الرئيس السيسي خلال افتتاح مشروعات بالصعيد: مصر تحتاج إلى تريليون دولار موازنة.. وأنا لا بخاف ولا بيهمنى إلا البلد والعمر بتاع ربنا.. وربنا أنقذ بلدنا من الدمار.. واللى خايف على الكرسى كان بيقعد ويخرب.. فيديو

الرئيس السيسي: "أنا بصحى الساعة 5 الصبح وهنزل أشوف المحطات بنفسى"

الرئيس السيسي: "هيكون عندنا سكة حديد 100% لما نخلص الميكنة الكاملة"

الرئيس السيسي: "مش عاوزين تراب ولا لمبة محروقة فى سقف أى محطة قطار"

الرئيس السيسي: تطوير قطاع النقل تكلف 1700 مليار جنيه حتى الآن

الرئيس السيسي: "ما قربناش من سعر تذكرة القطار إلا بعد تطوير كافة الخطوط"

الرئيس السيسي: "محدش قال ليه اللحمة غالية.. التسمين ضعيف وبنستورد من بره"

الرئيس السيسي: "عايزين نغنى الناس.. مش تاخد دعم كل شوية وخلاص وما ننهضش"

الرئيس السيسي: "مهمومين بالصعيد.. والثروة الحيوانية محتاجة أن الدولة تشمر دراعاتها"

الرئيس السيسي يمازح وزير المالية: الدكتور معيط فى حالة اكتئاب دائم

الرئيس السيسي: "فيه فرق بين كلام المكاتب واللى بنعمله على الأرض للناس"

الرئيس السيسي: "أهلا وسهلا بالقطاع الخاص.. إحنا محتاجينه معانا"

الرئيس السيسي: الإصلاح فى قطاع الأعمال لن يكون على حساب العمال

الرئيس السيسى: القطاع الخاص شريك معنا.. ونزول الشركات البورصة توجه الدولة

الرئيس السيسي: عمرك ما هتحقق نجاح وأنت مستريح.. إحنا فى عالم متغير وعنيف

شهد الرئيس عبد الفتاح السيسي، ضمن أسبوع الصعيد، افتتاح مصانع جديدة منها مصنع كيما 2 للأسمدة وغيرها من المشروعات الجديدة.

والتقط الرئيس عبد الفتاح السيسى، صورة تذكارية مع الحضور بمنطقة بمصنع كيما 2 مصنع اليوريا ونترات الأمونيا بمنطقة كيما بمحافظة أسوان، والذى شهد افتتاح المصنع ضمن افتتاحات مشروعات قومية جديدة في محافظات الصعيد ضمن "أسبوع الصعيد".

وأكد الرئيس عبد الفتاح السيسي، أن المصانع الجديدة يجب أن يتوافر لها عناصر النجاح بشكل كامل.. متابعا: "أنا عاوز فرص نجاح للمصانع والشركات الجديدة منعا لتكرار اللى فات.. أى مستثمر أو قطاع خاص لما بيعمل مصنع جديد مش بيكون عنده مشكلة في تحديث العمل داخل المصنع ده.. لأنه قاعد بيدير صح".

وأضاف الرئيس السيسي: "الإدارة الجديدة مفيش فيها خواطر.. مش هعين حد في المصنع ملوش لزمة.. علشان قريبى أو معرفتى أو كلام هذا القبيل.. لن انسى عام 2011.. والمفروض يا مصريين مش تنسوا العام ده.. كل إجراء وخطوة مش تنسوا العام ده.. اللى انقذكم ربنا وحده.. وربنا اللى انقذ البلد دى من مصاير الخراب والدمار.. ولأجل خاطر الـ 100 مليون مصري.. ربنا انقذ البلد دى علشان البسطاء والغلابة.. لحكمة إلهية وربنا انقذها.. وهل هنكرر نفس المسار تانى.. لا طبعا.. الكلام ده لو هيزعلكم انا هاجى عليكم.. علشان خايف على البلد..مش تزعل الا على نفسك وانك ممكن تكون سبب في دمار بلدك وخرابها".

