1 - وصلنى كلام عاقل فأردت نشره على نطاق أوسع
2 - نظرة الناس ليك.. ملهاش علاقة بيك.. ليها علاقة بيهم هما.. بالمكان اللى اتربوا فيه.. بتربيتهم.. بمستوى ثقافتهم.. بمفهومهم عن الصح والغلط.. بمدى حبهم لنفسهم.. بمدى سخطهم على العالم.. بنواقصهم.. بدوافعهم.. بسقف طموحاتهم إن وجد.. بمخاوفهم.. بتجاربهم.. بجرأتهم.. كل واحد شايفك بعنيه.. بعنيه بس..
3 - هل من المنطقى أنك ترضى الناس دى كلها؟!
عشان ترضى كل الناس.. هتتحول لشخص «معتوه» و«منافق» و«بلا هوية».. إنسان «تعيس».
4 - تعمل إيه؟!! متعملش حاجة.. متئذيش حد.. خليك فى حالك.. وكون «أنت».. اللى شبهك يقرب.. والمختلف تجمعك بيه الإنسانية.. واللى يهينك ويقل منك.. لازم تبقى متأكد أنه «غير سوى» وعنده مشاكل تتجاوز شخصك بكتير.. تجاهله.
5 - هى مسألة خطر بالفعل إن نحكم على الناس لماذا؟ لأن تصادف أحيانا أن ينطبق قول القائل: الجواب ييان من عنوانه، وأحيانا قول القائل: اللى تخاف منه ما يجيش أحسن منه، وأحيانا نقع فى فخ تحيز التأكيد Confirmation bias
لما نطلق حكم على حد، وندور «بوعى أو فى اللاوعى» على المعلومات والأحداث اللى تثبت وجهة نظرنا بإن فلان وحش ونتجاهل المعلومات اللى بتقول إنه كويس علشان إحنا خلاص أصدرنا حكمنا المبدئى والنهائى عليه.
6 - علمتنى الحياة أنى لا أصدر أحكاما على أحد، وإن أعطى للناس فرصا، وأن أسامحهم يمكن ربنا يسامحنى.
7 - قال الإمام الشافعى..
إِذا رُمتَ أَن تَحيا سَليماً مِنَ الرَدى
وَدينُكَ مَوفورٌ وَعِرضُكَ صَيِّنُ
فَلا يَنطِقَن مِنكَ اللِسانُ بِسَوأَةٍ
فَكُلُّكَ سَوءاتٌ وَلِلناسِ أَلسُنُ
وَعَيناكَ إِن أَبدَت إِلَيكَ مَعائِباً
فَدَعها وَقُل يا عَينُ لِلناسِ أَعيُنُ
وَعاشِر بِمَعروفٍ وَسامِح مَنِ اِعتَدى
وَدافِع وَلَكِن بِالَّتى هى أَحسَنُ
هذا ما أمكن إيراده، وتيسر إعداده، وقدر الله لى قوله.
تم أضافة تعليقك سوف يظهر بعد المراجعة