مؤلف ملحمة هجمة مرتدة لـ"مساء dmc": العمل الكتابى للمسلسل أخذ 18 شهرا

قال الدكتور باهر دويدار، المؤلف والسيناريست لمسلسل هجمة مرتدة: "أنا دكتور تخدير، ولكن الكتابة كانت هواية ومن وأنا طالب فى المدرسة ولما دخلت الجامعة بقى يعلى معايا الموضوع، وألفت مسلسل حكايات بنات، وبعدها حق ميت، وكلبش، والاختيار.. وكان عندى حلم أعمل مسلسل فى الجاسوسية.. وتحدثت مع شركة سينرجى.. ومحتاج ملف معاصر ويمس المواطنين.. وتم عرض أكتر من ملف وتم دمجها.. والمشروع بدأ 6 شهور تجميع وتوثيق فقط، وبالتنسيق مع المخابرات المصرية.. وبالرغم من مشاغلهم الكثيرة لا يوجد شيء طلبناه منهم إلا وعملوه".

وأضاف خلال لقائه ببرنامج مساء دى أم سى المذاع على قناة إكسترا نيوز، تقديم الإعلامية جاسمين طه: "أتاخدت الموافقة على المعالجة.. وأخد العمل الكتابى 18 شهرا.. وبدأت ألف داخل إطار الواقع والحقيقة، وما حدث لازم يكون واقعة حقيقة عشان إحنا نحكى تاريخ ولابد نكون أمينين جدا فى نقل الحقيقة".

وتابع: "عندى مشروع من أول كلبش والاختيار وهجمة مرتدة، عشان إحنا الجيل اللى شاف مسلسلات لما كنا صغيرين عن حب الوطن وبيحكى لينا الواقع عن البلد.. ولكن الجيل الأصغر حاليا معندوش خلفية عن اللى بيحصل ولكن علينا مسئولية إننا نعمل زى ما عملوا لينا الكبار لتقديم له الحقيقة عن الوطن ونعرضها له بطريقة أبسط ما يكون، ولو مقلتلهمش غيرى هيقول لهم كلام تانى".

وأوضح أن "تصوير المسلسل فى أكثر من مكان والتأجيل أدانا فرصة كبيرة للخروج بأحسن جودة.. وهناك جزء تم تصويره فى أوروبا الشرقية وجزء فى الأردن.. وهدف المسلسل إننا نحكى الحقيقة".