كشف النجم أمير كرارة عن ردود الأفعال التي تلقاها على مسلسله الأخير "الاختيار"، والذى عرض في موسم رمضان الماضى وحقق نجاحا كبيرا للغاية، حيث أوضح أنه مازال يتلقى ردود الأفعال حتى الآن، كما تحدث عن العديد من الحكايات والكواليس التي عاصرته أثناء تصوير وعرض العمل.
في البداية قال النجم أمير كرارة: إن مصر كلها تحدثت عن مسلسل "الاختيار"، ولكن أنا أول مرة أتكلم عليه بنفسي وعشان أنا بحب أتكلم عنه، متابعًا أن الفن فعلاً بيعلم الناس حاجات، مشيرا إلى الناس تأُثروا بمسلسل "الاختيار" من أول الأطفال الصغيرين لغاية الراجل الكبير، موضحا أن الرسالة وصلت ليهم وفهموها جدًا، وأول مرة أتكلم عن الاختيار معاكِ هنا في البرنامج.
وأضاف خلال لقائه بصحبة المخرج بيتر ميمى في برنامج "صاحبة السعادة" تقديم الإعلامية والفنانة إسعاد يونس المذاع على :Dmc أنا مكنتش متخيل رد فعل اللى في الشارع وبالذات مع الأطفال كان رهيب، والأطفال كلها طلعت من المسلسل عاوزة تدخل الجيش وتلبس بدلة ضابط.
وتابع النجم أمير كرارة، المنسى كانت أكثر شخصية صعبة فى التحضير وقعدت مع الجيش والشئون المعنوية، وقعدت مع أقرب الناس له، وقعدت مع زوجته وأولاده وأعرف تفاصيل عنه، حتى لما بيحكولى عنه كانت حاجات لأول مرة أسمعها فى حياتى، فقعدت مع كل الناس اللى حواليه عشان أعرف أوصل لنص الشخصية حتى لأن محدش فينا شافه.
وأوضح النجم أمير كرارة، إن زوجة المنسى فى التصوير كل ما تشوفنى تعيط، وكنت بطلب منها تبقى بعيد عشان بتوتر لما بشوفها بتعيط، حتى لما جينا نصور مشهد فى القهوة اللى كان بيقعد فيها، على نفس الترابيزة، لما صاحبه رأفت شافنى راح معيط وأنا فى مرة رايح القهوة ولابس كل ملابس الشهيد منسى، وناس كتير صحابه قريبين منه كانوا بيفرجونا بقى على كل حاجة بيعملها.
وعلق النجم أمير كرارة قائلا: أنا مكنتش نفسى لما بلبس بجد في تصوير "الاختيار"، وفى حاجة بتحصل غريبة لما بلبس بدلة الجيش بحس نفسى أختلفت فى وقفتى ومشيتى وطريقة كلامى، وبقيت حاسس أنها عملالى روح غريبة كده فى كل التفاصيل.
وأضاف أمير كرارة قائلا: حلمت بعد رمضان بالشهيد المنسى وكتبت الموضوع ده على فيس بوك، وحكيت أن المنسى جالى وقالى إنه مبسوط وفرحان ولما سألته فرحان فعلا قالى أنا فرحى النهاردة فوق، ويمكن الحلم جالى لأن عيشت كل يوم في الكلام عنه وتفاصيل في حياته بقيت حاسس أنه صاحبى حتى الصورة اللى اتركبت بينى وبينه بقيت حاسس أنها حقيقية.
وتابع، الحمد لله الناس كلها صدقت المسلسل جدا وده أتشاف بشكل كويس جدا، حتى إن ابنه لما كان بيتفرج على المسلسل وفى الحلقة اللى استشهد فيها كان مستنى بيقول يمكن طلقة "السنايبر" متجيش فيه وتعدى.
وأشار إلى أنه تحدث إلى محمد إمام هاتفيا حتى يوجه له الشكر على مشاركته قائلا، أنا كلمت محمد إمام عشان أشكره، فلقيته بيقولى الله يكون في عونك ده أنا من يوم وتعبت، وأنت بقالك 4 شهور الله يعينك.
