هبة وأمجد زوجان جمعهما الحب فى بيت والفن فى بيوت العرائس والمصغرات

تصميم أخر لهبة وأمجد

تصميم أخر

تحدثت الزوجة هبة عبد العال، الحاصلة على بكالوريوس تجارة، ربة منزل، عن هواياتها مع زوجها أمجد الديسطي، الحاصل أيضاً على بكالوريوس تجارة،  وقالت لـ" اليوم السابع" :" الموضوع كان فى الأول بالنسبة لنا مجرد هواية بنحبها أنا وأمجد، بنمارسها وقت فراغنا، لكن مع الوقت تحولت لشغل،  وده من خمس سنين، فى الأول بدأنا بشغل العرائس المجسمة بالفوم، وكانت فكرتها جديدة وكنا بنحاول نخليها مش مجرد عروسة بس، بحيث تبقى ليها فائدة، زى نعمل مقلمة على شكل عروسة تنفع للأطفال وللكبار، وهدايا تتوزع فى السبوع، وطورنا التصميم وبدأنا نعمل عرائس لمهن معينة زى الدكتورة أو المدرسة، والتصميم ده عجب ناس كتير جداً".

تصميم هبة وأمجد

الزوجان هبة وأمجد 

صورة أخرى من تصميمات هبة وأمجد

تابعت :" بدأنا بعد كده نعمل تصميمات خاصة بمواسم دينية، زى فوانيس وزينة لشهر رمضان، وعرائس للمولد النبوى، ومن ناحية ثانية بدأنا نعمل أغلفة للكشاكيل المدرسية، وصممنا مصغرات وبيوت لعرائس الأطفال، محاكاة للواقع، مع الوقت بنتعلم و نطور أكتر فى شغلنا ".

صورة أخرى

هبة وأمجد لم يكتفيا بتصميم المصغرات ومنازل العرائس وغيرها من المشغولات اليدوية التى عرفا بها بين الناس، بل قررا مساعدة غيرهم من خلال إنشاء قناة تعليمية على موقع "اليوتيوب"، حيث قالت هبة:" قررت أنا وأمجد نعمل قناة تعليمية على اليوتيوب، عشان نقدر نعلم متابعينا ونفيدهم فى تنفيذ شغل الهاند ميد، زى عمل فن المصغرات وبيوت العرائس".

عود

وعن الأدوات التى يستخدمها هبة وأمجد فى تنفيذ تصميماتهم، قالت :" بنستخدم في شغلنا خامات كتير أوى، زي الخشب والفوم والفلين والقماش والكرتون المقوي، وحاجات كتير بنعملها إعادة تدوير ونستخدمها في تصميم المصغرات".

مصغرات أخرى

لم ينطبق المثل الشعبى المعروف" باب النجار مخلع" على هبة وأمجد، اللذان يحرصان على تصميم ألعاب لبناتهما، حيث قالت هبة :" بعمل لبناتي من اي شغل جديد وخصوصاً بيوت العرائس، لأنهم بيحبوها جداً، وبتسليهم".

مصغرات عن الحارة المصرية

 وعن الوقت الذى تقضيه هبة فى تنفيذ الأعمال اليدوية مع زوجها، قالت :"المجسمات والمصغرات الهاندميد، بتاخد وقت كبير جداً ومتعبة أوى، تقريباً ممكن الماكيت الواحد ياخد شغل لمدة أسبوع أو عشرة أيام، وبصراحة هو الموضوع متعب جداً وخصوصاً أن بناتي صغيرين، وطبعاً بشتغل في البيت، عشان أبقى متواجدة معاهم، وأقدر أتابع مذاكرتهم وطلباتهم".

مصغرات

وعن الصعوبات التى تقابل هبة وأمجد فى عملهم بالمشغولات اليدوية، قالت :"أكتر مشكلة بتقابلنا في شغلنا الشحن، لأن تصميماتنا بتحتاج إهتمام وإلا هتتلف وقت التوصيل، وكمان قلة الخامات فى السوق".

منزل أخر

تحلم هبة بتحقيق العديد من الأمنيات مع زوجها أمجد، والتى عبرت عنها قائلة :"بتمنى إن شاء الله، بناتي يكبروا شوية، عشان نقدر نعمل ورشة خاصه بينا، نشتغل فيها وكمان نقدر نعلم فيها شغل الهاندميد، لأن ناس كتير بيطلبوا مننا نعمل ورش للتعليم، وكمان نعمل معرض باسم البراند بتاعنا ونعرض فيه شغلنا".

منزل