السيسى يشهد حفل تخرج الدفعة الأول لكلية الطب بالقوات المسلحة.. الرئيس: "تلاتة بالله العظيم عمرى ماجاملت مخلوق أثناء خدمتى فى الجيش".. ويؤكد للمسؤولين: "لو عايزين تكافحوا الفساد فى بلادكم ما تجاملوش حد"

أكد الرئيس عبدالفتاح السيسي، متابعته بشكل يومى لطلاب كلية الطب العسكرى التابعة للقوات المسلحة، منذ نشأتها قبل 6 سنوات، مشيرا إلى أهمية تطبيق الاختبارات المميكنة على كل الجامعات للحد من التدخل البشرى.

وقال الرئيس خلال حفل تخرج الدفعة الاولى لكلية الطب العسكرى، اليوم الخميس: "النهاردة يوم جميل لأن ده عبارة عن فكرة فكرنا فيها وحلم موجود فى القوات المسلحة من فترة طويلة، ولما أنا اتوليت الوزارة فى الوقت ده كانت جاتلى الفرصة إن إحنا نطلق الفكرة ويكون فيه كلية طب عسكرى، وقلنا عاوزين ناخد بإيدين العلم والمعرفة الطبية من خلال الكلية دى".

وتابع الرئيس السيسى فى كلمته: "أى حلم إن إحنا ممكن نحلم بيه بنستكتره على نفسنا، بنتكلم عن موضوع بقاله 6 سنين، وبعد 6 سنين بنشوف أول ضوء منه، أوعوا تفتكروا إن الحلم خلال 6 سنين كانت اتسابت الكلية كده ..لا.. الكلية دى كانت بتتابع منى بشكل مستمر يوم بعد يوم..احنا كمصريين فى كل إجراء بنعمله كل مسؤول يتابعه لغاية لما يخلص وحتى بعد ما يخلص، إذا كنتم عاوزين تنجحوا وتسبوقوا الدنيا وتبقوا دولة ذات شأن أوعوا تفتكروا إن الثمن بتاعها كلام، الثمن مش كلام، والثمن عمل، عاوز أقولكم إن الاختبارات اللى اتعملت للطلبة لما بدأنا نتكلم عن الموضوع ده، قلت الكلية تختبر بالكامل، وقلنا نجيب اختبارات من الخارج، وفى كليات الطب الأخرى الاختبار اختيارى، وجبنا اختبارات من أعرق كليات الطب فى العالم، لكن لما اتكلمنا عن الطب العسكرى مقدرش ألزمها بحاجة أخرى غير الموجودة فى المنظومة".

وأضاف الرئيس السيسى: "عاوز أقولكم كلكم إن المجاملة فساد، لو انتوا عاوزين تكافحوا الفساد فى بلادكم، متجاملوش حد، لأن المجاملة فساد، وكنا عاوزين حتى جوه كلية الطب العسكرى نبقى مطمنين إن مفيش أى شكل من أشكال إن العملية التعليمية بتتعمل من أفضل ما يكون والنتائج جيدة وقلنا هنستمر في هذه النتائج ونعممها على مستوى الدولة المصرية وعمل اختبارات مميكنة فى كليات الطب علشان نحيد تماما العمل البشرى وميبقاش فيه مجال للمجاملة يقولك ده إبن فلان أصل هو خد الامتحان لا لا".

وقال الرئيس: "رايحين لكده مش بس كليات الطب العسكرى ولا فى كليات الطب المدنية، لا احنا بنتكلم على اختبارات وماشين فى البرنامج ده "الميكنة" ونحيد كل الاختبارات فى الدولة المصرية فيما يخص الجامعات، لما نيجى نقول هنعمل تطوير فى التعليم مش هى جامعة جديدة بس هو الأسلوب والمسار اللى هنتعامل بيه مع أولادنا وبناتنا فى الإعداد والتأهيل والاختبار والتقييم علشان كل واحد ياخد حقه وعلشان كمان لما نقول هذا الطالب امتياز يبقى كل المعايير الموجودة فى الدول المتقدمة يبقى ابنى امتياز".

