، وهل ده معناه ان منغيرش او نسكت؟، لكن قوة حشد الشباب والرأى العام فى تغيير الامر بقوة قد يخرج عن السيطرة ما يؤدى إلى إحداث فراغ هائل يؤدى إلى تدافع القوى المحلية والأجنبية والخارجية  ، من  أجل  التدخل فى شئون الدولة وتتداعى مؤسسات الدولة واحدة تلو الاخرى، تبدأ فى الغالب بالقوات المسلحة والمؤسسات الأمنية ".

وشدد الرئيس السيسى ، على أن الشعوب التى تسعى إلى التغيير لا تدرك الفراغ الذى سينتج عن ذلك ويعج بالأشرار، وتابع:"الحكاية أنهم أرادوا التغيير بس مكنوش يعرفوا انه لما بيغيروا بيعملوا فراغ ضخم وكبير..هذا الفراغ ده  لا يملأ  إلا بالأشرار حتى لو كان الحكام اللى قبل كدا مش جيدين ..أيوه.. محدش هيقولوا ليكم الكلام ده خالص  ..أوعوا من الشعارات والكلام المعسول الذى يفضى بكم إلى الضياع" 

وتابع الرئيس قائلا  :"اشتغلوا وأصبروا وتحملوا وقاسوا وعانوا ..زى ما أنتم عاوزين ..بس  متعانوش فى الخراب ..قاسوا  زى ما أنتم عاوزين بالواقع اللى مش عاجبكم ..لكن متعانوش انكم تدمروا بلادكم لأنها لن تعود..البلاد اللى راحت ولم تعد..افغانستان منذ 50 سنة ". 

وقال الرئيس السيسى ، :"كام مليون ماتوا فى افغانستان والعراق وسوريا وليبيا ..من يدفع هذا الثمن ..أدوات الصراع تغيرت بعدما أصبحت الحرب المباشرة مكلفة جداً وتبيعاتها خطيرة ..تدمير الدول بشكل مختلف ..إذا كنا نحترم الإنسانية بجد ونقول أننا بشر حقيقيين .. أنا بتكلم عن  إنقاذ أوطان ".

وشدد الرئيس ، على أن محور "ما بعد الحروب والنزاعات.. آليات بناء المجتمعات والدول"  هام للغاية خاصة بالمنطقة العربية التى  تشهد صراعات، متابعًا: "منطقتنا تعج بالصراعات " ، مضيفا :" أنا لا أتناول المسألة من منظور سياسى وبنتقى الألفاظ والأفكار وببعد عن النقاط التى تسبب إشكاليات.. سأتكلم معكم بتجربة مصرية شاهد عليها وعلى الأحداث التى تمر فى المنطقة.. خذوا كلامى وفكروا فيه.. واللى تجدوه مناسب اهتموا به  ".

واستكمل   السيسي حديثه: "تعليقى  سيكون من شقين الأول ما قبل الأزمة والآخر ما بعدها، أما الجزء الذى قبل الأزمة هو تقدير المواطنين والرأى العام فى بلادهم لحجم التراجع والتخلف والمطالب التى يريدون تحقيقها.. اتصور أننا اللى شفناه فى الدول التى مرت بالأزمات دى .. التكلفة الإنسانية والمالية والأخلاقية اللى دفعتها الدول دى.. أكبر بكتير من لو كان الأمر استمر بدون تغيير.. التكاليف اللى دفعتها الدول اللى دخلت فى الأزمات دى أنا بقول من كل الوجوه وأرجوا أنكم تنظروا للصورة بشكل كلى وليس بشكل جزئى بسيط ".

وقال الرئيس السيسى ، أن الحفاظ على الدول هو حق من حقوق الانسان ، وقال إن إعادة بناء الاقتصاد الذى تحطم خلال الصراعات هي إشكالية كبرى، متابعا:"فيه ناس عاوزة تعيش فى مصر، احنا بنستهلك بترول بحدود 3.5 مليار دولار شهريا، يعنى 42 مليار دولار وقود فى العام، ولو دخلنا فى فوضى وخراب الناس هاتعيش ازاى؟ ، مختتما كلمته بالقول: "نحتاج لتعلم مقومات الدول والحفاظ عليها واستمرارها ".

