السيدة انتصار السيسى لـ"إسعاد يونس": فخورة بمكاسب المرأة المصرية وتشجيعى دائم للشباب.. ببكى لما بيحصل حاجة فى البلد وأمهات الشهداء أبطال.. والرئيس يسعى لإسعاد الناس.. صور وفيديو

أبدت السيدة انتصار السيسي، حرم الرئيس عبدالفتاح السيسي، إعجابها بمعرض "تراثنا"، مؤكدة أن "هناك طفرة بالنسبة للشباب من حيث المشروعات المتعلقة بالإكسسوارات والشنط والرسومات على الملابس، وأحب تشجيعهم للابتكار بشكل أكبر، وأتعمد التعامل معهم وهذا ما يظهر فى مؤتمرات الشباب العالمية والدولية، حيث التقى بهم وأرى آخر تطوراتهم".

وأضافت حرم الرئيس السيسي، خلال حوارها مع الإعلامية الكبيرة إسعاد يونس، عبر فضائية "DMC":"بحب المفارش.. والمقتنيات الرمضانية لها طقوسها الخاصة، بحب الأشياء التى تناسب هذه المناسبة السعيدة، من حيث الرسومات والأطباق المميزة التى تستمر معنا طوال الشهر".

كما علقت على اهتمام الرئيس بالمرأة المصرية، بشكل مختلف جدًا من حيث التمكين وإتاحة عدد كبير من مقاعد المرأة فى مجلس النواب، قائلة : "سيدات مصر حوالى 48 مليون و500 ألف سيدة ، بنسبة 48.5%، يمثلن الأم والأخت والأبنة والجدة، وأنا كسيدة مصرية فخورة جدًا بحصول المرأة على  8 حقائب وزارية بنسبة 24% من وزارات الحكومة، وفخورة بحصولهن على 90 مقعدا فى مجلس النواب، سعيدة بذلك وبحجم التغيير".

السيدة انتصار السيسى تكشف سر خاتم الرئيس

قالت السيدة انتصار السيسى، حرم الرئيس عبدالفتاح السيسي، إن "أسرة الرئيس كانت تقيم فى الجمالية، فى شارع الجيش.. وهو من الأحياء الشعبية حيث الأصول والمحبة والجيرة.. والجيران كان لها وضع خاص بالنسبة لكل الدنيا، ولو فيه مناسبة سعيدة كلهم يتكاتفوا ويقفوا مع بعضهم، وكذلك فى المناسبات غير السعيدة.. وهذه الأمور ضمن الأشياء التى أثرت على الرئيس فى الحكم على المرأة المصرية بطريقة مختلفة، حيث يرى أن الست المصرية بتتعب وتشقى، وأمنية حياتها تشوف ولادها سعداء.. ولا تفكر فى نفسها بل فى إن الأسرة تكون سعيدة".

وعن دبلة الخطوبة، قالت حرم الرئيس السيسي: "لازلت ارتدى نفس الدبلة.. والرئيس يرتدى خاتما بدلًا من الدبلة حصل عليه من والده فقد كان لديه محلات فى الخان وكان هناك محلات فضة كثيرة .. واختار له خاتم جميل".

حرم الرئيس السيسي: "ببكى لما يحصل حاجة فى البلد.. وأمهات الشهداء أبطال"

ردت السيدة انتصار السيسي، حرم الرئيس عبد الفتاح السيسي، على تساؤل الإعلامية إسعاد يونس "امتى بتبكى؟"، قائلة: "ببكى لما يحصل حاجة جامدة فى البلد وشهداء وكده، دى بتخلى الواحد فعلا يبكى أوى، لأنى أم، وعارفة يعنى إيه أم تفقد ابنها بصراحة بتبقى حاجة كبيرة جدا، وخصوصا فى مناسبات أعياد الشرطة والقوات المسلحة، الواحد بيسمع قصص، والسيدات دول أبطال"، وأضافت: "السيدات دول أبطال عشان قدموا أبطال".

من ناحية أخرى، أشارت السيدة انتصار السيسى، إلى أنها اشترت أشياء كثيرة من معرض تراثنا، مضيفة: "لأنى كنت سعيدة بهم جدا، وكان عندهم تحفظ شوية إنهم يتنقلوا من مكان لمكان بسبب الصعوبات اللى بتقابلهم، وكل الصعوبات دى خلاص مبقتش موجودة، ممكن يشتغلوا من خلال بيتهم وحد يتواصل معهم، ويعرضوا الحاجة، ودى بتديهم دفعة كبيرة جدا جدا إننا بنروح المعرض، ونشوف قد إيه بيعجبنا منتجاتهم، وتلاقى كل الناس بتشجع المنتجات دى".

