الرئيس السيسي يفتتح مجمعين صناعيين فى الأقصر وبنى سويف عبر "الفيديو كونفرانس" ومحاور وطرقا جديدة.. ويوجه الحكومة بدراسة تقنين أوضاع المصانع غير المرخصة.. ويؤكد: مش بندور على الربح فقط والأهم الناس تشتغل.. فيديو

• الرئيس السيسى لأصحاب المصانع غير المرخصة: مش بنقنن الوضع عشان آخد منك حاجة

• الرئيس السيسي: "ما بحبش أفرق فلوس على حد.. عاوزه يصطاد مش أديله السمكة"

• الرئيس السيسي: لسه المشوار مخلصش.. التطوير والتحديث مبينتهيش"

• الرئيس السيسي: "اللى ينجح نساعده أكتر.. واللى ما ينجحش نساعده أيضا"

• الرئيس السيسي: نستهدف تحقيق الاكتفاء الذاتى للسوق المحلى

• الرئيس السيسي: "مش بندور على الربح فقط.. الأهم الناس تشتغل"

• الرئيس السيسي: مدينة الروبيكى اتأخرت 20 سنة وقدرنا نوفر حلول عشان تشتغل

• الرئيس السيسي: "فيه صناعات تكنولوجية مرتبها فى اليوم يصل لـ 20 ألف جنيه"

• الرئيس السيسي: "مصلحتنا الناس كلها تكبر.. والبلد تطلع لقدام"

• الرئيس السيسي: "الناس اللى شغالة مع الدولة جدعان أوى.. شكرا جزيلا"

• الرئيس السيسي: "الهدف مش إننا نمسك المصانع غير المرخصة الهدف تدخل المنظومة"

• الرئيس السيسي: مفيش بناء مخالف على المحاور الجديدة ودى مسئولية الجيش والشرطة

• الرئيس السيسي: "محتاجين دعم القطاع الخاص.. من فضلكم خشوا معانا

• الرئيس السيسي: محطات الخدمة على المحاور الجديدة ضرورة للسيطرة الأمنية

• الرئيس السيسي: نفذنا مشروعات بـ6.2 تريليون جنيه.. ولسه شغالين

شهد الرئيس عبد الفتاح السيسى اليوم السبت، افتتاح عدد من المشروعات القومية الجديدة بمختلف القطاعات بصعيد مصر، من محافظة قنا عبر تقنية الفيديو كونفرانس.

وشهد الرئيس افتتاح مجمعين صناعيين، الأول فى محافظة الأقصر المتمثل فى المنطقة الصناعية بمدينة البغدادى، والثانى المنطقة الصناعية بمدينة بياض العرب ببنى سويف.

كما شهد الرئيس عبدالفتاح السيسى، عبر تقنية الفيديو كونفرانس، افتتاح محور سمالوط فى المنيا، ومحور كلابشة فى أسوان، والمرحلة الأولى من طريق الصعيد الصحراوى الغربى.

كما افتتح الرئيس السيسى، محور المستشار عدلى منصور فى محافظة بنى سويف، كوبرى البلينة بمحافظة سوهاج، المرحلة الأولى من محور ديروط بمحافظة أسيوط، ازدواج طريق مرسى علم – سفاجا – القصر.

يأتى ذلك ضمن سلسلة من المشروعات القومية التى سيقوم الرئيس بافتتاحها اليوم، ضمن فاعليات "أسبوع الصعيد"، فى إطار جهود الدولة لتحقيق نهضة تنموية وخدمية متكاملة لأهل الصعيد، وتوفير فرص عمل مباشرة وغير مباشرة.

ووجه الرئيس عبد الفتاح السيسى، الحكومة برصد حجم المصانع غير المرخصة؛ تمهيدا لمعالجة أوضاعها وتقنينها، وقال موجها حديثه إلى وزير الداخلية اللواء محمود توفيق، ووزيرة التجارة والصناعة نيفين جامع، "نريد حركة بناء وليست رصد مخالفات وقضايا".

وأكد الرئيس السيسى - فى تعقيبه على كلمة وزيرة الصناعة والتجارة نيفين جامع، أن الدولة تسعى إلى مساندة المخالفين لتصحيح مسارهم، والدعوة لمبادرة تهدف إلى التعاون والعمل معا فى تصويب أوضاعهم؛ ودمجها فى المنظومة الصناعية؛ بما يتناسب مع المعايير المطلوبة.