وأكد الرئيس عبد الفتاح السيسي، أن الدولة ترحب بالقطاع الخاص، متابعا: "القطاع الخاص شريك معانا.. هيدفع ويبقى معانا بفلوسه بقى.. بتوع قطاع الاعمال هيزعلوا منى.. انا بتكلم في مصلحة أكبر.. بتكلم في مصلحة البلد.. انها تعيش وتكبر.. البلد تعيش وتكبر وتبقى المصانع عبارة عن أداة في الاقتصاد ورفاهية المجتمع.. ده مش هيحصل إلا لما تبقى منضبط في التعيين والتشغيل"، متابعا: "الدولة المصرية ترحب بالقطاع الخاص.. القطاع الخاص عاوز يتفضل معانا في المصانع والمشروعات الجديدة يتفضل.. وده كلام بقوله لرابع مرة.. اهلا وسهلا بالقطاع الخاص.. احنا محتاجين القطاع الخاص معانا.. احنا أثبتنا أننا غير أكفاء في الإدارة على مدار 40 سنة اللى فاتوا.. ده عيب.. عيب الاستمرار على نفس المسار والاقتراض علشان التطوير.. وبعد شوية انا مش مش هكون موجود والوزير كمان مش هيكون موجود والمصانع دى تتدهور تانى".

وتحدث الرئيس عبد الفتاح السيسي عن الحوكمة في إدارة المصانع والمشروعات الجديدة: "الحوكمة.. يعنى كل قرش بيتصرف في المصانع دى وكل لمبة شغالة.. بقول كل قرش.. ولو حطينا في دماغنا.. الحملة اللى بتنقل العمالة جزء من الحوكمة.. هنقل منين.. القطاع الخاص بيعمل كده".

وأكمل الرئيس السيسي: "كل مصنع كان موجود له حتة أرض زيادة.. ونعمل جمعية وبنبى مساكن للعمال وماله.. ولكن كل حاجة لازم تكون بحساب.. ده مش تكون الكهرباء والمياه والغاز على الشركة.. مش مندهشين ومستغربين.. عرفتوا ليه بلدكم كانت هتروح في 2011.. وكانت هتتخرب وتضيع وانا بتتكلم ليه علشان البلد.. التسعير نقدر نحله إزاى مع وزارة الزراعة وكنا قلنا يا جماعة حاولوا تقدموا الدعم المقدم للمزارعين الى فلوس تتحط.. عاوز أدى للفلاح دعم في شيكارة ولا اثنين طبقا للمعايير المعمول بيها للفدان طيب ما ادهاله دعم نقدى علشان أحرر وأمنع الفساد المحتمل في إدارة المنظومة اللى مشيين فيها.

وقال الرئيس عبد الفتاح السيسى: "مش ده التجربة بتاعتنا على مدى 50 سنة..  طيب التجربة دى مش قابلة للتصويب وده معناه ان اللى قبلنا مش كانوا وحشين.. لكن التجربة قالت انها لازم تتصلح.. نصلحها ولا نقعد نتفرج عليها.. كلموا الناس زى ما انا بتكلم هتجدوا الناس معاكم اكتر مما تتخيلوا.. الناس عاوزة المصلحة والمواطن عاوز المصلحة ومصلحة بلده واستحمل معانا السبع سنين اللى فاتوا في إجراءات صعبة جدا لانه حس بفطرته وذكائه ان فعلا فيه محاولة للإصلاح من جانب الدولة".

وأوضح الرئيس عبد الفتاح السيسي، أن الدولة المصرية تسعى للحفاظ على العمالة خلال عملية الإصلاح في قطاع الأعمال.. كل النقاش في عملية الإصلاح في قطاع الأعمال شايفين العمالة والحفاظ على حقوقها.. وبنحاول نعمل إصلاح، متابعا: "كل إجراء للتصويب والإصلاح لا يمكن يكون على حساب العمال.. العامل ملوش ذنب في عملية الإصلاح.. وبالتالي مفيش إجراء إلا بنأكد الحفاظ على حقوق العمال.. الدولة فقط تتحمل التكلفة.. ومش العامل.. اهل الشر بياخدوا الكلام وبيعملوا عليه.. الإصلاح لن يكون على حساب حقوق العمال.

