عرض الإعلامى أحمد موسى تسجيلا لوالد الهارب محمد على يطالبه بإعادة أموال سرقها من شقيقه وأبنائه اليتامى. وقال على عبد الخالق والد الهارب محمد على في تسجيل، خلال برنامج "على مسئوليتى"، على فضائية "صدى البلد": "يا محمد كلمتين عاوزك تحطهم قدام عينيك صح، دلوقتى جالى طلب من النيابة الحسبية بتسوية حاجات إبراهيم، ايه اللى اتباع وايه اللى متباعش، واللى اتباع تورد فلوسه، دلوقتى أنا في مأزق غير عادى، ولازم الفلوس تدفع دلوقتى، انت يا محمد متخلى عنى خالص ورافع إيدك وأنا متورط".
وتابع: "قلتلى شوية وبعدين والموضوع اترحل، جالى طلب النهاردة أهو، وحاجة ليها 3 سنين لازم يبقى فيه بيان ليه، وجالى طلب من النيابة الحسبية أنى أسس مواقف إبراهيم، دلوقتى "الربوة" متباعة أقولهم إزاى متباعتش، متباعة بأوراق واتسجلت، عاوزك توقف يا محمد عشان نخلص من الموضوع دا، أنا مش هقف يا محمد لحد ما أتحبس، أنا بكلمك أنا أبوك مش واحد صاحبك، أوقف جنبى عشان نخلص، الفلوس دى طالعة تروح المجلس الحسبى، دلوقتى الموضوع هيخش في شق قانونى، إحنا في غنا عنه، وأنت رافع إيدك عني خالص وسايبنى متدمر، دلوقتى الموضوع طلع من إيدي هيبقى فيه شق قانونى احنا في غنا عنه، عشان شكلنا قدام الناس هيبقى مش كويس، أنا متورط في الفلوس دي".
واستكمل: "خلص يا محمد عشان نخلص، أنا مش هقف يا بابا لحد ما أتجسن، عاوزنى أتسجن خلاص براحتك، لأن دى مش ملايين الملايين، مبلغ هايف نسد باب ونتكن في بيوتنا، أنت دلوقتى رافع إيدك طيب وبعدين أسكت لحد ما أتحبس، أخش السجن في حاجة مليش يد فيها، الفلوس أنت واخدها يا محمد، تيجي الفلوس يا محمد، أنا بقولك بقالى سنة متكلمتش كلمة، وجالى إخطار من المحكمة الحسبية، محكمة الأسرة، يعنى لازم أروح أحط أقوالى، أقول إيه ابنى خد الفلوس، أقول خدتها وصرفتها، إحنا اتحطينا في شق قانونى، أوقف جنبى عشان نخلص منه، هيبقى شكلنا وحش قدام الناس، أنا مش هقبل إنى أتحبس، فى السن دا أتحبس في حاجة غير مدان فيها، جالى النهاردة الإقرار ومينفعش مينفعش، يا بابا حل وخلص".
