على حميدة لتليفزيون اليوم السابع: رفضت التمثيل فى تيتانيك وديكابريو متعقد منى

قال الفنان على حميدة، فى تصريحات لتليفزيون اليوم السابع قبل مرضه، مع الزميلة منة يحيى، إنه قدم فيلم لولاكى ومولد نجم بالإضافة إلى 4 أعمال درامية، وتابع قائلا: "ليوناردو دى كابريو متعقد منى، فيلم تيتانيك أنا كنت همثله، وقالى إنت هتمثل تيتانيك وهو عايز يمثل لولاكى، بس رفضته لأن دور البطل يتطلب منه العموم فى المياه المتجمدة، وأنا مش بحب المياه المتجمدة".

وأشار على حميدة إلى أن شريط لولاكى حقق مبيعات 80 مليون شريط، مشيرا إلى أنه قام بشراء شقة على النيل فى محافظة الجيزة فى المكان الذى كان ينام فيه على الرصيف، وقيمة الشقة 5 ملايين جنيه، وتابع قائلا: "فجأة طلع عليا ضرائب حوالى 13 مليون ونص وقمت ببيع الشقة و3 عربيات وفيلا فى مطروح وأرض عشان أسدد الضرائب، وبعت كل ما أملك ورجعت تانى أنام على الرصيف بس فى عربية جيب كانت عندى.

وأضاف الفنان على حميدة، فى تصريحات لتليفزيون اليوم السابع، "مفيش حد ساعدنى خالص، وحطيت هدومى عند مدير أعمال لغاية ما اشتريت شقة، ومفيش حد رفع سماعة التليفون عليا وسأل فيا وقت أزمتى"، وتابع قائلا: "أنا بعتب على النجم محمد منير حبيبى صديقى، وكان بيجى عندى البيت وبروح عنده، يمكن لطيفة وحميد الشاعرى اتصلوا بيا".

وأكد حميدة أن كل ما حصل عليه نظير أغنية لولاكى كان 20 ألف جنيه وبالقسط، وتابع قائلا: "الراجل كان أبخل مخلوق شفته فى حياتى ولما كان بيعزمنى أنا وأصحابى يقولى تعالى الغدا عندى بكره وهات 5 كيلو لحمة وانت جى".

وأضاف على حميدة أن أغنية لولاكى كانت نعمة ونقمة فى نفس الوقت، مشيرا إلى أن الشريط طلع الساعة 9 يوم 14 يوليو، والساعة 11 مكنتش أقدر اتحرك فى الشارع اتشهرت فى 3 ساعات، وحميد الشاعرى قالى لو حد غيرك كان اتجن.