وتابع الرئيس السيسي: "بقولكم وكل زمايلنا اللى في شركات قطاع الاعمال ممكن يختلفوا معانا.. يقولك لأ إحنا بندير كويس أرد عليك وأقولك بامارة إيه؟ بأمارة مجالس الإدارة اللى فلوسها بالكوم.. على الهواء بتتكلم كده؟، أه طبعا ..لا بخاف ولا بيهمني إلا البلد بس، لكن مبخفش من حد خالص.. العمر بتاع ربنا والمكان بتاع ربنا وقت ما يقولى يلا عظم وامشى".

وواصل الرئيس السيسي: "إدارة القطاع العام والحكومة ليست ذات كفاءة ولا تحقق النجاح المطلوب.. ممكن تحقق نجاح لكن النجاح ده في مصر وظروفك الاقتصادية مش عاوز نجاح عاوز تفوق وقفز.. مينفعش تقولى حققت 5 او 10%".

وقدم الرئيس عبد الفتاح السيسي الشكر لأهالي أسوان على تحملهم للتلوث الناتج عن تطوير مصنع كيما: "مش هنسى أقول للناس في أسوان تحملتم شكل من أشكال التلوث وأوعدكم إن المعايير البيئية حققت حماية حقيقية لكم، متابعا: "نحافظ إحنا كمان كمسؤولين عن المشروع باستثمار هذه المعايير مش هذا المشروع فقط بل مشاريع القطاع الخاص أيضا لأن البيئة مصلحة الناس كلها ومحدش يؤذى غيره علشان المنشاة مشتغلتش كلها".

وقال الرئيس السيسي: "فيه أجهزة فى الدولة بتراجع المصانع بتاع القطاع القطاع الخاص والعام محدش في هذا الموضوع يستثني، كلنا زى بعض لأننا بنؤذى بلدنا.. وأشكر الوزير هشام ومجموعة العمل وأشكر القائمين على التطوير في مصنع كيما والمحالج، متابعا: "لكن مش عاوزين ننسى ان التطوير لابد ان منغلطش غلطات مشينا فيها قبل كده.. توجهنا أن القطاع الخاص يبقا شريك معانا والشركات تنزل البورصة وده توجه دولة.. علشان القوائم المالية والمراقبة الحقيقية التي تساعدنا في تحقيق المعايير".

وتابع الرئيس السيسي: "اعتبرنا وجودنا في المؤتمرات دى منصات الناس تستفيد منها والاعلام أيضا.. والكلام بتاع وزير الزراعة ان رى فدان القصب ورى بالتنقيط او بالشتل أوحجم العائد بتاع ايه.. هكلم المزارع اللى عنده فدان او اثتين انت عندك خيارات تعظم دخلك لو سمعت كلامنا وهنساعدك، قائلآ: "عمرك ما هتحقق نجاح وانت مستريح.. وبقول الكلام ده لينا من اول انا وانتوا نازلين.. ان ارتحت مفيش مكسب لأننا في مكان متغير عنيف مفيهوش مكان غير اللى بيشتغل ودماغه في شغله وفى حاله ومحتاله.

