ننشر قصيدة جديدة لـ الشاعر ماهر مهران بعنوان " كنت ما بعرفهمش" يحاور فيها بطريقة شعرية التغيرات التى تطرأ على الإنسان، والتغيرات التى تصيب البعض مع مرور الزمن وتبدل الأحوال.
حتَّى اللى باعرفهم طِلِعت ما بعرفهمش
يا تراب طلع دهب
يا دهب قَّلّب على قش..
ليه الثمرة طلعت مرة حنضل
وليه كان الخداع فى العِرش؟
وليه اللى كان مالاقيش اللضا بقى باشا
واللى كان باشا شبع لطش؟
وليه كل اللى راهنت عليه يزهزه
انهار كأنه خص؟!
ساعة ما السيل بص
ساعة ما الزمن حط
وجاب بدال الأسودة غنم وبط
ووطّى وباس إيدين القرش؟!!
وليه النشاز ماشى
والمارش بيتعزف للْطُرش؟!
وليه الشِّمال عارف سكته
وليه أنا طلعت تايه فى دنيا غش
دنيا قش
دنيا حفرة نار نصبوا عليها خُص
وسط ناس مابيعرفونيش
ومابعرفهمش؟!
وأبص
ألاقى الناس نعوش!!
أبص
تسقط قدام عينى الوشوش!!
أنا اللى عشقت اللى بيخسرني
وظلمت اللى عاش يجبرنى
أنا لوغاريتم حيّرنى
عاش يومينه يهتم بالعليق
ومايكسبش..
يطبطب على هزازة ما بتقدَّرش
يخلى قلبه درع لناس
بعد ما شاب
اكتشف إنه ما يعرفهمش!!
يا ريتنى كنت كائن هلس
لزج
وملس
لا موقف ولا مبدأ
كائن كل ما يتهان
يضحك ويبدأ
لا هو جن ولا أنس..
كائن دمس
تعلب ونمس
بين التبن والغلة
الاسم نمس
والوضع قِلِّة
كائن لا بارد ولا سخن زى مُيّة الْقُلة
كائن ساعة الهوجة
يتخلط زى بودرة السيراميك بالغلة
لا عهد ولا ملة
بيرشح زيف
ويهطّل فى الطريق تخاريف
كائن عاش الحياة خفيف خفيف
كائن مزبلق لكن زبلقته عملت منه بنى آدم نضيف
بعد ما عاش سنين تحت النعل ديب
فى دنيا بتطحن الأصلا
وتطبطب على ولد ...
وتعلم ببخل
وعلامها بعد وقوع السلاح
وانتشار الشيب والكسر
القصب بيشحت المية من الصخر
والعفن بيمرمت سنسفيل أم العطر
والقمح بيبوس أيدين الفطر
والصحرا شمتانة فى عطش جزاير النهر
والغزلان مش غزلان
واللى حبيتهم زمان
جه الوقت اللى أقول:
إزاى بطون أمهاتهم شالتهم؟!
وليه الدنيا فرش فكهانى
بيرقص للى معاه مال؟!
وليه الناس بقيت غريبة الأحوال؟!
وليه بتطلع التعابين كل ما نفخنا ف ناى؟!
وليه خوفنا حرّمنا نقول إزاى؟
وليه أصبح مفيش حد يستاهل بشاشة الجاى؟
غير الحيطان اللى قاومت المزاريق
والنقش ع الأباريق
والحفر الصابرة على هلاسة المخاليق
والندى لمّا يبل الرّيق
وضلى اللى أخلص لى وقت الزعل والضّيق
وملمس النيل بعد الحريق
ونفسى اللى حمدت ربها على ساندوتش فول
وكباية شاى
وحجر قص
وبدنى اللى خس
وقصيدة طلعت من العضم فى الغيطان كأنها آية
السما قلّت بأصلها معايا
والأرض لوعدها ما صانتش
وبقيت فى السنين الكبيسة فريسة
والمقالب كلاب بتنهش
وما بترحمش!!
أنا كنت وحش
وأرض عفية ما بتنكرش بذرة
وفرحة بكرية
وفجر عمره ما دخل بأيد فاضية..
ليه دلوقتى اللى عشت باعرفهم دمَّرونى بالقاضية
بعد ما خدوا الخير
وردوه شر؟!!
الدنيا حر
والكهربا قاطعه
والهبو نازل طس
ودغبشت الدنيا فى عيني
وبدنى خس
لكنى بأقول لنفسي
وأنا لهمومى بـ ألفّ
نقطة من غير الشريط ما يسف
نقطة ويلتفت عباد الشمس للضيا ويلف
نقطة وتخف
وترجع تانى
لخلق هاتقول عليهم إنك بتعرفهم
وبعدين هاتكتشف
إنك كنت ماتعرفهمش!!!
تم أضافة تعليقك سوف يظهر بعد المراجعة