منى الشاذلى تعرض فيديو نادرا لعمار الشريعي يوم زفافه.. وأرملته تعلق: "الفرح ما كانش هيتعمل"

عرضت الإعلامية منى الشاذلى، فيديو نادر للموسيقار الراحل عمار الشريعي، وهو يعزف ويغني في ليلة زفافه على الإعلامية ميرفت القفاص، بجوار الفنان الراحل سمير صبري وبحضور عدد كبير من الوسط الفني على رأسهم الفنانة زهرة العلا.

ومن جانبها علقت الإعلامية ميرفت القفاص، أرملة الموسيقار الراحل عمار الشريعي، وقالت: "الفرح ده مكنش المفروض هيتعمل، وكنا هنعمل عشاء للعائلتين بس، فوجئت وداني الفندق يفرجني على القاعة اللي هيتعمل فيها الفرح، واتعمل فقرات وكان ضمنهم الفنانة فيفى عبده والفنان سمير صبري وطلب مني أجيب فستان فرح، ومصر كلها حضرت الفرح".

وأضافت خلال لقائه مع الإعلامية منى الشاذلي ببرنامج "معكم" الذي يذاع على قناة "cbc": "كانت سهرة حلوة وهو تجلى فيها، وكان كل الملحنين موجودين، زي سيد مكاوي وكمال الطويل، وكان في فترة عمار وسمير صبري بيعملوا شغل مع بعض، وعمار غنى أغنية منهم في الفرح، اللحن ده اتعمل على أغنية وطنية بعد كدة".

وقالت: "عمار كان بيتحرك بسلاسة شديدة كأنه بيشوف، سواء في البيت أو حتى في أوتيل، بيعد السلالم، ولما بنروح أي مكان، كان بيطلب مني أشرح له المكان عامل ازاي، وبيحفظ بسرعة، عنده قدرة كبيرة جدا على الحفظ، وهو كان مستقل بنفسه مش عاوز يحس إنه ناقصه حاجة".

واستطردت: "قبل ظهور الحاسب الآلي، لازم أجيب له كل الصحف، قبل ماتش الأهلي والزمالك، وبيقرأ كل الأخبار، والله يرحمه كان الزمالك عنده حاجة كبيرة أوي، في المرحلة الأخيرة مكنش محتاجني لما ظهرت الحاجات اللي بتقرأ الأخبار، وهو كان بيستعمل الـ iphone قبل ما يتوفى".