أكد الرئيس عبدالفتاح السيسي، أن العالم يمر بأزمة كبيرة، متابعا: " الأزمة اللى بتمر بالعالم أزمة كبيرة .. ومش ببالغ في ده، وأكيد انتوا متابعين اللى بيحصل.. بنحاول بقدر الإمكان لا نعكس اللى بيحصل والآثار بجهد وعمل إن ده لا ينعكس على حياة الناس أكتر من اللازم .
وأضاف الرئيس السيسي خلال افتتاح عدد من المشروعات التنموية الجديدة في محافظة المنيا: يعني تقول بعد كل الضغط اللى احنا فيها دي وانت بتقول بتحاولوا متخلوش الاثار تبقا قوية علينا صدقوني اه بنحاول..طيب السؤال بقا انت مش خايف، أنا مش خايف لأن ربنا موجود، وهو قادر".
وتابع الرئيس: "أثناء لقاء الإفطار مع أهالينا في المنيا فيه شابة قالتلي عاوزة أسالك سؤال!!!!.. قلتلها اتفضلى .. بتقولى إنت مش خايف؟ .. قلتلها لا مش خايف.. تقصد إن هي عاوزة تطمن علي بكره وده أمر مهم قوي .. بقول دايما عاوزين يعملوا حاجة واحدة بس.. يفقدوكم الثقة في أنفسكم وفينا.
وأكمل الرئيس: "عاوز أقول حاجة الكلام مش للناس اللى في القاعة .. الكلام ده بقولوا لكل الناس الموجودة في مصر وبتسمعنا انا مش قلقان خالص والإجراءات اللى بنعملها بنحاول نخفف الاثار الصعبة على للازمة على الناس كلها ودايما بنتحرك ونفكر والتفكير بتاعنا وربنا بيهدينا بالإجراءات تسهل الأمور ".
وتابع الرئيس: ""كنت بقول للسيد المستشار أبو الشهيد ووالدته خلال التكريم.. أنه بيقول في 2013.. في أعقاب اللى حصل ساعتها ومحاولة تخريب الدولة وتدميرها هو مش فيه دول تانية من غير ما نقول أي حاجة مازالت متضررة من اللى حصل ومازالت تعاني من اللى حصل... اللى عمل كده في مصر مين؟.. أوعي حد يقول أنا.. لا هو.. ربنا.. صدقوني أنا كنت شايف كويس أوي إيه ممكن يحصل.
وأوضح الرئيس السيسي: "شايف الخطر والترتيبات وكل حاجة.. كتير من الناس بتقول ما انتوا عملتوا.. الكل بيحاول وبيعمل والكل بيضحي.. ومش بتكلم عن مصر".
واصل الرئيس: "ربنا أراد الدولة بناسها وكل شهيد من كل أسرة مصرية يكون هو الساتر الحاجز.. بيقدم نفسه علشان احنا كلنا بخير وسلامة وربنا أراد ونجينا منها..طب بعد ما نجينا من ده كله حد يكون قلقان من حاجة تانية.. ممكن لأ.. مفيش خوف ولا قلق.. بندير الأمور بإخلاص وامانة وبشرف في وقت عز فيه الشرف".
شدد الرئيس السيسي: "أنا مش قلقان وعايز أقولكم كلكم.. أوعوا أبدا كلكم حد فيكم يقلق أو يخاف من بكره.. بكره بفضل الله سبحانه وتعالى أحسن من النهاردة ولازم تكونوا متأكدين من ده.
قال الرئيس السيسي: افتكروا 2013 وأنتوا تعرفوا اللي أنا بقوله حقيقة.. ولو أنتوا افتكرتوا الوقت الصعب ده هتعرفوا إن قد إيه كنا في خطر شديد جدا.. خلوا بالكم أنا أرسلت قوات في خلال 10 ساعات في أعقاب اللي حصل، علشان تحمي وتؤمن الصعيد من محاولة التدمير والتخريب والتضييع، علشان نمنع فتنة وحرب أهلية في مصر"...أنا أدلل على ده.. إن ربنا وقف معانا وحمى الناس الطيبة البسيطة دي، زي كل أسرة بشوفها في كل حتة في مصر .. ربنا نجاهم وأمنهم وسلمهم، يبقى تفتكروا مش هيكمل فضله علينا؟ لا هيكمل فضله علينا وهيعيننا وهتشوفوا".
أضاف الرئيس السيسي: :"أنتوا هتشوفوا كتير جدا لأن هما في حرب معانا على طول، والله هما مش فاهمين ومش عارفين، دايما كل الأدوات اللي ممكن تُستخدم بيستخدموها.. الكذب والغش والاشاعات والافتراء والادعاء والتزييف.. ده منهجهم...أنا أقول للمعنيين بالأمر، خلوا بالكم المصريين بقالهم 10 سنين عايشين في الكلام ده وأنتو خايفين إزاي.. أنا مش قلقان علشان ربنا وكفى به، ثم علشان كل أسرة مصرية واقفة جنبي"..."طول ما احنا كده.. تاني وتالت بقولها.. طول ما احنا بعض محدش ابدا ابدا هيقدر يعمل حاجة".
وفى ختام كلمته وجه الرئيس السيسي التهنئة لأهالي المنيا قائلا: ""كل سنة وانتم طيبين.. أهل المنيا.. وان شاء الله المنيا بخير.. والصعيد بخير.. ومصر بخير وسلام.. بفضل الله وبفضلكم.. شكرا جزيلا والسلام عليكم ورحمة الله وبركاته".
