صالح سليم والخطيب كانوا هيموتوا عشان ألعب فى الأهلي
الأهلي يُهين لاعبيه.. والسعيد وصالح جمعة "شربوا من كأس الظلم" الأحمر
متعب مكانش قادر يقف على رجله.. والأهلي كشفه فى التجربة السعودية
البدرى لا يستحق تدريب منتخب مصر.. متظلموش حسام حسن أكتر من كده
الغندور كان شغّال مترجم عشان مالوش دور وفى الآخر يقولوا "الكابتن التاريخى للزمالك"
لو أوتوفيستر قاد الزمالك وهو مخمور.. فـ"جوزيه" عمره "ما فاق من الويسكى"
طارق سليم قال لى: "إزاى تلعب وركبتك وارمة.. الزمالك هيخلّص عليك"
أنا اللى اكتشفت أحمد فتحى.. ولو كان ناسى "الجزمة هتفكرّه"
طارق سليم قال لى: عايزين نبنى جيل جديد للأهلي يبدأ بـ"رضا سيكا"
جوزيه مدرب فاضى معندوش غير الشخصية القوية
كهربا هيهرب من الأهلي زى ما هرب من الزمالك
أوتوفيستر قال لى هتلعب ماتش الستة بعد جراحة الركبة فقلت: "ده أهبل"
أنا اللى بطّلت هادى خشبة الكورة.. ده أنا كنت بلاعب الأهلي لوحدى
فايلر "فنكوش".. بس أحسن حاجة عملها أنه خلى سيد عبد الحفيظ "مالوش لازمة"
الأهلي عمره ما هياخد بطولة أفريقيا طول ما عنده لعيّب اسمه أيمن أشرف
على معلول "أكذوبة" صنعها الإعلام الأهلاوى
الجيل الحالى فى الأهلي معندوش غير رمضان صبحى والباقى "كمالة عدد"
حسنى عبدربه خلع لما حس إن الإسماعيلي "هيغرق"
كيف يختار محمد فضل مدرب منتخب مصر وهو ملعبش كورة أساساً؟
الأهلي فاز بالدورى الماضى بـ"الغصب والتحكيم"
كنا بنكسب الأهلي بالأربعة وإحنا قاعدين فى البيت
عواد أحسن حارس فى تاريخ الكرة المصرية بعد الحضرى رغم "مؤامرة" ناجى
محمد الشناوى معندوش رشاقة ولا مرونة.. إزاى يكون حارس الأهلي الأول؟
أحمد بلال ملعبش كورة.. إزاي يقيم هداف زى مصطفى محمد
لاعبو الزمالك كانوا بينفسنوا عليا.. كنت راكب عربية أغلى من عريبات نجوم الأهلي والزمالك
"لاعبو الزمالك باعوا مباراة 6/1 للأهلى.. فايلر معندوش فكرة.. الجيل الحالى لا يصلح لارتداء الفانلة الحمراء باستثناء رمضان صبحى.. الزمالك المرشح الأول للتتويج بدورى الأبطال الأفريقى.. مين محمد فضل عشان يختار مدرب المنتخب.. كهربا هيهرب من الأهلى زى ماهرب من الزمالك.. حسنى عبد ربه خلع من الإسماعيلى قبل ما يقع.. الخطيب فشل فى رئاسة القلعة الحمراء.. وعدلى القيعى وشوبير ذبحوا أزارو".. بهذه المفاجآت فجر رضا سيكا مدافع الزمالك والإسماعيلى ومنتخب مصر السابق مفاجآت مدوية فى حواره مع "اليوم السابع" والذى جاء كالتالى..
*متى بدأت رحلتك مع الكرة؟
أنا من مدينة التل الكبير بالإسماعيلية، وبدأت مشوارى مع الدراويش ناشئا عام 90 مع الفريق الأول وكان عمرى وقتها 17 سنة كأصغر لاعب يشارك فى الدورى.