وأضاف الرئيس السيسى أن الدولة تريد أن تعطى للمستثمرين أماكن خالصة الترخيص وبها جميع المرافق الأساسية وتمويل منخفض التكلفة، مع مساعدتهم فى عمليات التسويق؛ لتحقيق النجاح، حيث أن الدولة لديها خريطة بالمشروعات المطلوبة وحجم الطلب على المنتجات والخدمات.

وتابع الرئيس: كل يومين أبص الاقى وزارة الداخلية ماسكة مصانع بدون ترخيص، كان بيتعمله قضية.. قلت يا جماعة دى ناس حاولت تشتغل حتى لو كانت طريقتهم مش مظبوطة طيب انا اخليه مظبوط".

وأضاف الرئيس: "اشرعنه واقنن وضعه.. مسكناك غلط تعالى نعمل الصح.. لو مسكتوا مجموعة مصانع فى القاهرة طيب أقرب منطقة فين؟، أقوله تعالى اتحرك واشتغل وقنن وضعه ومش بنقنن الوضع عشان أحد منه حاجة، واوعى تكون فاكر أن بنتصيد الغلط.. بقولها لكل اللى بيسمعنى أوعوا تفتكروا أن البلد هدفها إنها تستجدى ضرايب إحنا مش بنتصيد الغلط بالعكس، انت حاولت حتى لو غلط، إحنا معاك فى المحاولة بس متعملش غلط.. قولى الموضوع ده حجم المصانع قد أيه وحجم الأشغال؟ اطمن بقا على التسويق هل إنتاجه ده قدر يبقا ليه نفاذ فى الأسواق ولا أيه؟.

وتحدث المهندس كامل الوزير وزير النقل، خلال افتتاح مشروعات قومية جديدة حول حديث الرئيس عبد الفتاح السيسى عن دعم الشركات والمصانع غير المرخصة بدلا من القبض عليها، قائلا: "شهادة حق فى الموضوع بتاع التصنيع والمصانع غير المرخصة.. وأثير فى الفترة الأخيرة بعض المصانع الخاصة بركائز الكبارى وهى بدون ترخيص.. وده موضوع رغم خطورته.. الرئيس عبد الفتاح السيسى تحدث معى بصفتى وزيرا للنقل.. وانا قولت احول الشركتين دول للنيابة واحقق معاهم ولكن الرئيس السيسى طالب مساعدتهم من أجل الحصول الترخيص والنجاح وتوفيق الأوضاع وبطمن حضرتك".

وليعقب الرئيس عبد الفتاح السيسى على حديث وزير النقل قائلا: "الكبارى مفيش فيه مشكلة.. والمشكلة صغيرة خالص وفى كوبرى واحد.. حجم الكبارى ضخم وطبقا للمواصفات وكل حاجة فيها زى الفل.. الشركة اللى بيتكلم عنها كامل الوزير اجتهدت.. ولكن كانت محتاجة دعم فنى عشان تخلص.. ولما حصل المشكلة دى كان الفكرة عن المسائلة.. الهدف مش اننا نمسك المصانع قد ما الهدف انها تدخل المنظومة.. والكلام مش دول بس.. بقول الكلام ده للوزراء المعنين بالموضوع.. يا جماعة عاوزين نتعامل بإيجابية مع التحديات ونحل مسائل الناس.. ونساعد.. ونوفر الدعم المطلوب ونقف جنب منهم".

وتابع الرئيس السيسي: "بطرحه على الناس عشان تسمعنا عشان تعرف أن الحركة بناء مش حساب.. القضية أن عاوزك تبقا كبير وحاجة حلوة قوى فى مصر.. تعالى نشتغل سوا أنا مش باصص على الإيجار ولو عاوزين تخفيض أكتر من كده ماشى.. اوعوا تفتكروا أن لما جينا نتكلم عن المجمعات الصناعية لما اتكلمنا عليهم قولنا نعمله عشان نوفر وقت للناس.

وأكمل الرئيس السيسي: "بوفر الأرض وارفقها وابنى عليها واديك الترخيص كمان يعنى تلاتة أربع المشوار.. طيب انا أقدر أعمل تانى مجمعات زى دى؟، قوى سهل خالص نقدر نعمل قد ده 10 مرات".

