ياللى انت امبارح كنت البيت
وبروحك دايما تجمعنا
بنى ادم روحه من الجنة
وف قلبك دنيا بتتغنا
وف ضحكك حزن المتفارق
ولأن العالم أوحالك
ان الفرح نتيجة لخنقة
وان امبارح يشبه بكرة
وان الغنوة صبحت بيت
ازيك
يالى ف بعدك اتربيت
وعرفت حاجات عنك ياما
وعرفت القيمة ف كلماتك
صدقنى واحشنى وبكتبلك
مع انك قاعد ف خيالي
مفارقتش روحى وتفكيري
مفارقتش فرحى وتوجيعي
ولسانى مبطلش يقولها
انا ابويا اعظم بن ادم
انا ابويا ظلمته اما نصفني
وف طيشى سمعنى وقدرني
وحمولى اتشالت على كتفه
وكأنه عايش علشاني
ازيك 👉
كان نفسى تشوفنى ف ايامك
وانا ماشى بحقق احلامي
احلامى اللى انت مصدقها
وبتحلف دايما بحياتي
وتقول انا ابنى صبح شاعر
ولكنه طايش بمشاعر
فقداه الصح من الباطل
انا ابويا الاصل ف حدوتي
ولا يمكن ابدا راح يمشي
من اول مالمسنى وشالني
وقالوله انت ابنك ده عاجز
ولا يمكن ابدا راح يمشي
ف ترد تقول أهو ده المقدور
راح يمشى وبكره هتنبهروا
وايمانك بالله كان واسع
واتربط الوتر المقطوع
ومشيت بعديها باسبوع
ومن بعديها كل اما اتعب
يقولولى اتعالج او اكشف
وانا ارد اقول ازاى اكشف
وانا عندى ابويا الدكتور
ازيك 👉
انا عايز احكيلك عنك
عن اول يوم كنت ف تعبك
انا قلبى اتوجع وقتيها
علشان السند اللى شايلني
انا شايلو وتعبك بيزيد
وف موتك حسيت بالزهد
كأن الدنيا بتتلاشي
وسمعت لصوت صاحب بيقول
يتغسل ونصلى مكاننا
فترد امى بلاش تسيبوه
ينزل وياه جوه المدفن
أكمن قلبه ميقدرشي
فنزلت لأنى مفكرتش
غير فى العهد بتاعنا زمان
زى ما كنت معايا فى مرضي
هفضل جنبك لحظة دفنك
لازم اكمل حتى نهايتك
ووقفنا بندعى وانا لسه
مش مستوعب برده الفكرة
ان حياتى هتنقص قلبك
سبتك وحدك ومصدقتش
انك جاى معايا البيت
واسمع صوتك بيطمني
وبتنصحنى اعمل ايه
خليك راجل ياض ف مكاني
وقت العزاا شوفتك قدامي
ووقت الفرح فرحت معايا
ووقت الحزن بتكلمني
وتفكرنى وقت اما انسي
واسرح واسرق.... لحظة طيش
ازيك👉
انا بكتبلك انت عشان
كل الناس هتقول ده اتجنن
ازاى يسمع واحد ميت
ويفكره ويشد عليه
جايلك حااسس انى غريب
وانت الحد الباقى معايا
قولى ازيك كيف احوالك
اه على فكره انا جبت الاعفا
زى ما قلت عملت تمام
واتشعوزت على الدكتور
طيب شفت عندت معاك
ورازيتك جنبى ف تعليمي
لاجل ما اخش اداب مرتاح
لا واخترت قسم تاريخ
وبقيت بحكى كمان بطريقتك
زى ماكنت بتحكى زمان
عبد الناصر والاخوان
قيمة سينا فى الأديان
دمعة عين ف تنحى مبارك
اخر كلمه للشعراوي
حزنك على شهداء ف يناير
عدم ف عيدنا مهيب الركن
شغفك وانت بتحكى الحرب
اهو بتشعبط فيك من بعد
لاجل ما احسك اكتر جنبي
انت واحشنى قلت اكتبلك
قولى ازيك كيف احوالك
قبل ما تنطق وتقول حاجه
اوعى يا بابا تبطل قرب
قولى ازيك بقى دلوقت.
تم أضافة تعليقك سوف يظهر بعد المراجعة