حل النجم محمد فؤاد ضيفا على الزميل على الكشوطى فى لقاء على تليفزيون "اليوم السابع"، تحدث خلاله عن أغنيته الجديدة "الحفلة"، التى أثارت الكثير من الجدل، ورد على منتقديه، وكشف عن أعماله الجديدة.
وقال النجم محمد فؤاد، فى حواره على تليفزيون "اليوم السابع" "الجدل اللى حاصل على أغنية الحفلة مش مفاجئ بالنسبة لى ومتوقع، والحمد لله اشتغلنا على إننا نعمل أغنية تشد الناس وتطرح تساؤلات، البعض يعجب بيها ويتقبلها، ناس تانية ترفضها، ده طبيعى وده من أيام كمننا وحيران، وأغنية فالسكة فالسكة، الحمد لله بنقى الحاجة الغريبة على ودان الناس وتخلق حالة من الجدل، أى حاجة جديدة بتخض فى الأول".
وأضاف فؤاد: "لازم نجدد ونفكر فى اتجاهات مختلفة وندور على أغانى برة الصندوق، ونكسر حالة الملل ونفوق الناس، الأغنية ليها هدف نبيل وهو إنها تخرجك من حالة الإحباط وتشاور على مربع من التفاؤل".
وأضاف محمد فؤاد، فى حواره مع على الكشوطي على تليفزيون "اليوم السابع" "العالم كله محبط وسهل عليا أعمل أغنية نكد ونعيط الناس وانتهينا، لكن الواجب إننا نحاول نبهج الناس ونطلعها من حالة الهزيمة، الحياة مبقاش فيها حاجة تفرح والحالة الجدلية اللى حصلت على الأغنية على راسى من فوق، وأحترمها جدا وأى حد قال رأيه فوق راسى".
ورد محمد فؤاد فى حواره على تليفزيون "اليوم السابع" على هجوم الموسيقار حلمى بكر عليه بعد طرحه أغنية "الحفلة": "حلمى بكر أخونا الكبير وإن شاء الله ربنا يقف معاه فى مصاب وفاة شقيقه وبنقدم له خالص التعازى، وأنا خدام الأستاذ حلمى بكر فى الظروف دى لو محتاج منى أى حاجة، والسوشيال ميديا بتلعب دور مش لطيف، وعايز أقول اتقوا الله فى الكلام اللى بتقوله، أنت قاعد فى مكان دافئ وجميل وراء موبايل ولا شاشة كمبيوتر وعمال تقطع فى الناس، بلاش نحط أبو قرش على أبو قرشين، بلاش نزعل ربنا مننا أنا أخوكم وبقولها من قلبي بلاش الفتى اللى مالوش لازمة، اللى ممكن أستاذ حلمى بكر يشوفه يزعل، والناس لازم تراجع نفسها فى كل ما يصدر عن لسانهم".
كما علق فؤاد، خلال حواره مع "اليوم السابع"، على حالة الانتقاد التى تعرض لها من خلال السوشيال ميديا، الأمر الذى وصل إلى حالة من التنمر، قائلا: "أنا بخاف من ربنا وبخاف استخدم لسانى بشكل يزعل الناس وده مش ضعف، الأدب حلو وفى واحد بيقول عليا ده خريج صنايع، يخريبت عقلك مينفعش كدة.. خريجى الصنايع ناس محترمة جدا بلاش أنا، هات محمد فؤاد على جنب.. ملايين فى مصر خريجى صنايع متهرجش بقى".
وكان النجم محمد فؤاد طرح أغنية سينجل جديدة بعنوان "فى الحفلة" عبر قناته الرسمية "يوتيوب"، من كلمات دبل زوكش، وألحان علاء فيتى، وتعتبر الأغنية لونا جديدا ومختلفا غير أعمال فؤاد السابقة وهى أول أغنية لمحمد فؤاد فى عام 2021.
كما يستعد فؤاد لطرح ألبومه الجديد الذى تعطل إصداره لسنوات طويلة، مما عرضه لتسريب عدد كبير من أغنياته، لكن فؤاد وعد جمهوره بتقديم أغنيات جديدة غير التى تم تسريبها، وينتظر فؤاد طرح الألبوم لتصوير إحدى أغنياته على طريقة فيديو كليب.
تم أضافة تعليقك سوف يظهر بعد المراجعة