*إذن أنت أصغر ناشئ شارك بالدورى وليس أحمد فتحى؟
أنا من أحضرت أحمد فتحى وحسنى عبد ربه للفريق الأول فى الإسماعيلى، شاهدتهم فى مباراة للناشئين مع فريق 16 سنة مع الإسماعيلى كانوا بيلاعبوا الأهلى وقتها، مكنش أحمد فتحى يعرف يعنى أيه باك رايت كان بيلعب فى نص الملعب مع حسنى، وبعد الماتش قلت لمحسن صالح فيه 2 لاعيبة محصلوش قبل كده، وأول مرة أحمد فتحى فى حياته يلبس جزمة كورة حلوة كانت هدية منى.
*هل تلقيت عروضاً للاحتراف قبل الانتقال للزمالك؟
تلقيت عروضاً من العين والجزيرة بالإمارات ونادى كولن فى ألمانيا، ولكن الإسماعيلى فضل انتقالى للزمالك صاحب العرض الأغلى مادياً فى ذلك التوقيت، حيث عرض الزمالك عبد الحميد بسيونى وعمرو فهيم و650 ألف جنيه للإسماعيلى مقابل الحصول على خدماتى وكان العرض الأغلى فى الكرة المصرية وقتها.
*ولماذا رحلت عن الزمالك وقتها؟
قعدت أسبوع فى الزمالك، وكان المدرب وقتها الألمانى أوتوفيتسر قالى: هتلعب باك شمال رفضت وقلت لوكيل أعمالى جابلى عرض من أهلى جدة مقابل 650 ألف دولار كأغلى صفقة وقتها، ووافق النادى على رحيلى فوراً.
*وما تقييمك لفترة احترافك مع أهلى جدة؟
فزت بأربع بطولات مع أهلى جدة فى موسم واحد، وهى الإنجازات التى لم يحققها لاعب عربى مع هذا النادى فى تاريخه ولكن مع تغيير رئيس النادى هناك أخبرنى أن راتبى سيقل عن 18 ألف دولار ويصل لـ 10 آلاف دولار فرفضت على الفور وعدت للقاهرة .
*هل تلقيت عرضاً من الأهلى لضمك؟
صالح سليم والخطيب كانوا هيموتوا وألعب فى الأهلى، ومحمد عبد الوهاب جابلى مليون جنيه، كنت أول مرة أشوف المبلغ ده والراحل طارق سليم قالى إحنا عايزين نبنى جيل للأهلى بدايته من رضا سيكا قولتله ياكابتن فاضل فى عقدى سنة ونصف والإسماعيلى رفض الصفقة وقتها.
*لماذا عدت للزمالك بعد 4 مواسم فى السعودية؟
كان مرتضى منصور "حاطط" شرط فى عقدى أرجع الزمالك، وقتها كلمنى الأهلى عشان أنضم ليهم قلتلهم فى شرط فى عقدى مش هينفع.
*ما تقييمك لرحلتك مع الزمالك؟
الزمالك خسر رضا سيكا وليس العكس.. تقاضيت أعلى قيمة مادية فى ذلك الوقت أكبر من حسام وإبراهيم وحازم إمام ابن النادى، وهى سبب عدم نجاحى مع النادى.
*ماذا تقصد؟
عقدى كان الأغلى فى الفريق بـ600 ألف جنيه فى الموسم وكان موجود فى الزمالك وقتها مدحت عبد الهادى وبشير التابعى ووائل القبانى بياخدوا 45 ألف جنيه فى الموسم، وده اللى خلى الدنيا سودا، أنا لاعب منتخب وهما لأ، مع إن مدحت عبد الهادى كان فى المنتخب قبلى بس لما روحت أنا خرج من المنتخب وكان عقده فى الزمالك 100 ألف جنيه، عشان كدا رحت لمرتضى منصور ليلة مباراة 6/1 قلتله عايزة أخفض عقدى عشان يشيلونى من دماغهم، هما كان بيركبوا عربيات قديمة وأنا بركب عربية موديل السنة وبـ350 ألف جنيه سعرها يساوى أسعار عربيات لاعبى الأهلى والزمالك كلهم.
