مينا جميل يكتب : ذكريات

ذكريات

انا جوه سكوتى دموع

بتغلفها الضحكة ..

والضحكة أساسا مسروقة

من فرحة فشنك..

تقاطيع الوش مغيرها

انا أصلا عمرى م دوقت

الفرحة بحذافيرها ..

 أيوه الأيام كتر خيرها..

عمالة بتاخد وماتديش

عمالة بتسرق أفراحنا ..

وبنعمل مش واخدين بالنا

وبنغرق جوه ف أوهامنا..

وبنقفل أبواب مشاعرنا..

من كتر حنين بيدمرنا

والقلب كتير بيخيرنا ..ياتموت ياتموت

م هو لو هتعيش من غير حبك

من غير م يطبطب على قلبك..

طب ليه هتعيش! ؟

وحلاوة روح بتكسر جوانا تملى

مش سايبه الأفراح ولا مللي

والقلب بيشتكى من ذلي..

وبحس بنغزه بتقتلنى .. سرطان كللي

بعد ده كله ..هو انا ممكن احلم تاني!!

واتعب واغلب وافضل اعانى

واشرب من خمرة أحزاني.. ف اسكر وأبوح

تطلع ضحكه مليانه دموع وآهات وجروج

واخبط حبايه ترجع ليا سنين فاتت

 ..وافضل مدبوح

واندم على كل اللى باعوني..

عن كل اصحابى اللى خانوني

عن عمر كبير فات وانا اصلآ..

 ندمان على كل دموع نزلت

على ناس ف النار فجأه رمونى

واسرح واتوه

مع انى إنى بكون وسط اصحابي

ولا حدش حاسس جوايا

ولاحد بيعرف شكل دموعي..

اللى مخبيها ف صمت رهييب...

حبة كراكيب..ع القهوه تملى انا ويااهم

 .. مع شاى بحليب..

والحزن بيكتم أنفاسى

هو انتوا ازاى مش بتحسوا.. وازاى ناسى

وازاى عايزينى افضل ناسى

وازاى انا هكتم احساسي

وهخبى إزاي..

انا اصلا فاكر تفاصيلها..

مع طعم الشاي

والقلب ف تنهيده بيسحب

دخان تفاح من انفاسكم

ف عنيها بشوف وش القهوه

وريحتها بتمسح تجاعيدي..

 انا اصلا لو شفتها عيدى

هى وريدي.. ف مسكة ايدى

انا راسم كل اللى بيحصل بينى وبينها

ف قصايد شعر.. بفرحى وحزنى وتنهيدى