نشرت السفيرة نبيلة مكرم، وزيرة الدولة للهجرة وشئون المصريين فى الخارج، تدوينه على صفحتها الرسمية ردا على منتقديها بسبب نشر صورتها مع البابا تواضروس مؤخرا ودعمها له. وعلقت وزيرة الهجرة، قائلة: "فى الوقت اللى الدولة بتواجه تحديات على كل جبهة والشعب مؤمن بالله الواحد وبقيادته المخلصة، الاقى بعض النفوس اللى اتضايقت من صورتى مع قداسة البابا تواضروس الثانى".
وتابعت:"أحب أفكرهم بصورتى فى عام 2017 مع بابا الفاتيكان اللى برضه البعض وقتها انزعج من طريقة سلامى له (Reverence) وعايزة أوضح بعض
النقاط:
1. أنا وزيرة مصرية فى حكومة مصرية.
2. اتشرف بطريقة سلامى لرموز الكنيسة.
3. اتشرف بأنى وزيرة بتشتغل فى عهد تحترم فيه القيادة المصرية كل المواطنين المصريين رغم التركة الثقيلة اللى ورثتها.
4. اتشرف بأنى لما باحضر مقابلة مع الرئيس بيعرفنى بأنى الوزيرة المصرية مش بيعرفنى بطريقة طائفية.
5. اتشرف بأنى لما باكلم فضيلة الأمام الأكبر على التلفون بقوله يا أبويا وهو بيقولى يا بنتى العزيزة.
واختتمت الوزيرة: "لو حضراتكم فاضيين..أحنا مش فاضيين ورانا شغل كتير، ورانا نحمى بلدنا ورموزنا مش بس من تحديات خارجية أنما كمان نحميهم من الفكر والثقافة المتواضعة جدا لدى البعض.. حياتى".
كانت وزيرة الهجرة السفيرة نبيلة مكرم وزيرة الدولة للهجرة وشئون المصريين فى الخارج، نشرت صورة تجمعها بقداسة البابا تواضروس الثانى على صفحتها الرسمية ، وعلقت قائلة:"من أنواع الحروب الجديدة: هدم الرموز الدينية خاصة لما بتبقى الرموز وطنية، محبة ومخلصة لوطنها".
وأكدت وزيرة الدولة للهجرة وشئون المصريين فى الخارج، أن البابا تواضروس الثانى بابا الإسكندرية وبطريرك الكرازة المرقسية، خليفة مارمرقس الرسول اللى بشر بالمسيحية فى مصر، يتعرض لحملة إساءة ممنهجة من كتائب إلكترونية.
وتابعت: "دعمى الكامل لقداسته مش بس علشان هو رئيس الكنيسة المصرية، إنما كمان علشان كل اللى عمله فى الداخل والخارج للحفاظ على مصر.
البابا طلب حاجة واحدة بس: "صلوا لأجلى".
تم أضافة تعليقك سوف يظهر بعد المراجعة