حب الاستطلاع الذي زاد في الآوانة الأخيرة بعد زيادة الانفتاح الكبير على السوشيال ميديا جعل الكثيرين يرغبون في تجربة كل شيء جديد، خاصة في المأكولات، بما فيهم الأكلة الشعبية الشرق أسيوية وتحديدا في الصين التى اشتهرت بها، وخصصت بعض المطاعم داخل مصر لتقديمها بأنواعها، والمتعارف عليه أن مكوناتها عبارة عن طحالب وأسماك نيئة.
سوشي بالطحالب
الشباب يقولون رأيهم فى السوشى.. أكلناه غصب:
طرحنا سؤالاً على بعض الشباب من الجنسين عن تجربتهم في أول مرة يتناولون فيها "السوشي" حيث قال أحمد سمير صاحب الـ 30 عامًا أنه ينتمي لمجموعة من الأصدقاء يحبون تجربة كل ما هو مختلف، وممكن أن يقرروا السفر في أى وقت لتجربة أكلة جديدة في أي مكان، أما بالنسبة للسوشي قال: "بالنسبة لي كانت تجربته اول مرة مش مزعجة، كنت مستغرب أن فيه سمك نىء يمكن أكله، لكن لما جربته لقيته لطيف".
سوشي نيء ومستوي
أما محمود محمد 28 عامًا قال: "كنت خارج مع البنت اللي مرتبط بيها وكانت عاشقة للسوشي، وانا معرفوش، اضطريت إني اعزمها على حاجة هي بتحبها، وحرفيا كان شكلي وانا بأكله شبه هنيدي في فيلم فول الصين العظيم وهو بيأكل صراصير"، وعن تجربة تناوله أول مرة وعن إمكانية تكراراها قال: "مستحيل، انا دلوقتي خاطب نفس البنت وأول شرط عليها أن مفيش سوشي ابدا، لو هي حابة تأكله لوحدها".
"كفاية بقى اللي جرالنا من الصين" هكذا بدأ حديث جمال محسن الشاب الثلاثيني حيث قال: "البنات غالبا هما اللي بيحبوا النوع ده من الأكل، والرجالة بتأكل أي حاجة مدام جعانين، لكن أنا عن نفسي عمري ما هأكله، انا عندي الفسيخ أهون" ، وتابع: "خطبت 3 مرات وكل مرة بتكون أول عزومة في مطعم سوشي، كأنهم متفقين مع بعض، لحد ما جاتلي عقدة منه ومن اسمه حتى".
فول الصين العظيم
البنات الأكثر عشقاً للسوشي.. "اللى ميعرفش السوشى يقول نى":
جاء رأي الفتيات مختلف بعض الشيء فكانت غالبيتهن يعلمن جيدا بمكونات السوشي وحتى طرق تحضيره، فقالت آية محمود صاحبة الـ 25 عامًا أن السوشي من أكلاتها المفضلة "واللي يقولك سمك نيء ميعرفش ايه هو السوشي، منه بيتعمل بسمك مستوي عادي جدا"، وتابعت: "أول مرة أكلته غرقته بالصلصة الحارة الخاصة بيه عشان اخفي طعمه، بعدها بقيت مدمناه".
سوشي
رانيا أشرف 30 عامًا قال: "انا من حبي في السوشي هعمله في بوفيه فرحي" موضحة أن خطيبها لا يشاركها في أكلتها المفضلة ولكنه يحاول أن يرضيها قائلة: "تقريبا بياكل غصب عنه، وبقيت كل اما يزعلني أطلب انه بغديني سوشي عشان اقعد اكل وهو يقعد يتفرج عليا".
السوشي
اما عن سما رضوان 26 عام قالت: "مليش في السوشي خالص، لكن بحب الأكلات الصينية كلها، خاصة السويت أند ساور"، وتابعت ان بعض الفتيات يتحدثن عن هذه الأكله وكأنها نوع من الرقي الاجتماعي قائلة: "في بعض منهن بتكون مش بتحب السوشي بس عشان تبان شيك وبنت ناس بتطلبه" وتابعت: "الأكل اذواق مش هجبر حد يحب أكله انا بحبها بالغصب او حتى عشان يرضيني، جرب مرة معجبكش متكلهوش تاني وخلصت".
تم أضافة تعليقك سوف يظهر بعد المراجعة