رامى صبرى باكيا خلال حديثه عن عامر منيب: كان بيفرق فلوسه على الناس (فيديو)

الإثنين، 21 ديسمبر 2020 09:30 ص

كتب: بهاء نبيل وعادل عبد الله تصوير السعودى محمود

اضف تعليقاً واقرأ تعليقات القراء

حكى المطرب رامى صبرى عن تجربته مع النجم الراحل عامر منيب، حيث تحدث عن بداية تعارفه به وبعض الكواليس والأسرار التى جمعتهما، وقال رامى خلال ندوته بقسم الفن: "عامر منيب الله يرحمه أول واحد لحنت له فى 2003، اتعرفت عليه من الموزع طارق توكل، وكنت رايح أقوله عاوز أعمل ألبوم، وأنا قاعد معاه وبسجل أغنية اسمها "ليالى" من ألحانى، مشيت، لقيت عامر منيب جه وسمع الأغنية دى فقاله حلوة أوى.

وأضاف خلال ندوة تكريمه بموقع "اليوم السابع"، تانى يوم وأنا بسجل أغنية تانية فى الاستوديو عند طارق توكل، جه عامر منيب وقالى أنا عاوز الأغنية دى تكون "الهيد" بتاع الألبوم اللى هو كان اسمه "الله عليك"، وطلب منى أعمله التنازل بكرة وقلت له حاضر وإدانى وقتها 3 آلاف جنيه، وروحت جيبت لأمى وقتها هدية.

وتابع: أنا انبسطت جدا وقتها لأنى اشتغلت مع عامر منيب كان وقتها نجم كبير، وعملنا مع بعض أغانى كتير أنا أكتر ملحن لحنت له أغانى، وكان عددها 13 أغنية، وعامر منيب كان طيب أوى وطول ما هو قاعد فى الاستوديو يجيب أكل وحاجات، وأنا مش شايف إن فى حد زيه لأنه من أحسن المطربين كإنسان.

واستكمل رامى صبرى، أنا كنت بحب عامر منيب أوى وأنا أكتر واحد زعلت عليه، وكان إنسان فعلا ومش عايش فى دور مش بتاعه، ويعنى مثلا فى مرة كنت معاه فى العربية ودخل محطة بنزين ولقيته بيدى لعمال المحطة فلوس بالمئات فاستغربت وقلتله ليه كل ده، أنت لو اديته 20 جنيه هينبسط جدا، ويقولى أنت عارف الـ100 جنيه دى اللى اديتهاله، وأجهش بعدها رامى صبرى فى البكاء وانقطع عن استكمال الموقف بعد تأثرها بتذكر صديقه المطرب الراحل عامر منيب، لتكون أول مرة يبكى رامى صبرى أمام عدسة الكاميرا تأثرا بالراحل.

وكرمت مؤسسة "اليوم السابع" المطرب رامى صبرى على مشواره الفنى الحافل بالأغانى المتميزة، وسلمه درع التكريم الكاتب الصحفى خالد صلاح رئيس مجلسى إدارة وتحرير "اليوم السابع"، وأعرب رامى عن سعادته البالغة بهذا التكريم.

واستقبل رامى صبرى فى زيارته لـ"اليوم السابع"، الكاتب الصحفى عمرو صحصاح رئيس قسم الفن، والذى أجرى معه حوارا سريعا وموسعا، تحدث خلالها صبرى عن أغانيه الأخيرة التى لاقت نجاحا كبيرا منها "حياتى مش تمام"، حيث ربط الجمهور كلماتها بشكل ساخر بينها وبين أزمة كورونا التى ظهرت فى العالم منذ بداية شهر مارس الماضى بالتزامن مع طرح الأغنية، حيث تقول كلماتها: "بروح كتير أماكن وأشوف ناس كتيرة، ومبجيبش سيرة عنك ف الكلام.. قاطعت خلاص معارفك، وكل اللى عارفك، ومبقاش فيه بينا سلام أو كلام.. ده أنا خاصمت الشوارع اللى مشينا فيها عشان يهدى بالى وأرتاح من الآلام".

وعقب اللقاء التليفزيونى الذى أجراه رامى صبرى لتليفزيون اليوم السابع، أجاب على العديد من الأسئلة التى أجراها معه الزملاء فى قسم الفن.

وأجرى نجم الغناء جولة داخل صالة تحرير "اليوم السابع"، واستقبله الزملاء بالأقسام المختلفة والتقطوا معه الصور التذكارية.