أكد الإعلامى أحمد شوبير أن النادى الاهلى يرفض فكرة التفريط فى نجميه أليو ديانج وأكرم توفيق حتى نهاية الموسم الحالى، وقال شوبير فى برنامجه الإذاعى عبر أون سبورت إف إم، "سمعت عن العروض اللى بيقولوا وصلت لأكرم توفيق وديانج، وسألت مصدرا فى الأهلى قالى قول على لسانى بدون ذكر اسمى إن الاهلى لم تصله عروض رسمية سواء لديانج أو أكرم توفيق فى هذا التوقيت".
وأضاف شوبير، "فى الأهلى بيقولوا إزاى نسيب أفضل لاعب خط وسط أفريقيا وأفضل ظهير أيمن وإحنا خسرانين دوري وعندنا كأس عالم للأندية وبنافس فى دوري الأبطال الأفريقى عشان نكسب البطولة الثالثة على التوالى، وعشان كدا مش هنسيب أكرم توفيق ولا ديانج هذا الموسم تحت أى سبب من الأسباب والموسم الجاى يحلها ألف حلال لو جالهم عرض مناسب للنادى ولإمكانياتهم الكبيرة".
وتابع شوبير، "ديانج يلعب فى أكبر دوري فى العالم وأكرم توفيق لاعب تقيل أوى وتوقعت تألقه مع الأهلى فى الجبهة اليمنى منذ وجوده فى الجونة".
وعن سر غياب محمد محمود علق شوبير، "شوفت محمد محمود فى الأهلى ولقيته فى الجيم بيعمل تدريبات تقوية قولتله فينك يابنى قالى ياكابتن موسيمانى عملى برنامج إعداد قوى جدا ، قولتله طب ليه مش بتشارك مع فريق الشباب عشان تكتسب فورمة المباريات قالى ياكابتن المسابقات دى ضعيفة وأنا سليم بنسبة 100% وجاهز للمشاركة فى أى وقت، قولتله طب قدامك لحد يناير شوف واحكم وقيم نفسك ولو ملقتش فرصة ليك أطلب من الاهلى يخرجك إعارة قالى اللى فيه الخير يقدمه ربنا ياكابتن أنا مصمم على العودة والتألق مع الاهلى".