*لماذا حملتك جماهير الزمالك مسئولية مباراة 6/1 أمام الأهلى؟
الزمالك تعاقد معايا من أهلى جدة قبل مباراة 6/1 بأسبوع فقط ونزلت من الطائرة على الدكتور أحمد عبد العزيز عملت "تنضيف غضروف الركبة" قبل المباراة بـ48 ساعة فقط رحت أسلم على اللاعيبة قبل الماتش وجدت أوتوفيستر بيقولى هتلعب الماتش قولتلهم هو الراجل ده أهبل!
*لماذا لم تخبره أنك لن تستطيع المشاركة فى المباراة؟
عقدت جلسة معه وكان خالد الغندور زميلى فى الوقت دا هو المترجم بينا وقولتله أنا مش هقدر العب قالى هتشارك ربع ساعة فقط.
*لماذا كان خالد الغندور يقوم بالترجمة لأوتوفيستر؟
عشان كان فاضى مش بيلعب قعدت سنتين ونصف فى الزمالك خدت 9 بطولات مشفتوش بيلعب 90 دقيقة وفى الآخر بيقولوا الكابتن التاريخى للزمالك، ومشى من الزمالك راح الترسانة.. لو هو لاعب كويس كان راح نادى أفضل أو احترف بره مصر.
*بعض لاعبى الزمالك قالوا إن أوتوفيستر قاد الأبيض فى مباراة الستة "مخمور".. هل هذا حقيقى؟
ظلم ومحصلش ولعيّبة منافقة.. من يقول إن أوتوفيستر مخمور يبقى جوزيه مفيش مباراة أدارها وهو فايق.. كل المدربين الأجانب "طينة واحدة".
*فى رأيك ما هى أسباب الهزيمة الثقيلة من الأهلى؟
لاعبو الزمالك باعوا مباراة 6/1 ، والدليل ليلة المباراة طلبت من مرتضى منصور المشرف على الكرة وقتها عقد جلسة معه لتحويل عقدى فى الزمالك من فئة أولى لفئة تانية عشان أنجح فى الزمالك، وجدته يتلقى اتصالا يفيد بأن بعض لاعبى الزمالك عقدوا جلسة مع مسئولى الأهلى لتفويت المباراة لأن خسارة الزمالك حتى لو بهدف واحد كانت تعنى رحيل مرتضى منصور عن الإشراف على الكرة، وهو الأمر الذى كان يريده بعض اللاعبين ومرتضى منصور حكى الواقعة دى قبل كدة.
*ولكن هل يجرؤ لاعبو الزمالك على ذلك؟
الزمالك قبل الماتش اتغلب من سوهاج واتعادل مع أسوان 4/4 وأوتوفيستر فى ماتش الأهلى كان أول مرة يلعب بطريقة 4-4-2 ، كانت خطة مدبرة لرحيل مرتضى منصور بالخسارة من الأهلى، وتعيين الدكتور كمال درويش مشرف بدلا منه، الأهلى فى الموسم ده مكنش يقدر يكسب الزمالك 1-0 حتى.
*هل تتذكر موقف حدث فى مباراة 6/1؟
وأنا نازل الملعب قابلت طارق سليم كان مدير الكرة بالأهلى وقتها، كان بيحبنى وبيفاوضنى من أجل اللعب للأهلى، واللعيبة شافتنى وهما نازلين الملعب.. طارق سليم بنفسه واقف مستنينى يسلم عليا وفجأة وجدوه بيزعق وقالى كلمة "عمرى ماهنساها" انت مجنون.. هيضيعوا مستقبلك ازاى توافق تلعب وركبتك "وارمة".. قولتله ياكابتن قالولى ربع ساعة بس وبعدين هو الاهلى فيه لعيبة.. ده رضا شحاته لو حطوه قدام عبد المنصف والجول فاضى مش هيعرف يدخلها ، وهادى خشبة أنا اللى بطلته كورة.