وأكد الرئيس عبد الفتاح السيسي، على ضرورة اتباع النظم الحديثة في الزراعة.. النظام الجديد يزود الإنتاج في الفدان وبالتالي يزود الدخل والإنتاج.. وانت مش دفعت حاجة من جيبك.. فيه فرق بين كلام المكاتب واللى بنعمله على الأرض للناس، متابعا: "اقصد أقول مهم الرى بالتنقيط يعمل معاك زيادة ويطلع زراعة كويسة ويقلل سماد وتلوث ويوفر في الأعمال.. وانا محتاج مياه.. لو مليون فدان بالتنقيط هوفر منها مياه وازرع فدانين تانى انا عاوزين نتكلم مع بعضنا... المواطن عارف ازرع بالشكل ده.. ونعمل مشاريع شتلة.. أنا مستعد ادفع 100 ألف شتلة.. طالما دفعت بقى بتوعى أنا واديهم للناس.. لما يكون عندنا 300 ألف فدان ونحولهم من الزرع التقليدي للشتلة وبالتنقيط".

وتابع الرئيس السيسي: "بندفع فلوس ودعم نزود الزراعة ونقلل المياه والسماد.. مش علشان الانفاق والدعم يكون في محله بس.. علشان نعظم الموارد.. أكبر قدر من الإنتاج باقل من السماد والمياه"

وشد الرئيس السيسي، على أن الدولة المصرية تسعى لزيادة إنتاجية الفدان الواحد.. بدل ما يكون الإنتاج 80 ألف طن يكون 100 ألف طن.. لما شوفت ترعة توشكى خلال أسبوع الصعيد سألت هل يمكن وضع سمك فيها وهل يعملوا مشكلة للري.. قالوا لا.. طب انت فاكر توشكى تقدر ترمى فيها سمك لمدة سنة و2 ويبقى عائد كويس.. هتجيبوه ازاى وتنقلوا ازاى.. لما بتكلم قدام الناس.. اهتموا بلدكم وخافوا علينا.. الفرص موجودة.. وربنا سبحانه وتعالى.. مفيش عصفورة قالتاه لو طلعت هتاكلنى ولا .. بتطلع وتلاقى رزقها.. وده مخلوق ضعيف وربنا بيرزقنا.. ولازم نجرى على رزقنا.. ومفيش فرصة لحاجة زى كده والا لما تتعمل".

وقال الرئيس السيسي: "المواطنون يبحثون عن فرص عمل.. المواطنون فى اسوان مثلا اللى عاوزين فرص عمل.. طب لو جيت وقولت تعالو ننزل على 50 ألف كبرنامج قومى لمحافظة أسوان.. وننزل عليهم ونقعد كمسئولين على الأرض دى.. نحولهم للزراعة "شتلات".. الـ 50 ألف فدان دول كلهم شتلات.. ده كده التجربة هتسمع والطريقة هتسمع والناس قاعدة على رؤس الغيطان علشان كده.. زيادة الإنتاجية هتكون 50 %.

وتابع الرئيس السيسي: "المواطن أنا مش عاوز منه حاجة.. أنا عاوز أديله وأغنيه.. إحنا سوق متواضع لأن اللى بينتج الفدان 40 طن لما يجبله 60-70 طن لا بقى.. طب وعلى مستوى المساحة كلها.. والدولة المصرية لديها الفرصة الكاملة من أجل زيادة الإنتاج في كل شيء.. عندنا فرص حقيقية.. لما نجيب أمام الله.. اقصى طاقة في كل شي.. في القصب أقصى حاجة.. وبحيرة المنزلة وبحيرة ناصر اقصى حاجة هييجى خير.

وأكمل الرئيس السيسي: "لما نريح ونقول بالشتل والموضوع كلمتين منك وأنا اسمعهم طبعا لا.. ولازم الرسالة والإجراء يكون وصل للناس اللى تحت.. لازم مديرية الزراعة تعمل وتحط برامج مع المحافظة والمواطنين ومؤتمرات وكلام.. أنزل الأرض وأشيل القصب القديم بعد 5 سنين من دورة الزراعة.. ونحط الشتلة الجديدة لزيادة الإنتاج.. وحد يقول أشيل 50 ألف فدان واحط الشتلة ومش مهم الفارق لأنه هيعوض".