السيدة انتصار السيسى: الرئيس كان يسعى لإسعاد الناس.. والحمد لله حقق المعادلة الصعبة

قالت السيدة انتصار السيسي، حرم الرئيس عبدالفتاح السيسي، إن أهم شىء بالنسبة للرئيس كان سعادة وفرحة الناس، مستطردة: "أهم حاجة يشوف سعادة الناس مما يقدمه من أعمال، وفعلًا الحمد لله استطاع تحقيق المعادلة الصعبة فى توفير الخدمات للناس وخاصة متوسطى الحال".

وأضافت حرم الرئيس السيسي: "لما كنا بنخرج كان يتحدث عن الإسكان، ويتمنى حدوث نقلة.. والأمر مش موضوع عمارة، لكنه كان يتمنى مجمع سكنى تسكن فيه كل الناس التى تحتاج لذلك والحمد لله تحقق حلمه.. هذه الأشياء طالما سمعتها منه من قبل".

حرم الرئيس السيسى: بحب أم كلثوم وفايزة أحمد لها غلاوة خاصة

قالت السيدة انتصار السيسي، حرم الرئيس عبدالفتاح السيسي، إن الأعمال الكوميدية متميزة فى الفن المصرى، مشيرة إلى أن المواطن المصرى لديه أعباء ودائماً مسئول، ولذلك تخفف الكوميديا عليه، وتابعت: "تقريبًا نكاد نحفظها".

وعن الغناء، أضافت حرم الرئيس السيسي، أنها تفضل سماع السيدة أم كلثوم وعبد الحليم حافظ ووردة، وتابعت:" فايزة أحمد لها غلاوة خاصة.. وأغانى أم كلثوم جميعها عظيمة، ودائماً ما كانت الأسرة الكبيرة تلتف حول أغانيها".

وعن المقرئ الذى تفضل السماع له، قالت إن مصر بها كثيرين مثل الشيخ مصطفى إسماعيل والحصرى والطبلاوى والمنشاوى، وتابعت: "جميعهم أفاضل وأصواتهم جميلة جداً والعالم العربى كله بيسمعهم..أحب الحصرى فى الآذان".

وتابعت حرم الرئيس السيسى: "قناة مصر قرآن كريم بها جميع الأصوات الجميلة التى يحبها الجميع، وتعد فكرة جميلة جداً".

حرم الرئيس السيسي: "لما بنقوله الناس فرحانة بالإنجازات يقول لسة معملتش حاجة"

قالت السيدة انتصار السيسي، حرم الرئيس عبدالفتاح السيسي: "بشكر ربنا عليه، وإن شغله الشاغل بلده، يحبها جدًا ويحب ناسها، ويسعد جدًا حينما تكون الأمور ماشية كويس فى كل حاجة، ولما بنقوله الناس فرحانة بالإنجازات يقول لسه معملتش حاجة".

وأضافت حرم الرئيس السيسي: "أتمنى ربنا يوفقه ويعمل كل اللى يتمناه.. ربنا يوفقه ويحقق كل أمنياته لبلدنا وشبابنا وشباتنا وكل سنة وكلنا طيبين".

السيدة انتصار السيسى: هموم الدنيا كلها بتتشال لما يشوف أحفاده البنات

قالت السيدة انتصار السيسي، حرم الرئيس عبدالفتاح السيسي، إن الأحفاد بالنسبة لها وللرئيس السيسى أجمل شىء فى الدنيا، قائلة: "بالرغم من الأعباء الكثيرة التى يحملها ويحمل همومها، بمجرد ما يدخل البيت ويلاقيهم حواليه وكلهم بيبقوا فعلا ربنا بيبعتهم علشان يخففوا عنه، وخصوصا إن معظمهم بنات وهو بيحب البنات ودى بالنسبة له سعادة تانية".

وأضافت حرم الرئيس السيسي: "أيام زمان ماكنش عندنا مشكلة تعتبر فيها أرق، والحياة كانت جميلة وبسيطة، وهو كان متعود يعتمد على نفسه، وكان حاطط خطة لنفسه، وقالى ساعدينى فيها علشان عايز أعمل نفسى بنفسى، وهو كان حاطط خطة قدامه اللى هو السفر لأن فيه نقلة من الناحية العلمية وكان بيتمنى أنه يسافر".

وقالت السيدة انتصار السيسي: "سافرنا إنجلترا سنة 1991 وهو ملحق عسكرى فى السعودية، وبعد كده سافرنا أمريكا، وكانت ابنتى آية فى ثانوى، والمراحل دى كانت جميلة وناجحة، وأنا بحس إن السفريات دى ناجحة، وهو حقق فيها نجاحات كبيرة فى الدراسة، والغريبة إنه حتى المدرسين لما كنا بنبقى فى أى لقاء، يقولولى قوليله يخرج ويتفسح ويشوف الدنيا مش لازم كل حاجة فيها دراسة، لأنه كان مجتهد جدا وليه طريقة معينة لازم تبقى فيها المحاضرات واضحة بطريقة لدرجة إن زمايله كانوا بيحبوا يطلعوا عليها من أيام الكلية الحربية"، مضيفة: "أكتر وقت بيحبه ويفرحه لما يكون فيه إنجاز ويسعد الناس، ومفيش حاجة بتفرحه فى الدنيا غير لما يشوف الناس كلها مبسوطة".

