اعرف القصة الكاملة وراء شائعة زواج رضوى الشربينى نصيرة المرأة من رجل متزوج

انتشرت أمس السبت عدد من الشائعات التي تزعم زواج المذيعة رضوى الشربيني، من رجل متزوج، وعلى عكس رد فعل رضوى الشربيني في التعليق على الشائعات، حيث تحاول تجاهلها طوال الوقت، لكن رضوى قررت هذه المرة الرد على تلك الشائعة، من خلال لايف على صفحتها بالانستجرام لتوضح حقيقة الأمر، خاصة وأن الشائعة ليست تخصها فقط، حيث قالت رضوى الشربيني "لاقيت إشاعة غريبة جداً ولأنها ما تخصنيش أنا لوحدي طالعة أتكلم، وده للمرة الثانية، وفى المرة الأولي طلع عليا إني مرتبطة بمواطن مغربي اسماً وقولاً، واتقال إني هتجوزه، ودلوقتى لسه طالعة من الاستديو بنفس المكياج طلعت إشاعة غريبة، مش عارفة اتقال ليه، أو يمكن عارفة اتقال ليه في التوقيت ده بالذات".

أنا بجحة كفاية أوي إن أي حاجة اعملها اطلع أقول اني بعملها، لأن الجواز مش عيب وبقول كده في برنامجي على طول اتجوزوا بس اختاروا صح".

وعن سبب ردها قالت: "طلعت رديت لأني رد الحق للناس المحترمة واجب، ولأنى لاقيت وأنا جاية في العربية بعض التعليقات اللى زي ما يكون الناس كانت مستنية أو ما بتصدق، أو أنا مش عارفة.. ليه لما يتقال عليها – الناس اللى بيطلق عليهم مشاهير- حاجة حلوة مش بتتصدق، ولما بيتقال حاجة مش كويسة، بتتصدق وتجرى كده، ربنا يهدي الجميع، ويهدي الشخص اللى فكر يكتب الكلمتين دول، بردو أنا مسامحاك لأني عارفة أنت عامل كده ليه، وواخد من مين علشان تكتب كده، وحياة ربنا، وربنا ما تصدقوش كل حاجة بتتقال، ما تصدقوش كل إشاعة، ما تصدقوش كل كلمتين، علشان احنا بني ادمين، وعندنا اهل وعيال بيضايقوا علينا، وسمعة، احنا يقال علينا مشاهير، بس بنزعل وعندنا ناس بتزعل عليها ربنا يهدي الجميع، دول كلمتين طلعت اقولهم في حق ناس جزمتهم على راسى".

ثم أنهت كلامها بقولها: "لو رضوى الشربيني بتحب هتقول وهاخد رأيكوا زي ما خدتوا رأيي، زي ما بعمل من 4 أو 5 سنين".