واردف الرئيس السيسي: "قولت قبل كده اللى عنده رأس ماشية بتجيب 5-6 كيلو لبن.. وفيه رأس ماشية أخرى بتجيب 30 كيلو لبن.. ده بيظلم نفسه.. أنا بتكلم مع أهلنا في الصعيد.. لازم نطور في موضوع الماشية ده.. إحنا مهمومين بالصعيد ومستعدين للتغيير.. وبناخد القرار علشانكم.. خلى الناس تاخد من رأس الماشية اللى انتاجها أكبر.. ووزع اديله تانى علشان يبقى عندك حق.. الثروة الحيوانية في مصر إنتاجها فيه فرق في التسمين.. رأس ماشية تطلع نص كيلو في اليوم ورأس تطلع 1.3 كيلو في اليوم.. كده كده بأكل.. فيه اللى بأكله يدنى نص كيلو ولا يدينى 1.5 كليو.

واستطرد الرئيس السيسي: "لازم الدولة تتصدى وتشمر دراعاتها.. وعندنا برنامج لتحويل الوضع ده فى مصر لمدة 3-5 سنوات.. ده يذبح ونربى الجديد لأنه أفضل في التسمين وكمية اللبن.. عاوزين نغني الناس مش الناس تاخد دعم كل شوية وخلاص ومننهضش.. أوعوا تفتكروا رقم الـ 62 مليار تكلفة فروق الفوائد لدعم المشروعات اتحط من غير تكلفة على الدولة".

وقال الرئيس السيسي: "لما جينا نعمل الفكرة الناس قاومتنا رغم إن المصلحة في الجنب التاني..انا بدخلك في نظام مش محلى بدخلك كمنتج.. وبقدر أقول إن حجم الفاقد تقل وجدارة المنتج تزيد.. كان عندنا الف مركز قلنا نبدا 200 واصبح لدينا 160.. الجاموس بتاعنا اتاخد لدولة عملتله تعديل وراثى، كان بيطلع 6 كيلو لبن عملته 25 كيلو لبن ..يا نهار أبيض !!!!!!.. طيب إحنا مش قادرين نخلى الجاموس مع الناس.. أوزع من ده وادفع دعم لده..أيوه ..ليه؟ لأن أنا هغير حياتك كنت هتطلع 5 كيلو دلوقتي 25.. المواطن لديه الخيارات الكافية لتعظيم دخله، فهناك 350 ألف فدان مزروعين بقصب السكر يحققوا 40 لـ45 ألف طن قصب للفدان، من خلال الري بالتنقيط، والرى بالتنقيط زراعة كويسة يقلل تلوث ويوفر العمالة.

وتابع الرئيس السيسي: "الـ300 ألف فدان في 40 بنحو 1.2 مليون طن قصب، لو خليته 1.8 مزودتش أرض ولا ميه أنا زودت زرع عن طريق الزراعة الرأسية فالمواطن صاحب مصلحة.. متخفش هو احنا بنسعر دلوقتي؟ ما تزودوا سعر السكر؟ وخلى الناس كلها تكسب عمالين تمسكوا ده وده وتمسكوا ده.. انت زودت للفلاح 50% اكنك اديته بدل الـ 800 يبقا 1200 وأنت مدفعتش حاجة من جيبك"، متابعا: "عندنا حصر زى ما بيقول وزير الزراعة 3.7 مليون رأس ماشية.. يعنى 4 ملايين رأس ماشية.. لو قولت نذبحه منهم علشان محتاجين لحمة أكثر.. وبنجيب كمية من بره.. اللحمة غالية.. طب غالية لانى كيلو اللحم بدفع الثمن فيه يجبلى نص كيلو.. ممكن اكله وادفع نفس الثمن ويجيلى كيلو وشوية.

وقال الرئيس السيسي: بأكل الماشية نفس الأكل ودى بتجيب 5 كيلو ودى بتجيب 20-30 كيلو.. يبقى مفيش حلم لتحويل ده إلى اللبن يبقى كتير ويرخص.. طب ما يرخص.. لما يكون عندى 5 رؤوس ماشية تجبلى 120 كيلو لبن.. السعر يرخص وابعت ده لكيلو.. لكن مش معايا مش هبعتلك.

