تحدث الموسيقار هانى مهنا، عن كواليس الحكم عليه ودخوله السجن، قائلا:"خلال قضيتي، مكنتش عارف هتسجن فين.. معرفش صعبت عليهم ولا بيحبوني فروحت طرة.. وقالوا ليا مأمورية خاصة.. وقعدت 6 ساعات في المحكمة في انتظار العربية بتاعت السجن.. وخدوني لسجن طرة.. وخلعت البدلة ولبست بدلة زرقا بتاعت السجون، مكتوب عليها نزيل.. كنت حاسس إنى اضربت 50 طعنة.. حزن كبير لو كنت في نعيم هتنساه في السجن".
وأضاف "هاني مهنا" خلال حواره على تلفزيون اليوم السابع،: "قبل نطق الحكم دخلت القفص.. اتهزيت أوي .. متوقعتش الحبس.. فريد الديب كان المحامي بتاعي، وطمنى كتير وقال لى الله يجازيك يا شيخ مصحيني 6 الصبح.. دا إحنا جايين نتفسح.. ولكن شعرت أن الموضوع متفصل ضدي.. فريد اترافع ساعة إلا 10 دقائق.. وقلت خلاص براءة.. لحد ما طلع سكرتير المحكمة وأعلن الأحكام.. مكنتش مصدق:"
وتابع :"كنت حاسس إني في حلم وعاوز أفوق منه بسرعة.. لحد ما شوفت شاب خد حكم بـ 20 سنة.. وجه تحت رجلي بيعيط.. وقال لى انت خدمت مصر.. أنا مستعد أخد الخمس سنين مكانك.. وتاخد براءة .. شاب معرفوش.. كان بيتكلم من قلبه بحرقه.. وانهار.. وأنا ساعتها انهارت.. وكان البكاء فظيع.. ليلة الحكم كنت في حفلة، وقلتلهم انا رايح المحكمة هروح وأرجع على طول، وحصل اللى حصل، وحبيب العدلي قالى هتستفيد من الواقعة دى حاجتين، الأول إنك تفصص أصدقائك.. وقالى هتلاقى ناس قريبين منك مش جدعان، والعكس.. دى مش أي نصيحة، وتانى حاجة، قالى دى قرصة ودن.. أنت عملت إيه؟.. قضيتك فاشلة".
تم أضافة تعليقك سوف يظهر بعد المراجعة