حاورت كاميرا فيديو 7 الفنان الصاعد حمادة صميدة بعد تعرضه للتنمر وموجة من السخرية على مواقع التواصل الاجتماعى، قائلا: "تعرضت لأذى كبير من تنمر البعض عليا وجها لوجه لدرجة أن واحد قالى شكلك وحش وسنانك عايزة سمكرة.. دى خلقة ربنا سبحانه وتعالى.. وأنا راضى وفرحان بيها ومحدش ليه فى نفسه حاجة".
وأضاف: "أنا بضحك الناس وجوايا جرح كبير بعد موت ولادى قدام عينى بعد ما تعبوا فجأة وجريت بيهم على المستشفيات ومحدش كان حاسس بيا، وفى الوقت ده كنت بطلع وبضحك الناس لأنها ملهاش ذنب باللى أنا فيه".
وتابع: "أنا إنسان بسيط جدًا ومش غنى وعايش فى منطقة شعبية فى شقة إيجار، خرجت من محافظة الفيوم، وأنا شغال بياع أنابيب كنت بطلع لحد الدور الـ ١٢ شايلها على كتفى عشان لقمة العيش وعمرى ما خجلت من مهنتى ديه ولو جار عليا الزمن هرجعلها تانى لأن الشغل مش عيب".
واستكمل: "حطيت قدام عينى هدف وحلمت أنى أمثل، وروحت وسعيت كتير على الحلم ده لحد ما ربنا حققهولى وبقيت ممثل وكوميديان، أنا بحب كل الناس وعمرى ما أذيت حد ونفسى الناس تسيبني فى حالى لأن شكلى ده خلقة ربنا عز وجل" .
تم أضافة تعليقك سوف يظهر بعد المراجعة