وقال الرئيس عبد الفتاح السيسي: "معندناش مشكلة أن إحنا نعمل والناس تشتغل، التفريق مشكلة عندى، ومحبش أفرق فلوس على الناس ده كلام مش مظبوط.. عاوزه يكبر ويثق فى نفسه ويكون عنصر داعم للاقتصاد المصرى.

وأضاف الرئيس عبد الفتاح السيسي: "مش عاوز أديله السمكة عاوزه يصطاد".

ووجه الرئيس عبدالفتاح السيسى، بمساعدة النماذج الناجحة وغير الناجحة، قائلا خلال افتتاح عدد من المشروعات التنموية فى الصعيد:"اللى ينجح أكتر نساعده أكتر.. واللى مينجحش نساعده أيضا".

وقال الرئيس السيسي: "لسه المشوار مخلصش، التطوير والتحديث مبينتهيش.. فيه الدعم الفنى بمدارس ومكاتب استشارية، وموظف من التجارة بالتنسيق مع المحافظة للمجمعات، والمحافظ يقدر ينظم عملية النقل عشان الناس اللى بتفتح تجد وسيلة انتقال كويسة".

وقال الرئيس عبدالفتاح السيسى، إننا نستهدف تحقيق الاكتفاء الذاتى للسوق المحلى، مضيفا: "لما ألبس قميص من مصر وكل المستلزمات الأخرى بكده بمستوى بره يبقا كده وفرت فرص عمل وعُملة صعبة وزودت الناتج المحلى".

وأضاف الرئيس السيسي: "نرجع لتجربة تانية بتاع مدينة الأثاث عملنا نفس الكلام، لكن تحرك الناس من دمياط لمدينة الأثاث مكنش بالسرعة اللى إحنا عاوزينها، فيه حاجة عندنا المفروض كنا وفرلنالهم منشآت ومستلزمات الخشب، لما متعملتش الراجل فى المدينة بيجيب الحاجة على رجله هناك هيركب مواصلة.. صرفنا مليارات ومُصرين على النجاح مش عشان ننجح فكرتنا.. المنتج المحلى منتج كويس، وقد يكون قوى، لكن تحتاج المنافسة بيه داخل وخارج مصر.

وتابع الرئيس: "لو مكونتش يا مصنع تطور، وهنساعدك ولو محتاجين تجيبله ناس من بره تطور الأذواق مستعدين.. اوعوا تفتكروا وإحنا بنعمل منطقة صناعية مستنيين حاجة، الـ 10 مليار لو موجودين فى البنك هايجيب مليار جنيه.. تفتكروا إيجارات المجمعات هيجيب كده؟".

وتحدث الرئيس عبد الفتاح السيسى، عن أهمية مشروع مثل مشروع مدينة الروبيكى، قائلا: "عندنا 825 ألف مشروع فى الروبيكى.. لو المشروع بواحد على الأقل.. يعنى 825 ألف أسرة فى 16 مليار جنيه.. يعنى تقريبا 20 ألف.. هنحط 40 ألف جنيه فى مليون.. يعنى 40 مليار دلوقتى".

وأضاف الرئيس السيسي: "الهدف إيه.. كتير مننا نلاقى بنعمل تجمعات جنب محطات الوقود.. وكتير يقولك ده كتير ده ومش بيجب فلوس.. وأنا أقول اعمل ده.. ويقولى ده مش بيجب فلوس.. أقوله فيه ناس بتشتغل يقولى اه.. خلاص ده الفلوس.. أن الراجل ده يشتغل ويرجع بيته ويكون فيه فلوس.. إذا كانا بنتلكم عن فقر وبطالة.. الحل إننا نشتغل كويس".

وواصل الرئيس: إنشاء 3 مدن صناعية جديدة وهى مدينة الروبيكى ومدينة الأثاث ومدينة النسيج، متابعا "بتكلم عن حاجة حاجة فيهم.. أن المسار اللى هو لو اتعمل بشكل نظرى لما ننفذه على الأرض ياخد وقت كتير.. لو اقتحمنا كل مرحلة من المراحل دى.. هنطمن أن المستهدف يمكن تحقيقه".