وأكد الرئيس عبد الفتاح السيسى، أن تطوير الثروة الحيوانية في مصر يحتاج إلى الحلم، متابعا: "انا كوزير الزراعة أحلم.. ده المستوى كده... تقعد تدخل في الموضوع تكسر في التحديات طب البرنامج كام سنة.. طب المحافظ ومديرية الزراعة معايا.. طبعا وكل يوم.. كل رأس ماشية تتغير أنجح وأفرح.. بقى عندى أمل كل ما العدد يزيد.. هو انتوا مش بتحلموا ليه.. طب انت الحاجة بقولها على الهواء بدل الترابيزة.. يبقى الترابيزة والهواء بقى.. بقول الكلام ده لأن حالة الفقر لها حلول".

وتابع الرئيس السيسي: "واحنا في اجتماع جامعة كفر الشيخ.. أحد رؤساء الجامعات قالى ممكن نعمل مصنع للنباتات العطرية.. احنا مش خرجنا.. الفرص موجودة مش لاقيين اللى يعملها.. احنا معانا لسه فرص مش خلصت.. ممكن نعمل مصنع بمليار جنيه بدل ما التصدير هنطلع منها قيمة مضافة.. هنشغل الناس في المصنع.. هيعلى الحاجة بتاعتى.. الطن بدل 100 دولار يبقى ألف دولار.. انا بتكلم ليه وليه مش عملناه.. ازاى مش يتعمل.. مزارع الرمان بقالهم 5-6 سنين.,. مفيش مصنع.. ليه مش اتعمل.. مش أنا اللى أعمله.. ليه مش جبت المستثمرين والمحافظ وجاب الناس اللى شغالة.. والمقاولين.. والاثرياء في المحافظة.. تعالوا نعمل حاجة زى كده.. وانت تديروا.. الدولة تدخل 50% واعملوا المصنع والناس تشتغل ونحول الحاجة دى لكده.. مهو الرمان بيحصلوا ايه بيترمى.. لكن لما عمله قيمة مضافة مش يترمى.. كيلو اللبن لما اعملوا مبستمر ولبن بودرة أفضل.. قيمة مضافة تقلل الفاقد".

وتحدث الرئيس عبد الفتاح السيسي عن نواب البرلمان قائلا: "النواب قبل موسم القصب يطلبوا زيادة السعر.. والنبى زود السعر شوية.. نواب الشعب على دماغنا.. يا جماعة البرلمان بدل ما تقولى زود السعر.. طب هزود قد ايه 50 -100 جنيه.. انا بقولك على حاجة تزود 20 طن.. يعنى 50% زيادة.. يعنى الزيادة أكبر والإنتاج أكبر.. لما تقولى الفدان يجيب 65 ألف فدان.. طب لا ليه.. ليه مش يكون 70 ألف طن.. صعب ولا عاوز متابعة وحرص وإصرار.. كتير من الكلام بيتقال.

وفيما مازح الرئيس عبد الفتاح السيسي، الدكتور محمد معيط وزير المالية.. والله العظيم الدكتور معيط في حالة اكتئاب دائم.. والدكتورة هالة السعيد أكتر حاجة تعملها ابتسامة لطيفة وخلاص.. مفيش ..هتموتنا يعني ولا ايه؟ إزاى ان احنا نعرف واللى هما يعرفوه نتقابل على أرضية مشتركة لتنفيذه فعليا.. انت عاوز تملا جيوب الناس حد يقولى املا جيوب الناس.. أديهم ايه يا افندم ؟ طيب انا عندى ما أهو واعز واكرم ويحقق نمو ويخلي وزير المالية اللى هنخلص عليه من اللى بنعمله فيه.

