وكأن النجم المحترف، يتفضل على ناديه حين يمضى 3 أو 4 ساعات بين جدران الغرف، أو موجودا فى الملعب أو الجيم!
دعونا نراجع معا قائمة الأعذار، أو نفتح صفحة فى أجندة «الشد» والشدة من المسؤولين، عسى الله أن ينفع بها أحدا!
> يا حضرات.. تخيلوا أن لاعبا أو مدربا، أو طبيبا، أو أيا من أفراد منظومة محترفة.. يتأخر عن الوصول للنادى، فنكتب فى الصحف «المدير الفنى يمنع فلان.. أو علان.. من تركان»!
المحترف.. يرد: «آسف كانت الدنيا زحمة»!
هل نسمعه أغنية «زحمة يا دينا زحمة»؟!
● يا حضرات.. اسمعوا بقى موديل تانى!
المحترف متأخر.. والمسؤول يسأل: كنت فين وليه؟!
المحترف: «بنتى كانت تعبانة شوية وبعافية، وذهبت معها إلى الدكتور»!
ياااااااه!
طيب.. هى فين دلوقتى؟!
أبدا.. رجعتها ومعها مامتها للبيت.. آسف يا كوتش!
● يا حضرات.. المحترف متأخر.. المسؤول تانى وتالت ورابع: «إيه الحكاية؟»!
الرد: أبدا.. عربيتى عطلت!
المسؤول مفيش تاكسى أو كوبر وشاهين؟!
المحترف: عادى يا كابتن مسؤول.. مافيهاش حاجة!
إيه رأيكم؟!
● يا حضرات.. فى بلاد المحترف فيها يأكل عيش وبقلاوة من الاحتراف، لن تجدوا ابنة، والدها المحترف يذهب معها للطبيب لأن البرد هاجمها!
طبيب.. والعربية العطلانة!
أبدا.. يا أفندم.. المواصلات يعنى العربية = لا تعطل فجأة!
كمان.. المحترفون لا يذهبون لتجديد الرخص، ولا شراء بطارية!
● يا حضرات.. دعونى أنقل لكم حكاية مصرية عن نجم محترف ومدربه المحترف جدا كرول الهولندى!
النجم تأخر لأن البنت عيانة!
كرول: «طيب ليه التأخير.. هو أنت دكتور؟»!
المحترف: «ليه كده يا مستر كرول.. أنتم بدون قلب.. إحنا غير»!
كرول: «لأ.. يا نجم»!
● يا حضرات.. هنا.. وبعد رفض السبب عاد كرول ليقول: «أنت محترف علشان تكسب فلوس كتير، ويكون عندك مساعد، أو مدير.. وبالكثير تستعين بصديق.. علشان تروح الشغل وتقبض الفلوس، بدلاً من المستشفى الحكومى»!
● يا حضرات.. أما فى الخارج.. وقولوا: «يا منجى من المهالك»!
تجد المحترف معاه جدول.. آى والله.. من 6 إلى 8 ساعات شغل كورة!
جيم.. تدريب فردى.. استرخاء تدريب جماعى، مغطس، تلج، استشفاء، وكله.. كله!
حتى الراحة بموعد!
● يا حضرات.. حين تولى بوبى روبون تدريب برشلونة قال للفريق فى أول يوم: «الفطار الساعة كذا.. والأكل مذا.. كل واحد معاه أكله، لا سلف للأدوات ولا الكوبايات، ولا كسرة خبز!
● يا حضرات.. تخيلوا!
طيب.. حين قال لهم: «ممنوع القيادة لأكثر من 60 كليومترا بس فى العطلة.. كمان وضع ملحوظة بعدها بتقول: وغالبا بعد إذن.. ثم أكد أنه سيرفض خشية الإبعاد والمفاجآت!
● يا حضرات.. هذا هو الاحتراف.. الحقيقى!
يعنى.. سواق.. ومدير.. ومساعده فى المنزل للمدام.. يبقى كله تمام!
على الأقل.. الاقتصاد يدور فى البلاد ويكسب كل العباد.. قووووولوا.. يا ررررب!