*ماذا تقصد؟
كنت "عامل عقدة" لهادى خشبة.. فى ماتشات الإسماعيلى والأهلى أحط الكورة لأوتاكا يروح مرقص خشبة ومدخلها جون كنت بلاعب الأهلى لوحدى وأنا فى الإسماعيلى.
*ما تقييمك لرحلة مانويل جوزيه مع الأهلى؟
فى أول مرة قعد 3 أشهر والأهلى قاله مع السلامة، لو هو مدرب كويس مكنش مشوّه، هو ميزته الوحيدة أن شخصيته قوية وقدر يتحكم فى النجوم اللى كانت موجودة واللى هو طلبها بنفسه.
*تقصد لاعبى الإسماعيلى سبب نجاحات الأهلى؟
لاعبو الإسماعيلى فى الوقت ده كانوا بيكسبوا الأهلى 4 وهما فى البيت، لكن مقدرش أقول إن لاعبى الإسماعيلى صنعوا تاريخ الأهلى، أعرف تاريخ الأهلى جيداً، ولكنه حالياً مش عارف يعمل جيل ياخد كأس أفريقيا بشرف.
*هل ترى أن الجيل الحالى فى الأهلى لن يستطيع التتويج بدوري الأبطال؟
الأهلى لن يفوز بدوري الأبطال بسبب رحيل عبد الله السعيد، الجيل الحالى لا يصلح لارتداء فانلة الأهلى، مثلا على معلول صنيعة الإعلام المصرى فى بطولة أفريقيا الأخيرة .. منتخب تونس لم يضمه.. اللاعب الوحيد الذى بدأ يمشى صح فى الفترة الأخيرة بعد ما خد حجم أكبر من حجمه الأول هو رمضان صبحى، موهبة صعب تتكرر فى مصر كتير لأنه لعب وسط عتاولة فى بدايته مع الأهلى ورغم صغر سنه قدر يقف على رجله وسطهم ولكن الإعلام دمره وفشل بعدها فى إنجلترا ولكن مع المنتخب الأولمبى أعاده للتألق ولو كمل هيروح فى حتة بعيدة، الأهلى مفيهوش نجم غير رمضان صبحى وأحمد فتحى اللى فى الفترة الأخيرة بعد عن النجومية شوية.
*وماذا عن وليد سليمان؟
من أحسن اللاعيبة فى الجيل الحالى ولكن طريقة لعبة ليست مميزة ولم يطور من نفسه منذ خروجه من بتروجت، مش فارق معاه حاجة.
*وماذا عن حسام عاشور؟
تعظيم سلام من أول يوم لعاشور، لازم يتعمله تمثال فى الأهلى.
*ما رأيك فى أزمة عبد الله السعيد بين الأهلى والزمالك؟
عبد الله لما رحل عن الأهلى، مش عارفين يعوضوا غيابه والأهلى عرف أنه ظلم عبد الله السعيد.
*كيف ترى انضمام كهربا للأهلى؟
مكسب للأهلى لو عرف النادى يحجمه كويس ، كهربا لما راح السعودية وشاف 10 ملايين جنيه مرة واحدة اتخض وتألق وخد عربية هدية وكسر الدنيا ده رزقه عشان مجتهد ، ولكن كهربا غلط فى حق نفسه قبل أن يخطأ فى حق الزمالك ، واللى عمله كهربا فى الزمالك هيعمله فى الاهلى.
*هل تؤيد رحيل صالح جمعة عن الأهلى؟
صالح جمعة هو اللى جابه لنفسه، من يوم ما دخل الأهلى يتألق ويختفى مرة واحدة، وفى رأيى فايلر ظلمه كان لازم يديله مباريات ويحكم عليه لو فشل قوله مع السلامة، ولو راح الزمالك مكسب كبير.