وأكد الرئيس عبد الفتاح السيسي أن الدولة المصرية لم تقترب من سعر تذكرة القطارات إلا بعد التطوير الكامل، متابعا: "قولت يا كامل متقربش من سعر التذكرة إلا لما تحدث العربيات.. وكل قطارات مصر مفيش عربية ولا جرار جديد.. ومفيش على السكة كلها.. القاهرة والإسكندرية واسوان وبورسعيد.. مفيش قطار واحد قديم.. مفيش على أي خط في مصر عربية قديمة".

وأضاف الرئيس السيسي، خلال كلمته في افتتاح مشروعات جديدة بالصعيد: "التسعير.. طب ما كامل الوزير يشيلها أو رئيس الوزراء يشيلها.. انا عاوز يوم القيامة ربنا يشيلنى كل حاجة عملتها.. علشان كده بقول دلوقتى.. بنحط أسس لدولة جديدة كما نتمنى ونأمل.. طب ليه مش جبنا كام حادثة في السكة الحديد وتعليقات الناس ايه.. ونخلى وزير النقل لا مؤاخذة والحكومة.. وشوفوا عاملين ايه.. المسئولية مشتركة.. احنا عاوزين نجرى مع بعض.. غير كده مش هينفع.. قطاع النقل وصل إلى 1.7 تريليون جنيه.. يعنى 1700 مليار جنيه.. بقول الكلام ده للمصريين علشان محدش وهو بيكلمكوا يقولكم السكة الحديد تعبانة ليه؟.. أصل الحكومة مكنتش كويسة.. لا.

وقال الرئيس السيسي: كامل يقولى التذكرة بجنيه يقولى أزودها؟ أقوله متزودهاش، ليه يا كامل؟ مبيقولش ليه؟.. خايف.. حتى لو كانت البلد تخرب علشان الكرسى يقعد هو ويخرب فيها ويخليها بلد كُهن.. سكة حديد تعبانة وطرق تعبانة وموانئ تعبانة كله تعبان.. مش فكرة إرادة.. الناس كانت عارفة كويس العلاج كان عاوز فلوس وتقدر ترجعها.

وشدد الرئيس السيسي على أن الدولة المصرية تحتاج إلى موازنة "تريليون دولار"، من أجل توفير الإنفاق المطلوب، متابعا: "إحنا دولة عددنا عاوز تريليون دولار موازنة.. الموجود منه 3 تريليون جنيه.. 14 تريليون جنيه يتجبوا منين.. مش هيتجبوا.. يحصل انهيار وضغط على المرافق بأسلوب الإدارة.. لما نزهق نطلع نهدها.. ومحدش يطلع يقول الناس بقت مهجرين والبيوت خربت.. والناس تترمى في البحار.. البلد مبتطلعش كده.. بتطلع بالمتابعة الدقيقة والإصرار والعناد.. محدش هيعيا من الجدية والهم لأن ربنا هيحميك.. اللى يهتم بالناس ربنا ميحمهوش؟ لا.. هيحميه ويحافظ عليه ويقويه طول ما انت بتجرى على الناس.

وتابع الرئيس السيسي: "لازم تعرفه ليه البلد دي ضاعت.. بحيرة ناصر كانت بتطلع 80 ألف طن ليه نزل.. وزارة الزراعة متمثلة في هيئة الثروة السمكية الكلام ده مش بحيرة ناصر بس.. كمان البردويل والمنزلة وكل البحيرات كانت بتطلع سمك قبل استزراع السمك طيب تقولى لو البحيرات بتطلع انتاجها كنا مش هنحتاج استزراع لا.. كنا هنحتاج علشان الزيادة السكانية".

