بيقولوا لى مين رامى على وشك مية نار، وفى طينة على وشك روحى شيليها، ومين مديكى بالبوكس فى وشك.. بهذه الكلمات تروى صاحبة القناع الأسود تفاصيل التنمر التى تعرضت لها منذ الصغر فى حلقة جديدة ومثيرة من برنامج فتحى شو، تقديم محمد فتحى عبد الغفار .
وتروى شروق العقدة المهندسة المعمارية، والتى تبلغ من العمر الـ 28 عاما، رحلة حياتها لـ"فتحى شو"، قائلة، "أنا اتولدت بوحمة فى وشى عانيت كتير منها وأنا صغيرة طبعا لأن الناس كانت بتتريق وتتنمر عليا كانوا دايما بيقولوا لى أنتى فى حد ضربك بالبوكس فى وشك أو حد رمى ميه نار على وشك، أو حتى لما بروح أقدم على شغل فى أى مكان بنجح فى كل الانترفيوهات ولمجرد ما أوصل إنى أقابل صاحب العمل أو المدير بترفض وبدون أدنى مسئولية بمشاعر الطرف اللى قدامه يقولوا لى العملاء هيخافوا منك .
وتابعت، "منذ نعومة أظافرى وحتى الآن فاكرة بعض الجمل اللى عمرى ما أقدر أنساها كنت فى فترة رياض الأطفال وجت بنت قالتلى إنتى باباكى ومامتك مش بيحموكى كويس عشان فى طينة فى وشك، دي جمله اتقالت لى وأنا عندى 5 سنين وعمرى ما أنساها، روحت فى اليوم ده البيت وجبت ليفة خشنة جدا وقعدت أدعك بيها وشى لحد ما نزل دم ظنا منى إن دى طينة فعلا لدرجة إنى بكيت من الألم ووالدى شاف المنظر كده خدنى فى حضنه واحتوانى وقالى بصى يا حبيبتى لما حد يجى يضايقك عشان الوحمة اللى فى وشك قولى له إن إللى ربنا بيحبه بيميزه بنعمة عن غيره.
واردفت، الحاجة الوحيدة اللى كنت متأكدة منها إنى هاحب لكن إنى اتحب زى ما أنا كده دى كانت مستحيلة، لحد ما قابلت أحمد وخطف قلبى وبدأ يتكلم معايا ونخرج واحنا فى الجامعة بس أنا كنت فكراه إعجاب منه لحد فى يوم حصلت إنى تنمر عليا بنات فى الجامعة وكنت خلاص منهارة وجه هو وقف قدامى وقالى بحبك نسيت ساعتها اللى حصل وحسيت بصدمة كبيرة صدمة فرحة مش الصدمة التانية واتحولت حياتى من وقتها .
وفى نفس السياق، قال زوجها أحمد الصاوى "دكتور صيدلى"، عمرى ما سألتها من ساعة ما عرفتها ايه اللى فى وشك ده أو ده إيه كانت حاجة لا تعنينى فى شيء أهم حاجة هى ولا حتى استغربت، قعدنا فترة كبيرة زمايل واًصدقاء لحد ما قولتلها أنا بحبك .
واستكملت "شروق"، "فى موقف كنت ماشيه أنا ووالدتى فى الشارع وبنعدى الشارع وكان فى جروب بنات خارجين من المدرسة قعدوا يعيبوا عليا وسمعت كلام مش أٌقدر أقوله من فظاعته، ويا ريت كانت بنت اللى بتقوله لأ دول كلهم كانوا عاملين عليا حفلة ومامتى انهارت من العياط، وقالتلى أنا مش عارفه انتى إزاى بتمشى فى الشارع وبتواجهى الناس، ردى عليها ساعتها يا ماما هو فى حد طايل ياخد حسنات ببلاش من الناس".
"مفكرتيش تعملى عملية للوحمة"، فتحى شو سائلا شروق، "أكيد فكرت وفكرت كتير وسنين كتير وفى الآخر استنتجت ان ربنا قادر على كل شيء وأكيد فى حكمة إن ربنا سبحانه وتعالى خلقنى كده فأنا ليه غير خلقته وهو مأذنيش لأنها لا بتأذينى صحيا ولا جسديا هى مجرد لون فى وشى"، وأكدت، "الوحمة هى اللى محليانى هى اللى مميزانى أنت لو شوفتنى مرة عمرك ما هتنسانى العمر كله الوحمة رزق وبركة".
وبالرجوع إلى زوجها أحمد الصاوى، يقول: "كنت فى مرة خارجين فى مول ودى كانت أول مرة نخرج فيها مع بعض وكان اليوم جميل ومكناش عافرين باب الخروج منين فسألت فرد أمن لاقيته باصص كده وبيقولى لو سمحت ممكن سؤال قولتله اتفضل قالى هو إيه اللى فى وشها ده، ساعتها أنا أصبت بحالة غضب شديدة وقولت له باب الخروج منين وخلى اليوم ده يعدى على خير طبعا أنا كنت خايف على مشاعرها فى الوقت ده وإنه أحرجها قدامى" .
تم أضافة تعليقك سوف يظهر بعد المراجعة