*هل ترى أن الأهلى أهان عماد متعب؟
الأهلى أكبر نادى فى أفريقيا يهين لاعبيه، حسام غالى مثلا من أمهر وأذكى اللاعبين فى الكرة المصرية ورحيله عن الأهلى بالطريقة دى تعب نفسيته، أما متعب فهو من أهان نفسه مكنش قادر يقف على رجله وعايز يكمل ويلعب والاهلى كشفه لما بعته يحترف فى السعودية فى أقوى دوري ورجع فاشل ، وقولتله ياعماد اعتزل واحترم تاريخك.
*وما تقييمك لأداء حسام البدرى مع منتخب مصر؟
البدرى أفضل مدرب تولى الأهلى بعد جوزيه، ولكن مع منتخب مصر قرار وجوده خاطئ، حسام حسن كان الأفضل منه لتدريب المنتخب، لأن المقارنة بينهم ظالمة.. الحق والشرع يمنح حسام حسن الفرصة ولكن مين كان بيقيم ..محمد فضل اللى ملعبش كورة ..مين فضل اساسا !
*كيف ترى أداء محمود الخطيب كرئيس للأهلى؟
من الآخر الخطيب عمره ما نجح إدارياً فى أى مكان، بحبه وبعشقه كرمز ولاعب كرة لكن فى فرق بين الكورة والإدارة، الخطيب فشل فى إدارة الأهلى والدليل أنه مقدرش يدخل جنيه للنادى.
*كيف تابعت نهاية العلاقة بين الإسماعيلى وحسنى عبد ربه؟
الاثنين خسروا بعض، حسنى خد قرار غلط فى وقت غلط، الإسماعيلى وقتها مكنش واقف على رجله وابن النادى لم يترك فريقه فى الوقت ده، إزاى تحس إن الإسماعيلى هيقع فتقرر تخلع وللعلم الاسماعيلى النادى الوحيد اللى فى مصر اللى فيه مبادىء وقيم .
*لماذا تراجع أداء الإسماعيلى؟
لأن المبادئ والقيم خرجت من الإسماعيلى من أول يوم دخل فيه إبراهيم عثمان النادى ، رئيس نادى لا يعرف شيئاً عن ناديه، هو مش صاحب القرار، الحاشية اللى جنبه هيا صاحبة القرار .
*هل تتذكر موقف مع إبراهيم عثمان؟
كان إبراهيم عثمان مشرف على الكرة وكنت كابتن الإسماعيلى وكنا فى رحلة لمباراة افريقية وحققنا الفوز واللاعبين طلبوا منى اقوله عايزين مكافأة بقالنا 8 مباريات مخدناش جنيه روحت اكلمه قالى مش عاجبكوا ارجع بيتكو .
*ما رأيك فى أزمة باهر المحمدى وطلبه الرحيل؟
حقه يطلب الرحيل لأن فى ناس بتاخد فلوس أكتر منه، ورئيس النادى وقفه وسحب منه الشارة وبعدها بأسبوع رجعهاله وشارك أساسى إزاى يحصل ده ؟.. يبقى مفيش عدل فى الإسماعيلى.
*كيف ترى قرار الأهلى برحيل أزارو؟
الأهلى يجيد فن ذبح ولاده، ده مش جديد على الأهلى حصل مع عماد متعب، دى سياسة يديرها عدلى القيعى فى النادى وأحمد شوبير فى الإعلام.
*هل ضمن الأهلى الفوز بدورى هذا الموسم؟
الأهلى كسب الدوري الموسم الماضى بالغصب والتحكيم، ولسه بدرى على الموسم ده لسه الدور الأول مخلصش فى فرق متألقة هذا الموسم زى المقاولون والاتحاد.
*ماذا عن فرص الزمالك فى المنافسة؟
الزمالك عارف إن الدورى بيتاخد منه غصب عنه، وبالتالى اللاعيبة هتركز فى أفريقيا زى السنة اللى فاتت وفرصهم أكبر فى الفوز بدورى الأبطال عن الأهلى.
