شيرين بعد الطلاق وظهورها حليقة الرأس: مش أول مرة أحلق شعرى ودى وراثة عن أبويا.. عندى وسواس قهرى والحب بهدلنى.. حسام سيد الرجالة والحتة الناقصة كانت فى عقلنا.. ولما اتقدملى أمى قالت إحنا هنعيل وكان عندها حق

قالت الفنانة شيرين فى لقاء مسجل مع الإعلامى عمرو أديب لبرنامج الحكاية، الحمد لله أنا حلوة، أنا كويسة، بس كلام الدكتور اللى كان معاك أول امبارح كلام محترم، بس ما فيش مرض نفسى لكن فيه عدم اتزان، أنا نزلت شغلى علشان بناتى شافونى كده.

وأضافت: لم يكن أمامى غير كده، أنا حاسة أن دماغى بتفرز أفكار طول الوقت ولو سبت دماغى هتاكلنى، وأنا عملت كده لأنى ما كنتش حلوة فى عينيه، عملت كده علشان هو ما يشوفنيش حلوة، والفرق بين حلاقة الشعر والطلاق يوم واحد، حلقت شعرى قبل يوم واحد من الطلاق ودى مش أول مرة أقص شعرى، فاكر لما قولت إنى طالعة علشان أضحك الناس وقالوا عليا إنى كنت بتريق على البلد، كنت مدبوحة ودبحونى أكتر وقتها.

وأكدت قائلة أنا أقصر فى حق نفسى لكن لا أوذى أحد، ودى وراثة عن والدى، هو أصوله تركية وهما بيمتازوا بالقوة والجسم العريض والشعر الكثيف الأسود، ولما كان يزعل كان يشيل شعره كله، وأنا ورثتها عن أبويا، أنا غير أخواتى وأنا اللى حلقته بنفسى وبعدين جبت حد يخليه طول واحد.

وتابعت: الإنسان الحساس بزيادة ممكن يؤذى نفسه علشان يعاقب نفسه وأنا كنت بعاقب نفسى، أنا غلطت فى اسمى ومكانتى وقدرى.

وأكملت أنا لا أحتاج مساعدة، إنما أحتاج احتواء الناس ليا، محتاجة الناس تقدر انى نازلة اشتغل رغم اللى انا فيه، وما يقولوش عنى كلمة تجرحنى مش عاوزة حاجة من حد.

وأضافت: أنا معايا أحسن دكتور نفسى فى مصر، وأنا مش مريضة نفسيا لكن جالى وسواس قهرى لما خلفت بناتى، ويمكن أكون قولت ده قبل كده ومتخيلة انى ممكن عيالى يتأذوا من أقرب الناس ليا، والمشكلة الصغيرة ممكن يكبرها مخى ويخليها قد الهرم، والمشكلة اللى قد الهرم ممكن يخليها صغيرة، ولو مريضة نفسيا هقول بنفسى لكنى مش مريضة نفسيا بشهادة دكتورى، انا ست حرة ولو فى حاجة انا اقولها قبل ما حد يقولها، علشان كده كنت بتريق على نفسى فى الحفلة قبل ما حد يتريق عليا.

وتابعت: انا قبل ما ابتدى الموضوع ده قولت لأ هو يكبرنى بسنة واحدة، وعلى فكرة انا لسه بحبه، اللى حسيته أن جمهورى هو الحضن الأمان فى الدنيا دى وبقول لأى إنسان فى الدنيا ما يعتمدش على الآخر وكل واحد يعتمد على نفسه، ما حدش يهرشلى ضهرى غير ايدى، الحب بهدلة خلى قندلة.

وقالت "أنا بتكلم مع الناس بلغتى فى الغناء أنا عمرى ما شفت واحدة بتطلق والناس بتباركلها كده كأنى راجعة من الحجاز".

واستطردت، أنا كده وهفضل كده وهفضل قوية، "أنا مش بتظاهر بالقوة الموضوع عدى خلاص انتهى خلاص وأكتر حاجة مقويانى إنى بعترف أن لسه أهوه فى حاجة.. أنا قولت من الأول العلاقة دى لا تصلح لازم يكون فى شوية عقل، صعب أن واحدة تتجوز لتالت مرة ويكون الفرق بينها وبين جوزها سنة ولازم يكون فى فرق على الأقل 5 أو 6 سنين حسام راجل وسيد الرجالة كمان.. الحتة الناقصة كانت فى عقلنا".

وأكملت، "كان لازم يكون فى فرق بينى وبينه علشان يبقى فى شوية عقل علشان كده بنتى لما جت تلوم عليا فى يوم من الأيام قولتلها حبيبتى أنا بتربى معاكم وحسام بيتربى معانا والدنيا تستاهل نجرب ونحاول والأمومة دى حاجة كبيرة ومش هسيب لعيالى فلوس هسيبلهم حب".

