الستات .. آه من الستات ، أشكال على ألوان وكل واحدة ليها أسلوب وطريقة مختلفة عن غيرها ، الشاطر اللى يفهمهم صح ويعرف يتعامل معاهم . عندك مثلا :
- الست القوية المفترية المسيطرة .. تحب السيطرة وتحب تظهر قوتها وغالبا لو أديتها الفرصة تكون مستبدة وظالمة ، أهم حاجة عندها تسيطر على زوجها وأولادها وخصوصا ادام الناس ، لازم تثبت للكل انها الكل فى الكل علشان الكل يخاف منها ويعمل لها حساب . كل فترة تلاقيها بتتصنع مشكلة مع حد علشان تظهر قوتها و بتختار ضحيتها ضعيفة مستكينة علشان تقدر تمارس عليها قوتها وسيطرتها ولو قعدت فترة مش لاقية ضحية تلاقيها بتفرك وغالبا حتكون انت وأولادك الضحية . دى بقى حياة أولادها معاها عذاب لأنها بتتسبب فى مشاكل مع أزواجهم وزوجاتهم وطبعا سيادتك حتكونجتتك نحست من القهر . غالبا بيوت ولادها بتتخرب أو بيعيشوا فى تعاسة مع زوجاتهم و أزواجهم .
علاجها صعب بس ممكن انك تكون أقوى منها بكتير و تركز مع اولادك علشان تقدر ترد الظلم عنهم وعن أزواجهم وبيوتهم ما تتخربش.
- الست الغلبانة الضعيفة .. دى جميلة ومحبوبة من الجميع ، طيبة كدة ومكان ما تحطها تلاقيها ، ولادها وأزواجهم بيعشقوها ويتمنولها الرضا مع أنها دائما راضية ، حتعيشمعاها ملك ..لا سلطان . لو عاوز تلاقي زيها روح أقرب دار مسنين ممكن تلاقى منها حد لسة عايش .
- الست السوهنة المتمسكنة ... بوريه منها ، تلاقيها كدة عاملة نفسها غلبانة وساكتة و عايشة دور الغلبانة الطيبة وهى قلبها كله غل . شكلها هادئ و ضاحكة على جوزها وأولادها ومفهماهم انها ضعيفة وأطيب واحدة فى الدنيا . بت اللذينا بتنجح جدا فى الدور وبتسخر جوزها وأولادها يحاربوا الناس علشانها ويتخانقوا بالنيابة عنها بتعملهم مسح مخ ، بيبقوا عندهم شبه بلاهة ، أحلى أكل أكلها واجمل ست فى الدنيا بتبقى أمهم حتى لو كانت شبة المقشة ، هى اللى صح دائما ما بتغلطش لأنها طيبة و غلبانة وما بتعرفش تاذى حد زى ماهى مفهماهم . وغالبا بتبقى اسعد ست لأنها بتاخد كل اللى عاوزاه من جوزها وأولادها بالمسكنة ودموع التماسيح ، لا يمكن تعيش من غير راجل علشان تتسهتن عليه ، لو جوزها اتوفى تلزق فى ابنها . بس دى ربنا بيرزقها بجوز بنت او مرات ابن فاهمينها كويس وبيلاعبوها على الشناكل .
- الست العادية .. دى ست عادية جدا فيها الخير والشر ، فيها القوة والضعف ، مش متصنعة وعايشة فى حالها بكل احترام ، مش بتدخل فى حياة حد ولا حد بيتدخل فى حياتها او مش بتسمح ان حد يدخل فى حياتها ، بتعمل واجبها واللى عليها و حياتها مع أولادها وزوجها طبيعية ، بتبعد عن الست المسيطرة وبتحب الطيبة اللى فى دار المسنين وبتتخنق من السوهنة .
لو عاوز تعيش سعيد لازم تفهم زوجتك او امكإي نوع من النساء وتتعامل معاهم باللين والرفق زى الرسول "ص" ما وصى بس لازم تكون قوى جدا وعادل جدا لو حظك كان مع المسيطرة ، وتبقى واعى وذكى جدا لو حظك مع السوهنة لانها ممكن تخليك تحت أمرها بسهتنتها وتخسرك هيبتك واحترام الناس ليك من غير ما تحس . اما الست العادية مش محتاج تتذاكى ولا تستقوى عليها حتبقى بطبيعتك معاها . ولو قعدت عمرك كله تدور على الطيبة مش حتلاقيها الله يرحمهن كلهن ماتوا .
افهمهم صح وعاملهم بالحكمة واللين تعيش سعيد .
تم أضافة تعليقك سوف يظهر بعد المراجعة