وأضاف الرئيس السيسى، : "الروبيكى فكرة موجودة من عام 2004.. فى 2004 كانت فكرة صح وتحدد المكان وكان صح وكل حاجة لكن امتى المدنية تدخل الإنتاج الحقيقى.. من سنتين بس.. بقول الكلام ده.. ما هو كنا موجودين.. لما جينا ندخل فى الموضوع لو عملت الموضوع ده هو خاف وقتها.. واللى اتعمل هيشتغل ويدخل فى الاقتصاد ونستفيد به.. وعشان كده معانا 825 ألف مشروع المفروض بواحد يعنى نستفيد بـ 825 ألف أسرة".

وأكد الرئيس عبد الفتاح السيسى، أن إنشاء مدينة الروبيكى كان بشكل متكامل، متابعا: "الروبيكى مش مجرد نقل فقط.. وقدرنا نواجه التحديات والمشاكل بس امتى لما الدولة تداخلت.. قدرنا نقنن الأوضاع".

وأضاف الرئيس السيسى: " انا بقول الكلام ده ليه.. وبسمع الناس أن إحنا لما الموضوع اتأخر فى الروبيكى.. اتأخرنا 20 سنة.. الـ 20 سنة دول على حساب حاجات كتير رغم أنه الموضوع بقالها 50-60 سنة.. لما نقلنا هناك طورنا بحوالى مليار جنيه".

وقال الرئيس السيسى: "الروبيكى لما تصدينا للموضوعات دى كلها وقدرنا نحلها.. وكان وقتها الوزير طارق قابيل يتولى وزارة الصناعة.. قولتلوه لما تنقلوا الناس من مجرى العيون والمدابح.. فى معالجة الأرض بتاعت مجرى العيون.. اتكلفنا حوالى 3-4 مليارات جنيه.. عشان نشيل النيكل والكروم".

وأكد الرئيس عبد الفتاح السيسى، أن الدولة تنفذ نموذجا جيدا خلال العمل فى مجال الصناعة، الروبيكى نموذج قابل للنجاح فى ظل التطور الكبير الذى يشهده العالم، قائلا: "بقول الكلام ده للناس اللى شغالة فى الصناعة.. لازم نعمل حاجة قابلة للنجاح.. التطور مش فى مصر بس.. ده فى الدنيا كلها.. حد هيجى يقولك الاشتراطات البيئية انت عامل فيها ايه.. فيه كلام كتير".

وأضاف: "ممكن البضائع كويسة ويصعب إنفاذها فى الأسواق الخارجية.. تجربة الروبيكى مش نجحت إلا لما الدولة تدخلت.. الروبيكى تجربة نجحت لما الدولة دخلت.. وجه المهندس طارق – وزير الصناعة وقتها- قالى مش قادرين ننقل الناس.. انقل الناس على حسابنا.. قولتله ننقلهم على حسابنا.. قولتله ماشى.. ودفعنا 100 مليون جنيه على حسابنا.. حد تانى يقول لا أنتم بتدلعوا".

وتابع الرئيس السيسى: "بنديله المكان اللى قاعد فيه وكل حاجة.. بناخد الناس على قد تجربتهم.. انا شايف الصح وصاحب المصلحة أن البلد تطلع قدام.. والناس تغنى ويبقى عندها طاقات وعمر الصناعات البسيطة ما تعمل غنى".

وطالب الرئيس عبد الفتاح السيسى بالاهتمام بالصناعات التكنولوجية المتقدمة، قائلا: "الناس اللى بتشتغل فى التكنولوجيات المتقدمة.. اليوم بتاعه بـ 10 آلاف و20 ألف جنيه كمان.. اليوم مش الشهر.. مش الاشغال البسيطة".

وأضاف: "طب نخلص الاشغال البسيطة الأول".. مشددا على أن المجمعات الصناعية الجديدة يجب أن تكون جاهزة بشكل كامل من ناحية توفير الكهرباء والمياه والغاز".

وقال الرئيس السيسي: "العدادات تكون راكبة موجودة.. عشان اللى يدخل المجمعات دى مش يعمل حاجة تانية.. وحتى المساكن اللى بنعملها لازم يكون فيها كهرباء وغاز ومياه.. وتحركنا كده ولما شوفنا النجاح فى الروبيكى.. قولنا نكمل ونعمل منشأت تانية".

