بمغزل الحكمـــة غـــزل الغزال غزل خـيوطه بكل الألوان
على نول الأمل نسج النســــاج نسيج حب بمكوك الزمـان
رايح جاى يغطى كل الجسد سبحان الله هدية من الرحمن
يوم والتانى بقى الحلم حقيقة العبايه خير تدفى كل بردان
وطبطبة حنان على كل اللى عاش عمره تحت بند الغلبان
بعد العتمة نادى النهار كتب على كل دار غنوة حب امـان
مزارع يغنى فـوق اغصانها الطير ومصانع بعطر الدخـان
وزغرودة حب صبـغت نسيجه بشمسية الجـــرس والادان
جسد واحد بمليون صحة تموت الآهة يا حلاوتك يا إنـسـان
وعيون جيل الأمل ستة على ستة يلــضم بها إبـرة الكتـان
وصدر حوا ياما رضعنا منه قيم دايما بالقلب مش نســيان
اللى ينكر أفضال ربنا ثم صاحب المغزل يبقى لسه سكران
اصـحى يا نايم وحد الدايم دعوة الانبيا والرسل بكل الاديان
حب تراب مصرنا طه بحب مكة علمنا انه صحــــيح ايمان
تم أضافة تعليقك سوف يظهر بعد المراجعة