كشف الإعلامى أحمد شوبير أن نجوم النادى الاهلى يشعرون بالتعاطف مع زميلهم محمود كهربا بعد خروجه من حسابات الجنوب افريقى بيتسو موسيمانى المدير الفنى للفريق ، وقال شوبير فى برنامجه الإذاعى عبر أون سبورت إف إم :" لاعبو الاهلى متعاطفين مع كهربا وشايفينه ملتزم ولايخرج عن النص ويؤدى التدريبات بجدية شديدة ، كمان محمود الخطيب رئيس الاهلى بيتمنى أن كهربا يرجع يشارك ، بس عشان إحنا فى الاهلى حتى رئيس النادى لايملك فرض لاعب على مدرب ودى عظمة الأهلى".
وأضاف شوبير:"لاعبو الاهلى زعلانين من قرار موسيمانى بإبعاد كهربا بس مفيش حد فيهم اتكلم ولا يجرؤ حد منهم يعترض أو حتى يتكلم مع المدرب ، كهربا نفسه متضايق وزعلان وطبعا ولازم اقوله انت لازم تموت نفسك ياكهربا وتشغل رجلك وتقفل بقك هو ده السبيل الوحيد لرجوعك للملعب".
وتابع شوبير:" اتمنى أن موسيمانى يتراجع عن تجاهل كهربا والأزمة دى تنتهى، لأن هي إما وجهة نظر فنية أنه زى ماقال اللاعب مبيدافعش كويس وهيفضل وراه لحد مايدافع زى مابيهاجم إما ان الأزمة تتعلق بكونه متهم بتسريب أخبار الفريق للإعلام وهذا غير حقيقى ومفيش لاعب فى الاهلى بيعمل كدا".
