طب يلا قوم و فوق و روق
اوعي قلبك من اليأس يدوق
ارمي شباك أحلامك لفوق
ماخلاص هانت و بكره تروق
عمال تبكي وتلعن في اللي فات
وتصرخ وتهري في قلب مات
ماخلاص مابقاش ينفع سكات
ماهي دنيا دايرة إلي الممات
كان فيه كتير ناس معاك
سابوا كام جرح جواك
بقولك ايه ما احناش ملاك
اتحرك بقي متبصش وراك
مد ايدك واوصل للسحاب
لسه قدامك ألف باب و باب
مين عاش حياته دايما في الخراب
انسي بقي وكفاية لوم وعتاب
بطل ترمي فشلك علي الظروف
اسعي واجتهد وبطل خوف
كام ضاع من حياتك وانت مكتوف
قول يارب وبكرة تشوف
في لسة دنيا بتتعاش
فيه أحلام انت محلمتهاش
كفاياك بقي تنفيض وطناش
في الدنيا مفيش حاجة ببلاش
وآخر الكلام ربك كبير
والدنيا لسه مليانة خير
فيه زيك ياما ناس كتير
يلا بقي كفاياك تأخير