واستكمل حديثه، العساكر اللى كانوا واقفين في المشهد اللى بشرح لهم في "الاختيار" هنعمل إيه كانوا عساكر بجد وحقيقة مش مجاميع وممثلين، وكانوا في كل مشهد بيسمعونى بجد ومنتبهين جدا وكأنى أنا الضابط، لأن كمان الضباط كانوا مفهمينهم أننا مش بنعمل مسلسل وأن اللى بيحصل ده كأنه بجد وحقيقى.
وقال، أنا لما بتفرج على نفسى في "الاختيار" بستغرب أوى، وأنا المسلسل ده عملى حالة غريبة شوية بسبب المجهود الذهنى والنفسى والبدنى كان كبير أوى، حتى أن الناس مكنتش بتقولى مبروك كانوا بيقولولى ربن يجعله في ميزان حسناتك.
وتابع، مشهد الاستشهاد كان صعب عليا أوى، وقعدت بعدها بفترة مبكلمش حد ومش عاوز أقعد مع حد، وكنت محتاج أقعد في بيتى وسط أهلى شوية عشان أتأكد إنى أمير كرارة مش أحمد المنسى.
من جانبه قال المخرج بيتر ميمى: أنا لما اشتغلت كنت عاوز الناس تحسه وكنت عند أمير في البيت وقت ما جالنا العمل، وفرحت جدًا وبعدين اتخضينا من المسئولية لأنها كبيرة جدًا سواء على الشخصية اللى بنتكلم عنها أو المؤسسة، وعلى فكرة أمير اتبهدل في التصوير وكان بيلبس نص كم في الشتاء.
بينما علق أمير كرارة قائلا: لما كنت بتعب كان بيتر ميمى بيجى يطبطب عليا بالرغم أننا كنا ناقر ونقير في أعمال أخرى، لأن كنت صعبان عليه من كتر التعب ويقولى إحنا بنعمل عمل كبير فيخلينى أنسى التعب وأكمل.
وتابع: مرينا وسط أحداث كورونا ووقفتنا شوية وكان المفروض الخطة إننا نخلص قبل رمضان، ولما دخلنا تصوير تاني كنا مستعجلين ولازم نعمل الحاجة بشكل كويس، والحمد لله كله طلع تمام بسبب مجهود كل الناس اللى شغالين في المسلسل.
ليستكمل المخرج بيتر ميمى حديثه قائلا: فى تحضير "الاختيار" كنا بنشوف أصحاب المنسى ونقعد مع أهله ونشوف الأماكن اللى كان بيقعد فيها ويروحها، وبالفعل كده معانا حاجة حقيقة قوية والمطلوب أننا نصورها بس للناس، فبقينا بنصور كننا بنصور بكاميرا مراسل، واتفقنا على الطريقة دى، وده اللى كان بيدى مصداقية.
وأضاف بيتر ميمى: تفاصيل المعارك كانت مرهقة جدا، وأنك تحرك طيارات ودبابات بالكمية دى وفى الصحراء، كان عشان مشهد ممكن نقعد أسبوعين نجهز له وأمير بيجي الأول يدرب عليه قبل التصوير لأننا كمان مكناش بنصور بالترتيب، وأعرفه كل التفاصيل.
وتابع، الحمد لله أن تصميم المعارك طلع بشكل جيد حتى أن أخويا كان جاى من هولندا وبيقولى وريتهم الأكشن عندنا في مصر، وكانوا مستغربين من مستوى الأكشن في مصر.
وأوضح، ضيوف الشرف اللى شاركوا في "الاختيار" كنت بشرح المشهد لهم وكانوا بيوافقوا بسرعة لسببين، أول حاجة عشان المسلسل نفسه لأنهم بيكونوا عاوزين يشاركوا في أي حاجة تخص البلد وفيها رسالة مهمة، وتانى حاجة عشان وجود أمير كرارة.
واختتم حديثه: الحلقة 28 كانت الناس كلها مستنياها، وخلت الناس كلها عيطت، وأنا حتى لما كنت بجمع المشاهد في المونتاج خلتنى عيطت، مشيرا إلى أن بناء كمين موقعة البرث استغرق شهرا ونصف، وتصوير الحلقة لوحدها تم في 9 أيام.
