قال مرتضى منصور، رئيس نادى الزمالك، إنه حافظ على أموال النادى، وسيدعو لجمعية عمومية طارئة لعرض استقالته عليها فى حالة استمرار الوضع الحالى فى القلعة البيضاء عقب إعلانه للصفقة السوبر التى حدد السبت بعد القادم للإعلان عنها.
وتابع مرتضى، فى حديثه مع أعضاء نادى الزمالك من خلال الإذاعة الداخلية مساء اليوم،:"أنا دخلت السجن 7 مرات وقلبى حديد ومبخافش.. وأنا مانع الموظفين من الإضراب".
كما أكد مرتضى منصور:"أنا حافظت على فلوس الزمالك وهى أموال الأعضاء وتحملت الأعضاء واللجنة بأمن مركزى وقنابل نقلت الفلوس للبنك.. وأنا من غير قنابل حافظت عليها.. وفزت على الأهلى فى الصفقات بالفلوس.. إيه اللى يجبرنى أخالف؟.. أنا اتبرعت بـ18 مليون جنيه جايين هدية للنادى".
وأوضح أنه سيعرض الاستقالة على الجمعية العمومية للزمالك، قائلاً:"النادى هيرجع مفيهوش حنفية.. وهيرجع زى ما كان أيام ممدوح عباس.. وأنا حزين تحملت خلال أسبوعين ما هو فوق طاقة البشر والناس منتخبانى عشان أدير النادى مش عشان أحضر الماتش وأسقف.. أنا مش طرطور يا خالد يا عبد العزيز والنادى هيخرب يا خالد.. أنا مرتضى منصور اللى كنت بتشكر فيه اللى كنت بتقول للناس تعال شوفوا ده عامل صرح عالمى لو اللجنة ممشيتش من الزمالك احنا اللى هنمشى".
وبذلك يكون قد رهن مرتضى منصور بقائه فى رئاسة الزمالك برحيل اللجنة المشكلة لإدارة النادى مادياً وفى حالة عدم حدوث ذلك عقب السبت بعد القادم سيعرض الاستقالة على الجمعية العمومية.
