عمرو أديب: "كورونا لما خبط باب مصر ودخل لقى دولة واقفة على رجلها"

أكد الإعلامي عمرو أديب أن الدولة تتابع بشكل منتظم كافة القضايا العالقة داخل مصر وخارجها، وقال: "مصر متابعة كل حاجة برة وجوة، مصر واخدة بالها من سد النهضة وفى نفس الوقت متابعة موضوع كورونا والسيطرة على الفيروس، وبتتابع برضه الاحتياطي النقدي، وبتتابع التجارة والصناعة وعجلة الإنتاج والوضع الأمني وتأمين الحدود، مصر متابعة كل حاجة حواليها وبتحصل داخلها بنفس الأهمية وبنفس القوة".

وأضاف عمرو أديب خلال برنامج الحكاية الذي يذاع على قناة mbc مصر: "الفيروس اللعين لما خبط باب مصر، اتفاجئ من اللي شافوا، شاف دولة واقفة على رجليها كويس أوي، شاف دولة بتنتج وبتاكل وبتشرب ومفيش أي حاجة ناقصة، شاف دولة عندها مخزون استراتيجي محترم يقدر يقف قصاد أي حاجة صعبة، شاف دولة قادرة تنتج وسائل الوقاية اللازمة زي الكمامات وأجهزة التنفس والكحول وبتصدر كمان".

وقال عمرو أديب: "دلوقتي الناس اللى كانت عاملة فيه أبو العريف عرفت دور الجيش، الموضوع لما وصل للوباء وبقى فيها أرواح هتروح الناس بدأت تستوعب الدور العظيم اللي بيقوم بيه الجيش وضباطه المحترمين اللي بيعشقوا تراب البلد دي".