كهربا يطلق تصريحات نارية بعد إحراز أول أهدافه بالدورى مع الأهلى.. كنت حاسس إن معمولى سحر فى الزمالك.. وهذا سر الرحيل.. أنا مش بتاع مشاكل وطلبت من موسيمانى يعاملنى كويس.. وإمكانياتى تؤهلنى للعب بجوار صلاح والننى

حاسس معمولى سحرفى الزمالك 

وقال كهربا، "فى الزمالك كنت مؤمن بالسحر وبخاف جداً، وكانت بتحصل معايا حاجات غريبة، وكنت حاسس إن حد عاملى عمل، وكان فى مواقف كتير مش فاهم فيها نفسى، والدنيا دلوقتى أحسن بكتير.

مش هلعب كرة بعد رفضى فى ناشئى الأهلى

وكشف كهربا أنه قرر عدم ممارسة كرة القدم بعد رفضه بالأهلي فى سن 9 سنوات، ولكن ذهب مرة أخرى، قائلا، "ونجحت فى أول اختبار، وبدر رجب مدرب الناشئين السابق فى الأهلي طلب مني السفر للنمسا ولعبت بطولة هناك وسجلت 11 هدفا فى 5 مباريات وكان معى تريزيجيه وكان منافسا لى دائما فى الناشئين".

سر اسم كهربا

وأضاف كهربا، أن بدر رجب أطلق عليه لقب كهربا لأن اللاعب كان لا يحب الهزيمة فكان  يحاول عمل أى حاجة ومن وقتها اشتهر بهذا الاسم.

مش بتاع مشاكل

وتابع كهربا فى تصريحاته، "الناس واخدة عنى فكرة غلط بأنى مثير للمشاكل، ولكن والله أن كل المشاكل اللى بتحصل لى مش بيكون لى دخل فيها وأنا إنسان عفوى".

أكثر لاعب اتشتم من الجماهير

وأضاف لاعبب الأهلى، "أنا أكتر لاعب اتشتمت من جماهير الزمالك وكنت أبقى لسه جايب هدف وألاقى مجموعة أولاد صغيرين بيشتمونى فى المدرجات، وسبب خلافى مع مرتضى منصور، إنى قبل مباراة الأهلى والزمالك فى برج العرب جاء المستشار مرتضى منصور إلى التدريبات ومعه عدد من نجوم الزمالك وقال لى "وأنت بقى يا عم كهربا لو حد شتمك بأمك أو أبوك ما تردش، وبعد الاجتماع تحدثت معه وقلت له لو سمحت شيل الجزء ده من الفيديو لأن أبويا وأمى بيتفرجوا عليه وأنا مش عايزهم يسمعوا الكلام ده".

صعبت عليا نفسى فبكيت

وكشف محمود عبد المنعم كهربا عن سر بكائه بعد تتويج الأهلى بلقب كأس مصر، بعد الفوز على طلائع الجيش بركلات الجزاء الترجيحية بنتيجة 3/2، قائلا، "بكيت لأن هذه الكأس  الخامسة بالنسبة لى بعد ما توجت بها مرة مع إنبى و3 مع الزمالك ومرة مع الأهلى، وهو رقم  قياسى وكل بطولة مع الأهلى لازم نكسبها، وكان فى ضغوطات كبيرة وصعب عليا نفسى".

إمكانياتى تسمح للعب بجوار صلاح و الننى

وأضاف كهربا، "إمكانياتى تسمح لى باللعب فى الدورى الإنجليزى إلى جوار صلاح والنني، والننى أقرب لى مع محمد صلاح الذى لا أتواصل معه، وعقلية محمد صلاح على التحمل جعلته فى المكانة التى هو فيها".

طلبت من موسيمانى يعاملنى كويس

وتابع كهربا، "قلت لموسميانى أول يوم له فى التمرين إنى ممكن إمكانياتى ما تأهلنيش للعب لكن عاملنى بس كويس أهم حاجة نفسياً، ومن وقتها فعلاً عاملنى بشكل كويس".