انتقد الإعلامى أحمد شوبير، أداء فريقا الأهلى والزمالك فى مباراتهم مع صن دوانز والوداد المغربى بدوري أبطال أفريقيا، وقال شوبير فى برنامجه الإذاعى عبر أون سبورت إف إم :" الأهلى لازم يحصل فيه وقفة، لازم نسأل هل فيه أخطاء فى تشكيل مباراة أمس، هل فى تأخير فى إجراء التغييرات ، لو فضلنا نقول الارهاق يبقى نركز على بطولة واحدة وبس ونفضنا من الليلة دى ، عندك ارهاق اعمل روتيشن وبعدين كل فرق العالم بتعانى الارهاق الوداد لاعب من ثلاثة أيام فى الدوري وفاز على الزمالك".
ويضيف شوبير:" مش عايز اتكلم فنياً عن مباراة الأهلى عشان محستش نفسى مبسوط وانا بتفرج ، بس خلينا نقول لسه الفرصة قائمة فاضل 4 مباريات لو كسبنا 3 هنعدى ، بس اقدر اقول لموسيمانى لو رجعت بنقطة من جنوب افريقيا امام صن دوانز يبقى كويس ولو كسبت بقى دى حاجة ثانية بس السؤال هل نقدر نكسب صن دوانز فى جنوب افريقيا مجرد سؤال ، بردو مضايق من الناس اللى تقولك الاهلى لعب حلو بس خسر ، حلو فين معلش ومطمننين ازاى كدا".
وتابع شوبير:" عارف ان الاهلى ممكن يطلع تانى من المجموعة دى ولما بيطلع تانى بياخد البطولة بس بردو لازم نقف ونعرف اسباب الخسارة ، وعندنا ماتش صعب فى الدوري مع فاركو ولازم اللاعيبة تتمرن على الاقل مرتين قبل الماتش واللاعيبة اللى ملعبتش امام صن دوانز لازم تتمرن هفضل اقول كدا رغم ان الناس زعلت منى كلامى بس مش هغيره".
وأكمل شوبير:"الزمالك عمل بداية رائعة مفيش أحسن من كدا وسجل هدف فى أول 3 دقائق بس حدث تراجع رهيب واندفاع بلا هوية أو تركيز ، فريق رايح يكسب يقوم يخسر 3 ، معرفش بقى شكلنا هنقعد نحلم بصعود الاهلى والزمالك وممكن نستنى للحظات الاخيرة والحسم والحقيقة لازم تتقال بيراميدز هو أكثر نادى مصرى عنده رغبة الفوز خارج أرضه ، حقق الفوز خارج أرضه بنسبة 72 % وهو رقم مذهل ويستحق التحية".
وتابع شوبير:" مش هقول حاجة لكارتيرون وموسيمانى دلوقتى هقولهم اكسبوا 3 ماتشات بس ، وبعدين نتكلم".
