قدم الإعلامى محمد الباز رئيس مجلس إدارة وتحرير " الدستور" ومقدم برنامج " آخر النهار" المذاع عبر فضائية "النهار" العزاء فى وفاة الزميل الراحل علام عبد الغفار نائب رئيس تحرير " اليوم السابع" ورئيس قسم المحافظات قائلا ربنا يرحمك يا علام يا طيب "
وكتب محمد الباز فى منشور له على صفحته الشخصية بموقع التواصل الاجتماعى "الفيس بوك"، " انت دفعة كام يا علام" ...دى كانت كلمة السر بينى وبين علام عبد الغفار اللى فجعنى خبر موته، وخلانى أعيش صدمة وحالة عدم استيعاب قاسية وتصور للحياة اللى مبتعطيش نفسها للطيبين بسهولة، وكان دايما يرد وهو بيضحك: الدفعة اللى انت عايزاها يا دكتور".
وتابع الإعلامى محمد الباز، درست لعلام فى كلية الاعلام، وقتها كان زى الطيف، تفتقده لما يغيب ويطبطب عليك لما يحضر بابتسامته اللى عمرها مافارقته أبدا.
وتابع الكاتب الصحفى محمد الباز "لما بدأت تجربة التليفزيون اشتغل معايا من أول يوم لحد ما سبنا قناة المحور سوا فى أبريل 2020، وطول الوقت كان بيعمل أكتر من اللى عليه من غير ما يشتكى أو يعترض أو يطالب بحاجة مش من حقه".
واستطرد الباز " الله يرحمك يا علام، الله يرحمك يا طيب.. كان طيب، هو ده الوصف اللى يليق به، ولأنه كان طيب معافرش مع الموت، وأكيد استقبله بابتسامته، يا أخى كنت عافر معاه شوية، عشان خاطر محمد وحليمة على الأقل، اتنازلت ليه يا علام عن حقك بسهولة فى الحياة، كنت امسك فيها شوية".
