حل المخرج على العربى ضيفا على الزميل على الكشوطى بتلفزيون اليوم السابع، للحديث عن كواليس فيلمه المصرى "كباتن الزعترى" والذى شارك في مهرجان صاندانس السينمائى، خاصة وأن الفيلم تم تصويره على مدار 6 سنوات، إضافة إلى عام كامل للانتهاء من الفيلم بشكل نهائى ليكون إجمالى العمل على الفيلم حوالى 7 سنوات كاملة.
وقال المخرج على العربى خلال حواره مع الزميل على الكشوطى، الفيلم بيتكلم عن قصة ولدين وهما "محمود وفوزى" اللاجئين داخل مخيم الزعترى حلمهم يكونوا لاعبى كرة قدم محترفين.
وأضاف المخرج على العربى، صوت الفيلم منذ عام 2013 وانتهيت من تصويرها بعد 7 سنوات، والفيلم مش بيحكى على اللاجئين فقط ولكن بيحكى عن الصداقة بشكل خاص، والقصة دى ممكن نلاقيها في كل مكان، والقصة بالنسبالى قوية كمان لأن الولدين في مكان مقفول بسور وما زالت احلامهم مستمرة.
وتابع على العربى، ساعدنى في انتاج الفيلم كلا من أمجد أبو علاء ومارك لطفى، وأنا أنتجت الفيلم وأخرجته وده كان اصعب شيء انك تبقى منتج ومخرج في نفس الوقت، بس فكرة انك تقنع ناس تصدق الفيلم بتاعك وتقولهم انك هاتقعد 5 سنين على الأقل تعيش مع الولدين دول وتشوف مرحلة المراهقة ونضجهم وتراقب التغيرات عليهم وعلى جلمهم ده كان صعب تلاقى حد يؤمن بده بسهولة.
وأستكمل على العربى، أنك تقعد في مخيم وتنقل كل حاجة كان صعب ولكن ممتع، ومفيش أكل وشرب والبرد شتاء جدا وفى الصيف حر جدا، بس هما كانوا مميزين جدا وارتبطنا بيهم ارتباط قوى وبالمخيم، وكانوا بيكتشفوا العامل من خلالنا، ويسألونا احنا بنعمل ايه بره ووصلنا لأيه فكنا حلقة الوصل بينهم وبين العالم بره، مؤكدا، أبطال الفيلم علمونى ازاى اتمسك بحلمى مهما كان صعب.