*كيف ترى أداء فايلر مع الأهلى؟
من أول يوم الاهلى بيحاول يلمع فايلر عشان يكون نسخة من جوزيه، مشفتش منه جملة تكتيكية واحدة،" مدرب فنكوش"، والدليل إن الأهلى خارج ملعبه فى أفريقيا بيخسر وبيظهر فريق تانى، فايلر عمل ميزة واحدة بس للأهلى.
*ما هى؟
خلى سيد عبد الحفيظ مالوش لازمة فى الأهلى قاعد على الكرسى عشان ينفذ تعليمات الخطيب فى الإعلام بس، ولكن سحب منه كل الصلاحيات لأول مرة فى تاريخ الأهلى.
* هل تنصح شيكابالا بالاعتزال؟
شيكابالا لاعب مزاجى، لو عايز تستفيد منه يلعب من أول المباراة وليس بديلا.
*وماذا عن فرجانى ساسى؟
أستاذ، وسر تألقه فى الزمالك طارق حامد وفى غياب طارق حامد بيكون ساسى زى أى لاعب فى الفرقة.
*ما رأيك فى أزمة محمد صلاح الأخيرة؟
حسبى الله ونعم الوكيل فى كل حد بيظلم محمد صلاح، أفضل لاعب فى تاريخ الكرة المصرية، ده رمز وفخر العرب، الكرة المصرية خسرت صلاح وليس العكس.
*هل يستطيع بيراميدز التتويج بالكونفدرالية؟
بيراميدز فى الدوري مختلف تماماً عن الكونفدرالية، فريق عادى حالياً ممكن يتغلب من أى فريق ولكن فى أفريقيا فيه روح شوية للفريق، وخسارة لقب الكونفدرالية تعنى نهاية الجيل الحالى لبيراميدز .
*مارأيك فى أداء محمد عواد مع الزمالك؟
عصام الحضرى ثم محمد عواد هما أفضل حارسين فى تاريخ الكرة المصرية، عواد حارس عملاق نجح فى الدوري السعودى وهو ضحية مؤامرة أحمد ناجى لإبعاده عن المنتخب لصالح محمد الشناوى.
*هل ترى أن محمد الشناوى حارس غير مميز؟
لا يملك المرونة والرشاقة اللازمة لحارس المرمى .. والأهلى عنده مشكلة معندوش قلب دفاع مميز، مش عارف يبنى فرقة، عنده لاعب لا يمتلك القوة والرشاقة ومبيعرفش يلعب برجله اليمين وقصير وبيلعبه فى الدفاع اسمه أيمن أشرف، وطول ماهو موجود الأهلى مش هياخد بطولة أفريقيا.
*ما تقييمك لأزمة أحمد بلال مع مصطفى محمد؟
الأهلى حاول يعمل أسطورة من خالد بيبو بعد رحيل حسام حسن للزمالك ، ولكن مقدرش يكمل بعد نجومية ماتش 6/1 وقع منهم رغم انه لاعب مميز ، فالاهلى حاول يدور على غيره لقى أحمد بلال قالوا بلال أجوال لعب موسم معملش حاجة وجاى يقيم مصطفى محمد ..اللى خلى بلال يقيم مصطفى محمد وهو ملعبش كورة هو اللى خلى محمد فضل يختار البدرى لتدريب المنتخب وهو ملعبش كورة ويتحكم فى الكرة المصرية.
*فى رأيك من الأفضل محمد بركات أم أبو تريكة؟
مفيش مقارنة محمد بركات فلتة من فلتات الكرة المصرية، أبو تريكة قدر يستغل مهاراته وامكانياته لصالح الأهلى حتى أصبح لاعب لن يتكرر كثيراً فى الكرة المصرية.
*من أفضل محترف فى تاريخ الكرة المصرية؟
مصر عمرها ماهتجيب حد فى الاحتراف زى محمد صلاح والثانى هانى رمزى.
*من أفضل محترف فى الدوري المصرى؟
لا يوجد.
*أفضل مدرب فى الكرة المصرية حالياً؟
حلمى طولان.
تم أضافة تعليقك سوف يظهر بعد المراجعة