وأوضح الرئيس عبد الفتاح السيسي، أن تطوير محطة أسوان والسكة الحديد لا يقتصر على السياح فقط ولكن المواطن المصري.. المواطن المصري يستحق للإنسان المصرى أولا.. المفروض مش يكون فوق السقف ده حتة تراب.. وأى سقف أى منشأة بننساها.. وتحت مش يكون فيه حتة ورقة مرمية.. لا تراب فوق ولا لمبة محروقة.. ولا حاجة مرمية على الأرض، متابعا: "عارفين ليه الناس كانت بتضرب الأرض بالطوب. علشان كده شكله كان تعبان.. كان رافضه.. لكن لما بقى كويس.. واللى يعمل كده نحاسبه.. مش نقبل أن محطاتنا يبقى عليها نقطة زيت أو مياه على الأرض.. طب ازاى معرفشى أنا مالى.. أنا مليش دعوة.. مش عاوز لمبة محروقة ولا تراب فوق السقف.. عاوزين نشوف شغلنا.. العمل تعمل الشغل.. لو جيت كل يوم وعملت اصطفاف للعمال وتراجعهم وتشوف ايه المطلوب وتعمل".

وتابع الرئيس السيسي: "إحنا اللى نتكلم وأنتوا اللى تعملوا كل حاجة.. كل حاجة حلوة.. لا ستارة تتقطع.. ولا لوح زجاج في المحطات أو القطارات مكسور.. وهروح أنا اشوف بنفسى أنا بصحى الساعة 5.. وعاوزين نشوفها على طول كده.. عاوزين نظام عمل.. مش عاوزين لأنه حد بيجى يشوف.. الفقير بيدفع أكثر من الغنى.. عربة نقل البضائع في السكة الحديد لما مش تتوفر انقل بالعربية والتكلفة هتكون أكبر في الحالة دى.. لكن لما تخرب السكة الحديد.. ندخل بالعربيات تبوظ الطرق.. ويبقى فيها حوادث.. كل موضوع مش بناخد بالنا منه يكلفنا أكثر.

وأضاف: كل وزراء النقل السابقين يعلمون ويرغبون في تغيير داخل القطاع.. الناس دى مش موجودة معانا.. هو احنا خلصنا ميكنة السكة كلها.. لا لسه.. بقول كده للناس تسمع ده.. الميكنة يعنى إيه.. يكون عندنا ألية حديثة تنظم الحركة والعمل على السكة الحديد بشكل بدون تدخل بشرى أو أقل حجم من التدخل البشرى.. وبالتالي لا يوجد أخطاء.

وقال الرئيس السيسي: "إجراءات الأمان مع البشر بتكون أكبر وتأخد وقتا أطول.. المكنة مش بتغلط.. احنا نقدر نقول بالمطلق بقى عندنا سكة 100% بعد الميكنة الكاملة.. لما بنتكلم على حركة يعنى معدات.. وبنية أساسية ورفع الكفاءة.. والخطوط والمكينة.. الأرقام المالية دى كبيرة اوى.. كان ممكن نقول ميكنة كل منطقة والتكلفة كام .. والمنطقة دى من أجل الميكنة تم الحصول على قرض من اليابان بكذا.. وهكذا كل منطقة يتم الميكنة فيها.. وعلشان الناس تبقى عارفه انه الكلام ده مش بموازنة الدولة.. ده عبء على الدولة والأجيال القادمة.. علشان محدش يقولى فين الرحمة.. المسئولية مشتركة علشان البلد تتحرك.. لما نخلص ميكنة السكة الحديد هتكون زيها زى أي دولة متقدمة.

وسأل الرئيس عبد الفتاح السيسي، الفريق كامل الوزير وزير النقل، عن دفع الأموال للهيئة الهندسية، ليرد عليه الفريق كامل قائلا: "لما كنت في الهيئة الهندسية كنت طالب من وزارة النقل عليها 44 مليون جنيه حصلت على 4 ملايين وضربوا على الباقى.. ولما جيت حاولت ادفع للواء إيهاب 40 مليون ولكنه طلب 44 مليون.. ولو سمحت لى تكون دى هدية لوزارة النقل وللشعب المصرى من القوات المسلحة".

ليرد عليه الرئيس السيسي مداعبا: "الفريق محمد زكى وزير الدفاع بيقولى عليه 75 مليار"، ليرد عليه الفريق كامل الوزير: "ده جيشنا.. ولو مش يعملنا ويساعدنا مين اللى يعملنا ويساعدنا".