قال النجم محمد فؤاد خلال حواره مع الزميل علي الكشوطي علي تلفزيون اليوم السابع، أنه عقد اتفاق مع فريق عمل أغنية "الحفلة" بالفيديو للتأكيد علي شروط الاتفاق بينهم والقواعد المنظمة للعمل والتي تنص علي أن هناك خط أحمر وحدود في الكلمات قائلا، "القاعدة الأساسية مفيش ألفاظ سيئة أوغلط ونحاول نقدم المزيكا دي من خلال كلام يشرف مصر لا يعيب أي أحد ومنتكسفش منه أنا داخل منطقة المهرجانات دي علشان نعمل ضبط للكلام ، نقدر نهرج ولكن اللي هيعدي السقف ده يبقي مش متعاون معايا واللي موافق هنكسب جمهور ونحقق جماهيرية كبيرة لان الناس بتحب الكلام المحترم ومحدش هيسمعك والأفضل طالما بتحب المزيكا نكمل ولكن بكلام كويس".
وكان النجم محمد فؤاد ضيفا على الزميل على الكشوطى فى لقاء على تليفزيون "اليوم السابع"، تحدث خلاله عن أغنيته الجديدة "الحفلة"، التى أثارت الكثير من الجدل، ورد على منتقديه، وكشف عن أعماله الجديدة.
وقال النجم محمد فؤاد، فى حواره على تليفزيون "اليوم السابع" "الجدل اللى حاصل على أغنية الحفلة مش مفاجئ بالنسبة لى ومتوقع، والحمد لله اشتغلنا على إننا نعمل أغنية تشد الناس وتطرح تساؤلات، البعض يعجب بيها ويتقبلها، ناس تانية ترفضها، ده طبيعى وده من أيام كمننا وحيران، وأغنية فالسكة فالسكة، الحمد لله بنقى الحاجة الغريبة على ودان الناس وتخلق حالة من الجدل، أى حاجة جديدة بتخض فى الأول".
وأضاف فؤاد: "لازم نجدد ونفكر فى اتجاهات مختلفة وندور على أغانى برة الصندوق، ونكسر حالة الملل ونفوق الناس، الأغنية ليها هدف نبيل وهو إنها تخرجك من حالة الإحباط وتشاور على مربع من التفاؤل".
وأضاف محمد فؤاد، فى حواره مع على الكشوطي على تليفزيون "اليوم السابع" "العالم كله محبط وسهل عليا أعمل أغنية نكد ونعيط الناس وانتهينا، لكن الواجب إننا نحاول نبهج الناس، الحياة مبقاش فيها حاجة تفرح والحالة الجدلية اللى حصلت على الأغنية على راسى من فوق، وأحترمها جدا وأى حد قال رأيه فوق راسى".
ورد محمد فؤاد فى حواره على تليفزيون "اليوم السابع" على هجوم الموسيقار حلمى بكر عليه بعد طرحه أغنية "الحفلة": "حلمى بكر أخونا الكبير وإن شاء الله ربنا يقف معاه فى مصاب وفاة شقيقه وبنقدم له خالص التعازى، وأنا خدام الأستاذ حلمى بكر فى الظروف دى لو محتاج منى أى حاجة، والسوشيال ميديا بتلعب دور مش لطيف، وعايز أقول اتقوا الله فى الكلام اللى بتقوله، أنت قاعد فى مكان دافئ وجميل وراء موبايل ولا شاشة كمبيوتر وعمال تقطع فى الناس، بلاش نحط أبو قرش على أبو قرشين، بلاش نزعل ربنا مننا أنا أخوكم وبقولها من قلبي بلاش الفتى اللى مالوش لازمة، اللى ممكن أستاذ حلمى بكر يشوفه يزعل، والناس لازم تراجع نفسها فى كل ما يصدر عن لسانهم".
كما علق فؤاد، خلال حواره مع "اليوم السابع"، على حالة الانتقاد التى تعرض لها من خلال السوشيال ميديا، الأمر الذى وصل إلى حالة من التنمر، قائلا: "أنا بخاف من ربنا وبخاف استخدم لسانى بشكل يزعل الناس وده مش ضعف، الأدب حلو وفى واحد بيقول عليا ده خريج صنايع، يخريبت عقلك مينفعش كدة.. خريجى الصنايع ناس محترمة جدا بلاش أنا، هات محمد فؤاد على جنب.. ملايين فى مصر خريجى صنايع متهرجش بقى".
تم أضافة تعليقك سوف يظهر بعد المراجعة