قال النجم أمير كرارة: "أبويا طول عمره بيتباهى بينا باللى كنا فيه، وربّانا كلنا كويس أنا واخواتى، وكلنا شباب كويسين ومفيش حد أخلاقه بايظة، واحنا كمان بنتباهى بأن أبونا محمد كرارة". وأضاف خلال لقائه في برنامج "السيرة" تقديم الإعلامية وفاء الكيلانى المذاع على dmc: "آخر نجاح أبويا شافه ليا كلبش الجزء الأول، ودى كانت أعلى نقطة وصلت لها، وكانت النقلة وهو حضر النقلة الكبيرة دى، وأمى ملحقتش تشوف أى حاجة.
وأكد النجم أمير كرارة: "ساعات بكذب بس مش كذب مؤذى، بتكون حاجات بسيطة لطيفة لما بكون مضطر اللى بيقولوا عليها الكدبة البيضة". وأضاف كرارة، خلال لقائه برنامج "السيرة" مع الإعلامية وفاء الكيلانى المذاع على قناة dmc: "بفتكر مرحلتى وأنا في النادى في التمرين وكنت بلعب كرة طائرة وكنت في منتخب مصر، فكنت طول اليوم بتمرن، غير إن والدتى كانت بتجيبلى الغدا في الجنينة عشان أكمل تمرين تانى، لأننا أنا وأخواتى كنا بنحب طبيخ أمنا".
وتابع كرارة: "وأنا صغير أحيانا بفتكر مشهد بكون في وسط العيلة لما والدى بيرجع من المحل ويفرحنا إنه باع حاجات بألفين جنيه، وكنا كلنا بنتلم على السرير ونقسمهم على بعض وكل واحد يعد".
واستكمل: "بفتكر كمان والدى لما كان بيجيبلنا البطيخ حوالى 50 بطيخة ونحطهم تحت السرير، وكنا بناكلهم علطول لأننا كنا شباب رياضيين، فكانت والدتنا بتتعب معانا في موضوع الأكل ده، وعشان كمان أمى كانت أكلتها المفضلة جبنة بيضة وعيش بلدى وبطيخ، فكانت موجودة عندنا أكتر من اللحمة وفعلا كلنا بنحب البطيخ جدا".
وقال النجم أمير كرارة: "في طفولتى كنت مثلا أطلب فلوس من والدى واقوله عاوز 25 جنيه فيقولى روح خد من البنطلون، فأنا ألاقى شوية فكة زيادة فاخدهم، لكن والدتى مكنتش بتدينى فلوس بالساهل، كان لازم تقايضنى ولازم أعمل مقابل الفلوس أي حاجة".
وأضاف أمير كرارة، خلال لقائه في برنامج "السيرة" تقديم الإعلامية وفاء الكيلانى: "كان عشان والدتى آخد منها فلوس لازم أشترى ليها حاجة أو أغسلها المواعين، وبقيت بحب أغسل المواعين وحاليا ساعات بعمل كدة وأنا كبير، حتى لما باكل في طبق بقوم أغسله بنفسى أحيانا".
وتابع: "في مرة واحنا صغيرين واحدة شافت لوالدتى الفنجان وقالتلها إن هاييجى يوم ومصر كلها هتشاور على ابن من ولادك اللى بيبدأ بحرف الألف فكان يأما أنا يأما أحمد، ولكننا لم نهتم بهذا الحديث، ولكن أخدت بالى بعد كدة لما ابتديت أشتهر وكلمت أحمد وقلتله فاكر، فقالى أه يابن اللذين طلعت أنت".
واستكمل: "كان عندى فى مرة كربونات الصوديوم لأنى بحب ألمع الفضة ووالدى لما شافها افتكرها بودرة وكمان أنا كنت مقسمهم في أكياس صغيرة فكان شكلى كأنى بتاجر مش بتعاطى بس، وزعقلى وقتها وحلفتله إنها كربونات وقتها".
وأشار كرارة إلى أن فترة الطيش والصياعة في فترة شبابه كانت عبارة عن التأخير فى اليل والسهر عند الكشك لغاية 3 الفجر وشراء سجاير فرط".
وقال النجم أمير كرارة، وأنا شاب كنت بلبس ونتقابل انا وأصحابى ونقف عند مدرسة البنات اللى جنب البيت ونستناهم بقى وهما داخلين وهما خارجين، ومكنتش بروح مدرستى أو أروح متأخر شوية.