وقال الرئيس عبدالفتاح السيسى، أن معالجة أرض مجرى العيون تكلفت 4 مليار جنيه، مضيفا: "لما الموضوع اتأخر فى الروبيكى 20 سنة كانوا على حساب حاجات كتير.. الروبيكى بقا نموذج كويس ليه ومكنش نموذج كويس قبل كده ليه؟".

وأضاف الرئيس السيسي: "لما جينا ننقل الناس من الروبيكى اطلب 100 مليون جنيه لنقل الناس على حسابنا قلت حاضر.. حد تانى يسمع الكلام يقول ايه الكلام ده؟ انتوا بتدلعوا بقا انت بتديلوا مكان كويس وتقولوا يلا تطور انا بتحترم ثقافته والمكان اللى قاعد فيه واخده على قد تجربته أنا شايف الصح، وأنا صاحب المصلحة أن البلد تطلع لقدام، إحنا كلنا شايفين أن المصلحة أن الناس كلها تكبر وتطلع لقدام.. عمر الصناعات البسيطة ما هتحقق غنا".

وتابع الرئيس: "لما نروح توشكى كما يومين وهنفتتح، نرد غيبة ناس مش موجودة ليه منجحش من 20 سنة وليه نجح دلوقتي؟..الهدف محاولة عمل نموذج قابل للنجاح فى ظل التطور الذى شهده العالم كله وليس مصر فقط".

وعقب الرئيس على كلمة وزير النقل: "الناس اللى شغالة مع الدولة جدعان أوى.. لما كوبرى أو محور يتكلف مليار ولا اتنين.. اقوله تأخذ 25% وتخلصه.. ده رقم كبير أوى اللى بيتأجل ده.. شكرا جزيلا".

ومازح الرئيس عبدالفتاح السيسى، أحد المقاولين الموجودين فى افتتاح عدد من المشروعات التنموية فى الصعيد، قائلا: "تشتغل فى دشنا وتخلصه بعد سنة؟ طيب تأخد الفلوس بعد سنة؟ يا حاج سعيد.. أحرجتك؟ هديلك جزء.. ورد الحاج سعيد قائلا: "اللى سيادتك تؤمر بيه".

وقال الرئيس لأحد المقاولين ويدعى هانى تادرس:" تخش تعمل كوبرى دار السلام؟.. طيب هتاخد%25 والباقى لما تخلص، فرد قائلا: "مستنى أوامرك يا ريس".

وقاطع الرئيس عبد الفتاح السيسى، الفريق كامل الوزير وزير النقل، خلال استعراضه للمحاور المقامة على النيل والمقرر افتتاحها اليوم فى محافظات الصعيد، قائلا: "الطرق الجانبية على المحاور دى ضمن "حياة كريمة" هل سوف يتم رصفها؟"، ليرد عليه وزير النقل قائلا: "دى داخل أراضى زراعية.. وممكن نمهدها.. ولكن الطرق الخاص بالأهالى والنقل داخل القرى يتم رصفها".

وأضاف الرئيس السيسى معقبا على حديث وزير النقل: "أنا اسف أقول كده.. بخاف الناس تتعدى وتنبى على المحاور دى.. ادرسوا الموضوع ده.. كل المحاور الجديدة الحفاظ عليها البناء.. نمنع الإنشاء على جانب هذه المحاور بعمق كيلو.. اللى بانى خالص.. الوضوع القائم مش يتغير.. المسئول عن ده القوات المسلحة ووزارة الداخلية".

وقال الرئيس السيسى، : معرفش عاملين خدمات للطرق دى ولا لأ؟..زى محطة وقود مثلا، بقول للناس اللى بتشتغل فى الطرق وعاوز تعمل محطة وقود وتشغلها إنت على الطريق ؟ فيه بعضهم مش اقتصادى بس النهاردة بتتكلم فى طريق 500 كيلو تفتكر لو عملنا على المحاور دى محطات الخدمة بسميها مناطق تنموية مبسمشهاش محطة وقود، واحد عاوز يخش ساعة يريح انتوا مستعدين تعملوا ده؟، منطقة الخدمة توفر عامل أمن ممكن يكون فيه سيارة إسعاف وإنقاذ وشرطة ووزارة الاتصالات تحط برج إشارة عشان يتغطى الطريق بالخدمة بتاعته".

وواصل الرئيس السيسي: "عشان أعمل محطات، ناس كتيرة متصورة إنه عشان تحصيل فلوس، ..... أه عشان تحصيل فلوس، ومازح الرئيس وزير النقل قائلا: "المليارات زى الكوتشينة".

