الأسد
راندا جاد تكتب: ملك الغابة
أنا الأسد. . كنت ملك الغابة ، كان صوت زئيري يهز الجبال و صداه يفور مياه الوديان . لو جعت .... اصطاد اجدعها فيل تحت رجلي ... اكل لحد ما اشبع و الباقي ارميه للضباع .
كان لى هيبة و شنة ورنة لحد ما أخدوني من مكاني و موطني وفجأة لقيت نفسى هنا ! في ام الدنيا زي ما بيقولوا .... جوة قفص .
اااااه على غدر الأيام . ااااااه لما يتحوج الحيوان للإنسان . بقه أنا يجي على اليوم اللي اقف جوة قفص وحتة عيل يزقلنى بالطوب . وأبوه واقف جانبه يصقفله ويقوله " جدع ياد " ..... جدع على إيه ؟! على إنه بياذى حيوان لا حول ولا قوة . جه على اليوم اللي اكون فيه لاحول ولا قوة !!
بقى انت يا إنسان لو كنت معايا فى الغابة كنت ذقلتنى بالطوب ؟ نسيت نفسك يا إنسان ؟ هوليه لما الإنسان بيقدر بيفترى على الضعيف ! فين الرحمة ..... فين الحنان ؟
أنا ملك الغابة اللي كنت دايما شبعان ... يجي على اليوم وأبقى دايما جعان . انا جعان حاسس انى همدان و هفتان ، مش قادر حتى على الزئير . الحارس اللي المفروض يراعيني بياكل اللحم بتاعى كله و يديني حته يادوب تعيشني ! انا ملك الغابة أكل حمير ميتة ؟!
الناس تجيلي تتفرج على علشان تسمع زئيري تلاقيني يا ولداه نائم موخم زيهم . هزيل و نحيف . أذاي يا إنسان تأكل حق غيرك ؟ أذاي تنزل في بطنك أكل نبت من حرام ؟!
انا ملك الغابة ...كنت كلى احترام ووقار ألاقى نفسى بنط بين حلقات من نار ؟ الاقى نفسى واقف على رجلين اثنين وبرفع ايدى لفوق .
ليه يا إنسان مش بترحم عزيز قوم ذل ؟ ليه بتقصد تذل الضعيف خصوصا لو كان عزيز ؟
انا الأسد الشجاع الحر استعبدني الإنسان ....ضربني وسجنى فى قفص بقيت جبان و فقدت حريتي ، بقيت عبد للقمتي ، بقيت بخاف من الخيال الا يكون هو الجلاد .
انا ملك الغابة الشهم النبيل الاقى الضباع اللي بتأكل الجيفة هي الكل في الكل ... ربنا يكفيك شر الجعان لما يمسك الذمام .
بنام كل يوم ودمعتي على خدى بناجي اللي خلقني واقوله انت الرحيم العادل جيبلى حقي من كل ظالم مفترى نسي انك موجود .
تم أضافة تعليقك سوف يظهر بعد المراجعة