وتابع: "لو انت النهاردة اختبرت كويس من الابتدائى لغاية الجامعة مظبوط المنتج اللى هطلعه هطلع ابن أو بنت تمام، لو جاملت هطلعه ميعرفش غير المجاملة طريق للنجاح.. عاوز أقول للمصريين من فضلكم اتكملت قبل كده محدش يجامل حد على الأقل باسمى يقولك أنا قريبه كذا وكذا من فضلكم والله والله والله بحلف تلاتة بالله العظيم أنا عمرى مجاملت أثناء خدمتى فى الجيش مخلوق فانتوا كمان يا مصريين متجملوش حد من أول أنا".

واستطرد الرئيس حديثه، قائلا: "أتصور خلال عامين تاخدو جميع الجامعات بنظام الاختبارات المميكنة، كتير مننا ما انتبهش للفكرة وخاف على ولاده، لكن أنا هخاف على كل ولاد مصر ومسؤولين عنكم، مش ممكن أبدًا نضيع ولاد بلدنا".. ساعدونا إن إحنا ننجح ونغير بلدنا ونطلع بيها لقدام، ساعدونا إن انتوا تثقوا فينا إن إحنا بنتحرك بمنتهى القوة والفعالية والعلم مفيش موضوع بيتعمل إلا لما يدرس بشكل جيد".

وقال الرئيس السيسي: "لما قالوا الامتياز المفروض إن الطلبة اتخرجت أنا بقولك خاللى بالك إذا كنت عاوز تطلع ببلدك قدام أفضل صر على موقفك، قلت لا ميروحوش والطلبة تقعد فى الكلية تاخد فترة الامتياز فى الكلية ولو نقدر ياخد الماجيستير فى الكلية نعمل كده، وعندى أمل كبير فيكم وكل شباب مصر ..قلت لا ..ياخدوا فترة الامتياز جوه الكلية ويروحوا المستشفى ويروحوا ويرجعوا ..ميرجعوش البيت وممكن تكون الأسر زعلانة لكن بناء الرجال مهم واحنا إن شاء الله بنبنى حاجة جميلة، وفى فترة الماجيسيتر هنحاول نخليها كده، وبين الزمالة والدكتوراة 3 سنين".

ووجه الرئيس بعض النصائح للطلاب، قائلا: "خالى بالك من نفسك وصحتك وعلمك وقيمك ومعرفتك، أوعى تسيب الرياضة وأوعى وزنك يزيد خالص والكلام دا لينا كلنا ولما حد يقول كده يقولوا الرئيس بيتكلم عن حاجة زى كده، أه أومال إيه، لو بقت ثقافة عندنا إن إحنا نخلى بالنا من الكلام ده ونراقب أكلنا كويس هينعكس انعكاس على الأمن القومى بشكل متتصوروهوش...وفوجئنا خلال فحص الأمراض غير السارية بعدد كبير وده بيعمل ضغط وسكر وخالوا بالكم من نفسكم وأوعوا تفتكروا النجاح طريق سهل.. جامعات هفنتحها السنة القادمة وعاوزين نعمل نظام داخلى فى بعض الجامعات دى، الكليات ذات الطبيعة المهمة زى الطب والهندسة والذكاء الاصطناعى، يتقدم لكلية الطب العسكرى ناس كتير ونتمنى نلبى كل مطلب بتنطبق عليه الشروط .. الدولة حريصة على زيادة عدد الجامعات وهتشفوه بالكتير خلال سنتين أو سنتين ولكن يبقى القائمين على العملية التعليمية يبقى عنده نبتة قوى عاوز يطلعها ويساهم فى بناء مصر.. بقول للطلبة فى مصر خالى بالك أوعا تنسى ممكن تكون اجتهدت لكن ده نص المشوار لكن الدولة قدمتلك النص التانى".

وفى نهاية كلمته وجه الرئيس السيسي الشكر لطلاب طب القوات المسلحة، على تفوقهم واجتهادهم، قائلا: "بشكر الطلبة على جهدهم ونجاحهم وده أول خطوة فى طريق بناء مستقبلكم وأتمنى لكم كل التوفيق والنجاح ونسمع دايما عنكم واحنا متابعين الزمالة والماجيسيتر ولو قدرت تعمل الدكتوراه فى الكلية إعملها".