ودايمًا تشوفنى مبتسم عالى الجبين
ولا يوم بتركَبْنى الهموم
ولا يوم يعذبنى الحنين
دايمًا بَشوش ومنشرح
والدنيا تضرب ع الشمال أضحك وألِفّ لها اليمين
ولا عمرى أيأس أو أكون أبدا حزين
" طب والسواد جوّة العينين؟!!"
مالك ومال جوة العينين
جوة العينين عالم مضاد
مليان سواد
أحلام كتير متحطمة
مشاريع كتير متأجلة
براميل دموع انتاجها عدَّى عليه سنين
خيبة أمل
وأمانى دابت م الزمن...واتحللت
وجروح بتنضح بالأنين
روايات كتير ماكتبتهاش
لوحات كتير مارسمتهاش
وقصيدة عن عمر اتسرق...عن يأس عاش
يفرش سواده على الأمل
وعلى العينين
مابلاش نروح جوَّة العينين
خلينا برَّة وأوعدَك
هتشوفنى دايما منشرح عالى الجبين
أنا مش حزين
تم أضافة تعليقك سوف يظهر بعد المراجعة