كيك الفانليا والشيكولاتة طعمهم مفرح وجميل وخصوصا لو معاهم مشروب ساخن لذيذ، معرفش ليه ربطت بينهم وبين ناس معرفه !!! خلال إجازة الدولة للمدارس والجامعات لاحظت عمقا شديدا فى أفكارى بعد البعد عن الحياة اليومية المزدحمة ودوشتها بربط حجات غريبة ببعض، يمكن بسبب البيجاما الجديدة التى ارتديها (رأى بنتى ...من ساعه ملبستيها يماما وانتى فيلسوفه، أصل أنا جمعت الاولاد فى قعدة وقسمت الناس فى حياتنا فى ظل الاحداث اليومية من أخبار وباء كورونا وهلع العالم، وخلال تعامل الناس معاها لقسمين؛؛ ناس إيجابية شبه كيك الفانليا لونها فاتح لذيذة وخفيفة..... وناس غامقة فى كلامها وحياتها شبه كيكه الشيكولاتة الغامقة... دسمة اكتر وتقيله على المعدة، شرحت لأولادي ان الأحداث الصعبة دى ابتلاء من الله يعقبه فرج بإذن الله، فوجئت ببنتى تشبه الفرج الرباني (زى صوص الشيكولاتة البيضا لذيذ ويغير اى طعم وحش )مع انها مكنتش لابسه بيجامه جديده ولا حاجه و كان رأيى كل ما الإنسان يصبر ويلتزم ويستغفر ربنا يجازيه خير زى بالظبط الكيكه الهشة المنفوشه، تصبر عليها وتديها وقتها النتيجة تكون ممتازه ))) لو استعجلت عليها تهبط فى الصنيه وتبوظ ...حسيت انى اقنعت ولادى وقربت ليهم الصوره والوضع الحالى واستوعبوا ضروره الصبر والالتزام بالمنزل تنفيذآ لقررات الدولة......
بس ريقنا جرى اوى كلنا وقررنا بعد القعده الحلوه دى نعمل كيكه تايجر يعنى شيكولاته وفانليا مع بعض عشان محدش يقول علينا حاجة.
تم أضافة تعليقك سوف يظهر بعد المراجعة