وكان الرئيس السيسى ، استهل كلمتة أثناء مشاركته فى جلسة"ما بعد الحروب والنزاعات.. آليات بناء المجتمعات والدول" ضمن فعاليات المنتدى الثانى لشباب العالم المنعقد فى مدينة شرم الشيخ، والتى شارك فيها كل من وزير الخارجية سامح شكرى،وغسان سلامة مبعوث الأمم المتحدة الخاص بليبيا،والمبعوث الأممى إلى سوريا ستيفان دى ميستورا، قائلاً:"نا بحيى كافة السادة المتحدثين وبشكرهم على تواجدهم معنا ، وعلى حجم الثراء الذى قدموه  أثناء الحوار  والمساهمات بتعتهم فى موضوع أنا بعتبره من أهم الموضوعات على الأقل فى منطقتنا ..اللى هى بتعج بالصراعات ..ولو كان لى مساهمة فأنا بأكد للى بيسمعنا ..أنا لا أتناول المسألة من منظور سياسى وبنتقى الألفاظ والأفكار وببعد عن النقاط التى تسبب إشكاليات . 

وقال الرئيس السيسى ، لن أتحدث عن التكلفة المالية فقط ،  لكن أنا عاوز أقول لكم ،  يا ترى الطفل أو الطفلة اللى قعدت 9 سنين فى معسكر لاجئين  شخصيتها ده هتطلع عاملة أيه..يا ترى هتطلع شخصيتها سوية .

وأضاف الرئيس ،  مسارالإصلاح فى تقديرى المتواضع ،  من إنسان زيكم شاف بلده رايحة للدمار والخراب ، وحاولنا من خلال الجهد المبذول خلال الـ5 سنين الماضية كان غير مسبوق لكن بكل الجهد ده وكل الإجراءات اللى نجحنا فيها ..أنا  بقول لكم المؤشرات الاقتصادية وحجم الاستقرار والأمن ..أحنا لما فتحنا الباب للفوضى من غير ما نقصد منتج عنها أنكسر حاجز استخدام السلاح  ، من جانب الجماعات اللى موجودة معانا فى مصر وكانت موجودة قبل كدا..وكانت عايشة معانا قبل كدا ولكن بمجرد أنه اتيحت الفرصة والباب اتفتح بقا عندها استعداد للقفز على السلطة حتى لو استخدمت السلاح . 

وتابع الرئيس قائلا :  أنا هقول ليكم كلكم إذا كان أقل تقدير اتقال فيه أن السوريا تحتاج إلى 300 مليار دولار ..300 مليار دولار وأقصى تقدير تريليون دولار ..أنا عاوز حد يقول أنهى حكومة فى سوريا ، مهما بقا جات من الأغلبية أو الأقلية هتقدر تعمل أيه مع التحدى ده ..أنتم فاكرين أن حد فى العالم هيمد أيده..أنا بقولها على الملاء أنه يطبق 300 مليار دولار ويديها لدولة ولا أيه .. هو الصراع الموجود فى العالم موجود على أيه ..على النفوذ والأموال والمصالح ..حد يديك 300 مليار تصلح بلدك ..مش أنت اللى كسرتها ..مش أنت اللى خربتها ..اصلحلك أنا ليه ..لا أنا أصلح بلدى..وأبنى بلدى وأبنى لشبابى فى الدول المتقدمة..لكن ليكم أنتم ..أنتم اللى بتعمله فى بلادكم كدا وأنتم اللى بتخربوا بلادكم ..أنا بقول ليكم الكلام والله لن تسمعوه من أحد أبداً فى موقعى اللى أنا فيه ده وأنا أن شاء الله بحاول أنى أكون صادق والمبعوث الدكتور دى ميستورا ، يعرفنى كويس التقينا سوياً وتحدثنا حديث خاص ويعلم أن الكلام اللى بقوله ده هى قناعات ناتجة عن خبرات لممارسات عشناها ..مش كلام احنا بنقوله..احنا عشنا كل يوم..كل يوم بنعيش فى مرار ومعاناة لأجل المحافظة على بلدنا و100 مليون مصرى ..الدكتور غسان بيقول أنه فى ليبيا عندهم فيه دول ريعية فتقدر يخشلها دولارات من مصادر البترول ..احنا فى مصر معندناش بترول..معندناش ده ..كانت هتتخرب وتضيع وما ترجعش تانى وتبقا ملايين من المصريين بتهاجر على أوروبا أو دول الجوار أو تضيع فى الصحراء والبحار ".

 

 

منتدى شباب العالم (18)

منتدى شباب العالم (19)

منتدى شباب العالم (20)

منتدى شباب العالم (21)