السيدة انتصار السيسى: الرئيس كان يجمع العائلة للتمشية بعد صلاة الفجر وعلمهم حب الرياضة

قالت السيدة انتصار السيسي، حرم الرئيس عبدالفتاح السيسي، إنها كانت تتعامل مع أفراد الأسرة على قدر الحدث وبتعاون تام مع الرئيس، وتابعت: "هو قال لى أحب أننا نكون على خط واحد.. ومينفعش أن فيه حاجة تحصل فى الأسرة ميكنش عارف بيها علشان يوجه ليهم النصيحة.. ولذلك كنا على قدر الحدث".

وأضافت حرم الرئيس السيسي، أن "صبيان العائلة كان يقدرون الرئيس.. كانوا بيعملوا ليه ألف حساب.. وهو كان شديد على الصبيان.. هو عقابه كان مجرد رتم الكلام.. هما بيعملوا ألف حساب لأنه مش موجود معانا كل الوقت فهما كانوا بيخافوا ليزعل".

وتابعت حرم الرئيس: "كان يجمع كافة أفراد العائلة ويتمشوا بعد صلاة الفجر أمام مكتبة الطفل فى مدينة نصر، لدرجة أن الناس اللى كانت تتمششى معانا كانوا فاكرين أن كل دول أبنائه من كتر اللى ماشى معاه.. وبيعلمهم إزاى يحبوا الرياضة.. وبداية اليوم كان فيها نشاط".

السيدة انتصار السيسى: الرئيس لم يتغير منذ إن كان ضابطاً وحتى الآن

قالت السيدة انتصار السيسى، حرم الرئيس عبدالفتاح السيسي، إن الرئيس لم يتغير مطلقاً منذ أن عرفته حتى الآن، وتابعت: "بحمد ربنا على هدية سيادة الرئيس.. وعمره متغير من وقت ما كان ضابط صغير حتى الآن"، وأضافت حرم الرئيس السيسي، أن تاريخ 19 نوفمبر له مكانة كبيرة لديها.

السيدة انتصار السيسي: عشت أحداث مسلسل الاختيار.. وليالى الحلمية سابت أثر طيب فى حياتنا

قالت السيدة انتصار السيسي، حرم الرئيس عبد الفتاح السيسى: "إحنا عندنا حاجات كتير أوى جميلة.. وعندنا مسلسلات درامية جميلة.. وأفلام جميلة.. وبرامج حلوة.. وأحنا تقريبا بنتفرج على حاجات كتير جدا فى التليفزيون".

وأضافت حرم الرئيس السيسي: "لما بنكون كلنا مع بعض بنتفرج على الحاجات اللى بتبقى موجودة قبل الغدا أو بعده، أو قبل العشا، لما يكون فيه فيلم حلو ممكن نتجمع ونتفرج كلنا عليه".

وتابعت السيدة انتصار السيسي: "ساعات بتتفرجى على حاجة بتديكى طاقة إيجابية، كل المسلسلات اللى عدت أيام زمان، وليالى الحلمية سابت أثر طيب فى حياتنا، والغريبة إنك تلاقى كل المصريين كأسر كلهم بيتفرجوا، وعندهم نفس الرتم.. وقت تتجمع فيه الأسرة عشان تتفرج، زى ما حصل فى رمضان اللى فات، في مسلسل الاختيار، وكان حاجة كويسة جدا وخلى الناس كلها تتجمع في وقت وتتابع وتعرف إن الدنيا كانت ماشية إزاى، رغم إن ممكن يكون أحداث المسلسل دى عشتها كلها بكل تطوراتها، لكن مجرد إن الواحد يشوفها قدامه له طعم تانى".

السيدة انتصار السيسى: الرئيس يجمع بين صفات طيبة كثيرة وتعلق بوالدته

أكدت السيدة انتصار السيسي، إن "الرئيس السيسى يجمع بين صفات طيبة كثيرة جدًا، وممكن دموعه تنزل فى أى موقف.. وإزاى هو بالشخصية دى والحنية دى؟..  ورأينا تأثره فى موقف الفتاة الفتاة الإيزيدية، وكذلك تأثره بوفاة والدته".

وأضافت حرم الرئيس السيسي، خلال حوارها مع الإعلامية الكبيرة إسعاد يونس، عبر فضائية "DMC"، كان متعلقًا بوالدته ويحبها جدًا وهي كذلك بسبب عدم تواجده بسبب ظروف شغله.. وحنيتها عليه كانت بزيادة.. وخد الحاجات الجميلة منها.