أصغر موديل فاشون من "متلازمة الحب".. قصى صاحب الأربع سنوات كان سبب انفصال والديه.. الأم: رفعت خلع على جوزى عشان كان رافض يصرف عليه لإصابته بمتلازمة داون.. وابنى موهوب وهخليه أشهر لاعب كرة فى العالم.. فيديو

ليست كل النهايات واحدة فقد تنتهى قصص الحب بالسعادة والزواج وقد تنتهى الأخرى بالفشل والفراق، ولكن الأدهى من ذلك أن تنتهى قصة الحب والزواج بسبب إنجاب أطفال من ذوى الاحتياجات الخاصة، هو ملخص ما حدث مع داليا حسين والدة واحد من ملائكة الرحمة "متلازمة دوان".

لم تتخيل والدة الطفل قصى الذى يبلغ من العمر 4 سنوات أن تنتهى قصة حبها وزواجها بسبب إنجاب طفل من متلازمة داون، وقالت والدة الطفل قصى لـ "اليوم السابع": "تزوجت والد قصى بعد حب 6 سنين وكانت الحياة طبيعية وهادئة ولكن بعد ولادة قصى واكتشافنا أن من متلازمة داون الحياة اتغيرت 180 درجة، كان والد قصى وأهله مش مستوعبين يعنى إيه طفل من متلازمة داون رفضوا وجوده وكانوا دايما يقولولى متنزليش صوره على الفيس بوك ومتقوليش إن عندك طفل من داون، لكنى رفضت وكنت بنزل صور ابنى وفرحانه بيه".

وأضافت: "قعدت كتير فى مشاكل مع والد قصى كان رافض يصرف عليه لأن مراكز التأهيل غالية وكان ناوى يخلى قصى ياكل ويشرب بس لكن ولا نصرف عليه فى تأهيل أو دراسة، لدرجة أنه أخدنى للدكتور عشان يعرف سبب إن قصى من داون أنا ولا هو، والدكتور قاله دى جينات ومحدش فيكم السبب ولو خلفتم تانى هتيجبوا طفل سليم بنسبة كبيرة".

وتابعت: "بعد المشاكل انفصلنا مرتين ورجعنا وآخر مرة رفعت قضية خلع لأن ابنى نفسيته تعبت بسبب المشاكل اللى كانت بتحصل قدامه، ماكنش فاهم بس كان بيخاف من الصوت العالى، قررت إنى أرفع خلع وآخد ابنى ونعيش لوحدنا، المحكمة حكمت لى بـ 600 جنيه ولكن استأنف الحكم والمحكمة طلعت قرار للدفع للحبس واضطر يدفع الفلوس".

"أنا عمرى ماقلت عليه متلازمة داون لأنها متلازمة الحب والسعادة"، هو ما قالته والده قصى عن طفلها وقالت إنه موهوب ومميز ونسبة الذكاء عنده 75% وعن حياتها مع قصى قالت: "قصى دلوقتى بقى موديل فاشون والناس كلها بتحب تتصور معاه وبيطلبوه فى جلسات تصوير دايما وكمان هو ذكى وشاطر وبيسمع الكلام وبيحب الكرة والسباحة، وإن شاء الله هكون معاه للآخر، وحاليا بأهله من خلال التدريب ومدرسين للنطق والمهارات وهفضل مع ابنى لغاية ما اخليه أشهر لاعب كرة قدم فى العالم".

وعن علاقة الطفل قصى بوالده قالت داليا: "بعدما قصى بدأ يتشهر والناس تعرفه وبدأ يتكلم بباه طلب يشوفه وبقى بيروحله يقعد معاه وهو اللى قدمله فى المدرسة، هو حاليا حس بالفرق وحس إن الطفل اللى هو رفض يصرف عليه زمان ممكن يبقى حاجة، يمكن الأول كانت صدمة بالنسبة له".

وانهت داليا حديثها قائلة: "عاوزة أقول لكل الأهالى اللى عندهم أطفال من متلازمة داون أو أى إعاقة تانية أنت عندك ملاك فى البيت حافظ عليه وخليك جمبه وأكيد ربنا هيرزقك ويفرح قلبك بيه".