عمرو أديب عن انتقال رمضان صبحى لبيراميدز: الأهلى خد نص الإسماعيلى ومحدش أتكلم

علق الإعلامي عمرو أديب، على انتقال رمضان صبحي لاعب الأهلي السابق، إلى نادي بيراميدز، وقال: "أنا شايف أن الموضوع مسبب مأسي، أنا عاوز أقولكو أن الأهلي مدرسة تقدر تخرج نجوم كبار زي رمضان، هو الاحتراف كدة والموضوع مفيهوش أي خيانة، ده ميسي اللي اتربى في برشلونة، قال إنه هيمشي، وكريستيانو لما ساب ريال مدريد نفس الكلام، الكورة مبقتش زي زمان، الموضوع بقى بيزنس دلوقتي".

وأضاف الإعلامي عمرو أديب ببرنامج "الحكاية" الذي يذاع على قناة mbc مصر: "مفيش حاجة اسمها أبناء النادي دي، ده راجل عنده موهبة وارتباطات، واحنا فاكرين لما الأهلي خد نص نادي الإسماعيلي، حد قال حاجة، جه الإسماعيلي قال دون أبناء النادي، حد قال ده حلو ولا وحش، الأهلي زي الزمالك زي الإسماعيلي، في ناس تقولك مهما دفعولي، مش هروح وأنا أعرف لاعيبة بتقول أنا هعيش وأموت في الأهلي".

وقال: "رمضان صبحي ده لاعيب موهبة فاذة، ربنا معاه ويوفقه وكل ما يتطور هو مفيد للمنتخب الأوليمبي والمنتخب الكبير".