من أخشاب الأشجار، أبدع شاب مصرى يدعى، محمد عبد الموجود فى بناء فيلا كاملة من الخشب بلمسات جمالية ساحرة، تضفى حس الارتياح على عدسات عينيك بمجرد أن تراها، وفى حلقة جديدة من برنامج "فتحى شو"، تقديم محمد فتحى عبد الغفار، التقينا بالضيف الذى أخذنا فى جولة طويلة داخل فيلته، بعدها تسلقنا جبال سيناء فى مغامرة ممتعة.
ويقول "عبد الموجود": أنا جيت هنا من سنين كتير وحبيت دهب لأنها فعلا فيها نداهة هتنادى عليك بعد ما تروح بيتك علشان تجيبك تانى، بنيت الفيلا ديه كلها من الخشب بنسبة 90%، والهدف هو تنمية العامل البيئى وإحلاله محل المواد المصنعة اللى موجودة فى المنازل".
وتابع: "علمت نفسى بنفسى ومكنتش بعرف أسماء المعدات اللى فى إيدى، لأنى تعبت كتير مع غالبية الصنيعية لحد أما قررت إنى اتعلم بنفسى وبحثت وقريت وبوظت وعملت كل حاجة خسرت فلوس حوالى 2 مليون جنيه بس اتعلمت فى النهاية مش مهم انك تخسر المهم انك تتعلم".
وأردف: "الخشب اللى بنيت بيه الفيلا ده خشب ميت من سنين، لأنه مينفعش ابنى بشجر لسه مقطوع علشان الميه اللى فى اللحاء بتاعه تعرضه لأضرار كبيرة علشان كده لازم اسيب الخشب 5 سنين على ما ابدأ استخدمه".
واستكمل: "قررت أعمل إضاءة للجبل هنا لتزيين المكان وإضفاء جو من البهجة والسحر فيه".
وأكد: "دهب مكان للطاقة الإيجابية وكتير مننا ميعرفش كده ووجود الملح الخشن فى تزيين البيت بيسحب كل الطاقة السلبية اللى فى الجسم علشان كده حاطه فى كل مكان".
تم أضافة تعليقك سوف يظهر بعد المراجعة