وأضاف خلال لقائه في برنامج "السيرة" تقديم الإعلامية وفاء الكيلانى، المذاع على قناة dmc، درست سياحة وفنادق بسبب المجموع بتاع الثانوية العامة لأنى جيبت 51 %، فكان لازم ادخل معهد خاص ويكون 4 سنين، واللى شجعنى على السياحة عمتى كانت متجوزة حد أجنبى وكانت مرشدة سياحية فكان الموضوع عاجبنى شوية
وتابع، امى كانت حنينة وطيبة على أولادها وأنا شبهها جدا وزيها مبعرفش أزعل ولادى، ورغم طيبتها كانت علاقتنا انا وهى زى القط والقار، لأنها كانت بتخاف عليا عشان كنت شقى جدا.
وأستكمل، كنت بعرف كل الناس وكل الفئات وكل الأعمار وأعرف الكويسين وغيرهم، ووالدى في مرة طرد ناس صحابى لأنهم كانوا مش تمام.
قال النجم أمير كرارة، أنا كنت أقرب واحد لوالدى وأحمد أخويا أقرب حد لوالدتى، وهى كانت طيبة جدا ومكنش عندها حاجة في حياتها غير الطبح والسوق وأنها تراعى ولادها وبس
وأضاف خلال لقائه في برنامج "السيرة" تقديم الإعلامية وفاء الكيلاتى المذاع على قناة dmc، أمى كانت بتصعب علينا من كمية الشغل والضغط عليها لان كان حمل كبير عليها خمس ولاد، واكتر حاجة مفتقدها وقت الغدا مع امى، وكان مشكلتى معاها افى الاكل إنى مش باكل أى حاجة فكان عندى مشكلة كبيرة في البامية مثلا لأنى مكنتش بحبها.
وتابع، دلوقتى بقيت بحب البامية والسبب، أن اخر حوار بينى وبين أمى قالتلى خلى بالك من اخواتك ، ووقتها لما جه أكل المستشفى فبفتح كده عشان أقولها كلى انتى بس وهاتبقى كويسة، ولقيت الأكل في بامية فراحت ضحكت وقلتلها بس قومى بالسلامة وأنا هاكلها، ومن وقتها بقيت باكل البامية لأنها بتفكرنى بأمى
وروى وقت مرض والدته قائلا، في يوم والدتى راحت للدكتور لما تعبت، وكلمتنى في التليفون وهى هناك وكانت الموبايلات لسه نازلة جديد وقالتلى كلمة مقدرش أنساها وهى "أنا عندى سرطان يا أمير وقعدت تعيط"، ووقتها كنت فى البيت، والكلمة اللى قالتها كانت صعبة أوى، فقلتلها تعالى بس وربنا يسهلها.
وتابع، بمجرد ما قفلت السماعة قعدت أعيط واحمد دخل عليا وقلتله فقعد كمان يعيط، وكلمت والدى وأتصدم لأننا كلنا مش عارفين هنعمل ايه بعد كده، ولما رجعت حسسناها ان احنا عادى وان هتبقى كويسة ولكن هي كانت مخضوضة جامد، والمرض مطولش معاها، الله يرحمها.
وأختتم حديثه عن والدته، كانت بتدعيلى تقولى روح يابنى ربنا يفتحها في وشك، وما زلت بسمعها في ودنى ساعات وأوقات لما بشوف أي ست كبيرة بروح أراضيها مخصوص عشان أسمع منها الكلمة دى.
وقال النجم أمير كرارة، أنا مش بحب القراءة ولكن بحب الحكاوي، حتى في سيناريو الأفلام والمسلسلات اللى بعملها بتتحكيلى الأول كذا مرة وبعد كده أقراها عادى مش مشكلة.
وتابع، خلال لقائه في برنامج "السيرة" مع الإعلامية وفاء الكيلاتى، المذاع على قناة dmc، صور دموعى في فرح أختى دى ولا حاجة، أنا حرفيا كنت عامل زى العيل الصغير ومكنوش عارفين يخلونى أسكت، لأن نورا من صغرها ملحقتش تشوف حنية أبوها ولا أمها وكانت بتبقى صعبانة علينا أوى رغم اننا كلنا حوليها
وأضاف، اختى مجنونة وعصبية شوية فنصحتها تهدى بقى وقلتله هو كمان حافظ عليها لأننا كلنا تعبنا في البنوتة الصغير دى فخلى بالك منها وحطها في عينك، والصراحة هو شاب كويس ومحترم جدا.
وقال كرارة، وانا صغير حبي كتير أوى زى ما بيقولوا ماشى بحب على نفسى كل لما أشوف واحدة أحبها، ولكن لما كبرت حبى الوحيد هي مراتى وبموت فيها جدا، وأنا وعدتها أن عمرى ما أخليها لا هي ولا ولادى يزعلوا، وهافضل طول الوقت أقولها إنى عايش عشانكوا وبعمل كل حاجة عشان تكونوا عايشين مبسوطين.
تم أضافة تعليقك سوف يظهر بعد المراجعة