وشدد الرئيس عبد الفتاح السيسى، على ضرورة دعم القطاع الخاص للمشروعات التى يتم تنفيذها داخل الدولة المصرية، متابعا: "محتاجين دعم القطاع الخاص.. زى ما قولت تانى مرة وتالت ورابع.. من فضلكم خشوا معانا.. والشركات اللى شغالة فى كل المشروعات التانية.. مش عاوز أقول كلمة تكون مش لطيفة يعنى.. هتبقى مش لطيفة لو قلت الجيوب اتملت.. هتبقى كلمة مش لطيفة.. الحاج سعيد والمهندس هانى.. الجيوب مش اتملت يعنى".

وأضاف الرئيس السيسى: "متشكرين.. شكرا جزيلا"، مداعبا الشركات المسئولة عن تنفيذ محورين جديدين بالصعيد: "اومال عاوز تاخد 25% منى ليه؟!".

وقال الرئيس عبد الفتاح السيسى، أن الهدف من إنشاء مناطق خدمات "تنموية"، على الطرق هو تحقيق السيطرة الأمنية، متابعا: "كل 20-25 كليو يكون فيه منطقة.. وده اللى بقوله على طريق زى كده.. كل 25-30 محطة خدمة "منطقة تنموية".. فى بعضها مش هيكون اقتصادى.. تكلفة الإنشاء قليلة.. لو حد عاوز يعملها لوحده.. هتكلف تلت أو نص الثمن.. ده هيعوض ده.. وده مش حكر على حد".

وأضاف الرئيس السيسى: "بقول لازم الصناعات المرتبطة للشركات اللى شغالة معانا تتطور.. بقول وقولت الكلام.. الناس فى مشروعات إنشاءات وبنية أساسية.. المحفظة بتاعتك نوعها.. نوعها مثل الحواجز والفواصل الخاصة بالكبارى.. القائم ايه والموجود بالفعل ايه وعندنا فرصة قد ايه وده ممكن من خلال وزارة الصناعة.. الإنشاءات مستمرة.. ودايما امداد للمشروعات.. تنوع العمل اللى بيتعمل".

وأكد الرئيس عبد الفتاح السيسى، معقبا على حديث وزير النقل، أن الفريق كامل الوزير تحدث عن مشروعات وزارة النقل ولم يتكلم عن كافة المشروعات الخاصة فى القطاعات الأخرى سواء هيئة المجتمعات العمرانية أو الهيئة الهندسية فى أماكن أخرى، متابعا: "بقول للى بنتكلم فيه فى الصعيد بس.. 1.6 تريليون جنيه للنقل بس.. أبو قير فيه أرصفة جديدة حوالى 6-7 كيلو بعمق 22 مترا على سبيل المقال.. مشروعات وزارة النقل حجمها كبير".

وأضاف الرئيس السيسي: "حجم أخر لم يذكر هنا.. ومش هقول المفروض أنه يقولهم.. بقول حجم العمل اللى بيتم فى مصر فى كافة القطاعات.. 1.6 تريليون.. 1600 مليار.. فى كل القطاعات.. الدكتور مصطفى مدبولى بيقولى 6.2 تريليون جنيه.. 6 آلاف مليار و200 مليون ولسه شغالين".

وتابع الرئيس السيسى: "الحاجة الأخيرة.. المحافظين على القطاعات دى وعلى أجانب الطرق خاصة فى المحاور الجديدة.. انتبه لعدم التعدى.. الحركة بقت سهلة.. يقولك ابنى جنب الطريق الجديد.. وانا جاى بالطائرة.. شايف الطرق الصحراوية شرق وغرب فاضية.. نبنى عليها وتتحرك 2 كيلو لأرضك الزراعية.. وبوجه كل الشكر لكل ساهم فى المشروعات.. نتحرك بقوة فى كافة المجالات".

وقال أحد الحاضرين: "عاشمنين فى هدية من سيادتك للموظفين"، ليرد الرئيس السيسى، قائلا: أنا ما بهاديش حد، أنا لا أهادى أبدا، أنا بعمل شغل بس، ومبديش فلوس لحد خالص".

وأضاف الرئيس السيسى قائلا: "اكرموهم انتم، ليرد: "تمام يا أفندم".