وأكدت أن الصلح فى حالتى معجزة من ربنا، اللى انا فيه كان ليه تمن وبيندفع والموضوع مستحيل، ولازم الراجل يفضل راجل والست تفضل ست لو بتكسب 2 مليون جنيه فى الشهر، لو جوزى بيشتغل سواق تاكسى وادانى 10 جنيه وقالى دى مقدرتى هبوس جزمته واقوله على راسى من غير ما يبص الست بتاعته بتكسلب كام، لكن لو الراجل حس أن الست بتاعته أعلى منه فى اى شيء خصوصا الماديات هيحس انه ضعيف، لكن الراجل يفضل راجل ودكر بالقرش بتاعه لو عاجبك تعيشى على كده دى مقدرتك مش عاجبك روحى لحالك، مش مطلوب من الراجل انى يدفعلى تمن فستان هروح اغنى بيه فى الهند ولا الإمارات مقدرته فى الفلوس اللى هاكل بيها أنا وعياله.

وعن فترتها القادمة ما إذا كانت لن تكرر التجربة أو تنتقل إلى تجربة أخرى قالت: أنا لسه بحبه، اكتشفت أن الست المصرية دى اصيلة أوى، مش بتاع ضوافر ولا الرموش ولا الكلام ده، احنا ناس بنعيش اليوم بيومه وانا ست من القلعة وقبل الطلاق بأربعة أيام كنت بفرجهم على منطقتى، كأى منطقة فى إيطاليا، انا بنت حضارة إسلامية مش فرعونية، وهو كان منبهر جدا ودى مش أول مرة دى تانى مرة، ودايما لما بنروح هناك بنروح 3 بالليل وعلشان كده مش بعرف اتأقلم فى التجمع الخامس ولا أكتوبر الأماكن اللى أعمارها 40 و50 سنة ما تاكلش معايا انا ست قديمة قوى لازم المكان اللىى أعيش فيه يكون أصيل زى المكان اللى اتولت فيه.

وقالت: انا صعبة جدا ولكن ست مصرية هتعاملنى على أنى نجمة يبقى كده بتكسرنى أنا شيرين الست انا بنت السيدة العظيمة اللى عملت اكثر المشاهد المثيرة وماتت على السجادة لما قالت انا اتولت ست وهعيش ست وأموت ست النجمة لجمهورها، وأنا طلما بناتى شافونى كده هيهون عليا أى حد تانى، لأنى ببنى بنتين ولو حسوا أن مامى خلاص انتهت كان ممكن انتحر دلوقتى وربنا يسامحنى على اللفظ عادى جدا كنت هخلص من حياتى وانا قولت للناس فى الحفلة تقبلونى بشكلى ده لأنى شكلى صعب والناس صقفت واتبسطت مش عاوزة اركب باروكة انا مش فيك، كان ممكن اركب باروكة لكن ما قدرتش اكذب على الناس واضحك عليهم، ورمضان دايما بيبقى خالى من العنصر الترفيهى وربنا يقوينى لو قدرت اعمل ده فى رمضان الجاى انا أكتر حد كوميدى ممكن تقابله فى حياتك ولو عملت كوميدى حقعد محمد سعد فى البيت.

وتابعت: أنا صعبة جدا ولكن ست مصرية هتعاملنى على أنى نجمة يبقى كده بتكسرنى، أنا شيرين الست أنا بنت السيدة العظيمة اللى عملت أكثر المشاهد المثيرة وماتت على السجادة لما قالت انا اتولدت ست وهعيش ست وأموت ست النجمة لجمهورها، وأنا طلما بناتى شافونى كده هيهون عليا أى حد تانى، لأنى ببنى بنتين ولو حسوا أن مامى خلاص انتهت كان ممكن أنتحر دلوقتى، وربنا يسامحنى على اللفظ عادى جدا كنت هخلص من حياتى.

وأضافت وانا قولت للناس فى الحفلة تقبلونى بشكلى ده لأنى شكلى صعب والناس صففت واتبسطت مش عاوزة أركب باروكة انا مش فيك، كان ممكن أركب باروكة لكن ما قدرتش أكذب على الناس واضحك عليهم.

وأكدت أن شهر رمضان دايما بيبقى خالى من العنصر الترفيهى وربنا يقوينى لو قدرت أعمل ده فى رمضان الجاى أنا أكتر حد كوميدى ممكن تقابله فى حياتك ولو عملت كوميدى حقعد محمد سعد فى البيت.

وقالت: أمى أول واحدة عرفت قرارى بالطلاق وأصرت عليه وحسام لما راح يتقدملى أول مرة أمى قالتله أجرى أجرى احنا هنعيل وهى كانت عندها حق.

وتابعت: هى من الأول كانت شايفة اننا ما ينفعش لبعض وإننا لازم نفضل صحاب، وعاوزة أقوله انت إنسان كويس جدا ومحتاج تشتغل على نفسك أنت معدنك كويس جدا ومتربى وعنده حاجات حلوة كتير والراجل لازم يفضل راجل وعندك حاجات حلوة كتير هو كمان كان ظالم نفسه كان بينزل ألبوم كل 8 أو 9 سنين فحرام الظلم ده ربنا م بيدى فرص كتير للناس.

وأكدت أن الاكتئاب اللى عندى بسبب الكورونا وانفجار مرفأ بيروت ومش عارفة الناس اللى أول الدنيا ما اتفتحت طلعت على مارينا مش عارفة الناس دى اتعملت من ايه، يمكن ده اسلوبهم فى الحياة انا لسه مش عارفة اتخطاهم، وبقول لجمهورى ربنا يجعلكم دايما سند ليا ويجعلكم الحضن إلى فيه الحقيقة اللى مش بتروح.